ଲକ୍ଷ୍ନୌ: ହୃଦଘାତରେ ଆଖି ବୁଜିଲେ ବିଜେପି ବିଧାୟକ । ଆଜି ସକାଳେ ଉତ୍ତରପ୍ରଦେଶ ଲଖିମପୁର ଖେରୀ ଜିଲ୍ଲାର ଗୋଲା ବିଧାୟକ ଅରବିନ୍ଦ ଗିରିଙ୍କ ହୃଦଘାତରେ ମୃତ୍ୟୁ ହୋଇଛି(BJP MLA Arvind Giri dies of heart attack) । ସେ କାର୍ ଯୋଗେ ଲକ୍ଷ୍ନୌ ଯାଉଥିବା ସମୟରେ ଅଧା ବାଟରେ ତାଙ୍କର ହୃଦଘାତ୍ ଆସିଥିଲା । ଏହାପରେ ତୁରନ୍ତ ତାଙ୍କୁ ନିକଟସ୍ଥ ହସ୍ପିଟାଲକୁ ନିଆଯାଇଥିଲା । ହେଲେ ଡାକ୍ତର ସେଠାରେ ବିଧାୟକଙ୍କୁ ମୃତ ଘୋଷଣା କରିଥିଲେ । ମୃତ୍ୟୁ ବେଳକୁ ତାଙ୍କୁ ୬୪ ବର୍ଷ ବୟସ ହୋଇଥିଲା । ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ(Yogi Adityanath) ବିଧାୟକ ଅରବିନ୍ଦ ଗିରିଙ୍କ ବିୟୋଗରେ ଗଭୀର ଦୁଃଖ ପ୍ରକାଶ କରିଛନ୍ତି । ମୁଖ୍ୟମନ୍ତ୍ରୀ ଶୋକସନ୍ତପ୍ତ ପରିବାରକୁ ସମବେଦନା ଜଣାଇବା ସହ ଦିବଙ୍ଗତ ଆତ୍ମାର ସଦ୍ଗତି କାମନା କରିଛନ୍ତି ।
ସୂଚନା ମୁତାବକ, ବିଧାୟକ ଅରବିନ୍ଦ ଗିରି ଆଜି ସକାଳେ ଲକ୍ଷ୍ନୌ ଅଭିମୁଖେ ଯାତ୍ରା କରୁଥିଲେ । ଘରୁ ବାହାରିବା ସମୟରେ ସେ ସମ୍ପୂର୍ଣ୍ଣ ସୁସ୍ଥ ଥିଲେ । ହେଲେ ଲକ୍ଷ୍ନୌ ଯିବା ବାଟରେ ତାଙ୍କର ହୃଦଘାତ୍ ଆସିଥିଲା । ତାଙ୍କୁ ଚିକିତ୍ସା ପାଇଁ ମେଡିକାଲକୁ ନିଆଯାଉଥିବା ସମୟରେ ସୀତାପୁର ନିକଟରେ ବିଧାୟକଙ୍କ ଦେହାନ୍ତ ହୋଇଯାଇଛି । ତାଙ୍କର ବଡଭାଇ ମଧୁସୂଦନ ଗିରି ଏନେଇ ସୂଚନା ଦେଇଛନ୍ତି । ତେବେ ବିଧାୟକ ଗିରି କିଛି ଦିନ ହେଲା ଅସୁସ୍ଥ ଥିବା ଜଣାପଡିଛି ।