ହଇଦ୍ରାବାଦ:ଚେନ୍ନାଇରୁ ଥିରୁଅନନ୍ତପୁରମ ଅଭିମୁଖେ ଉଡାଣ ଭରିବାକୁ ଥିବା ଇଣ୍ଡିଗୋ ବିମାନରେ ଜଣେ ଯାତ୍ରୀ ଜରୁରୀକାଳୀନ ଡୋର ଖୋଲି ଦେଇଥିବା ସୂଚନା ମିଳିଛି । ଘଟଣାଟି ଗତବର୍ଷ ଡିସେମ୍ବର 10 ତାରିଖର ବୋଲି କୁହାଯାଉଛି । ବିମାନଟି ଉଡାଣ ଭରିବା ପୂର୍ବରୁ ଯାତ୍ରୀଙ୍କ ଦ୍ବାରା ଏପରି କରାଯାଇଥିବା ଜଣାପଡିଛି । ପରେ ଯାତ୍ରୀଜଣଙ୍କ ଏହା ତ୍ରୁଟିବଶତଃ କରାଯାଇଥିବା କହିଥିଲେ । ବେସାମରିକ ବିମାନ ଉଡାଣ ନିର୍ଦ୍ଦେଶାଳୟ ଏହାର ତଦନ୍ତ ନିର୍ଦ୍ଦେଶ ଦେଇଛି । ତେବେ ଏପରି କରିଥିବା ଯାତ୍ରୀ ଭାରତୀୟ ଜନତା ପାର୍ଟିର ଜଣେ ସାଂସଦ ବୋଲି ବିଭିନ୍ନ ଗଣମାଧ୍ୟମରେ ଖବର ପ୍ରସାରିତ ହୋଇଛି । DGCA କିମ୍ବା ସମ୍ପୃକ୍ତ ବିମାନ କମ୍ପାନୀ ପକ୍ଷରୁ କୌଣସି ସାଂସଦଙ୍କ ନାମ ପ୍ରକାଶ କରାଯାଇନାହିଁ ।
ତେବେ ଏପରି କରିଥିବା ଯାତ୍ରୀଜଣଙ୍କ ଭାରତୀୟ ଜନତା ପାର୍ଟିର ଜଣେ ସାଂସଦ ବୋଲି ମଧ୍ୟ କୁହାଯାଉଛି । ସେ ତାଙ୍କର ଜଣେ ସହଯୋଗୀଙ୍କୁ ସାଙ୍ଗରେ ଧରି ଇଣ୍ଡିଗୋ ବିମାନରେ (IndiGo 6E flight 6E-7339) ଚେନ୍ନାଇରୁ କେରଳର ଥିରୁଅନନ୍ତପୁରମ ଅଭିମୁଖେ ଯାତ୍ରା କରୁଥିଲେ । ତେବେ ବିମାନ ଉଡାଣ ଭରିବା ପୂର୍ବରୁ ବିମାନର ଏମୋରଜେନ୍ସି ଡୋର ଖୋଲିଥିଲେ ଏହି ବିଜେପି ନେତା । ପରେ ତାଙ୍କୁ ଏସମ୍ପର୍କରେ ପଚରା ଯିବାରୁ ସେ ଏହା ତ୍ରୁଟିବଶତଃ ଖୋଲିଦେଇଥିବା ପ୍ରକାଶ କରିଥିଲେ । ବିମାନ କର୍ମଚାରୀ ଏହାକୁ ବନ୍ଦ କରିବା ସହ ବିମାନର ଏୟାର ପ୍ରେସର ପୁଣି ଥରେ ଚେକ କରିଥିଲେ । ପ୍ରାୟ 2ଘଣ୍ଟା ବିଳମ୍ବରେ ବିମାନଟି ଗନ୍ତବ୍ୟସ୍ଥଳ ଅଭିମୁଖେ ଉଡାଣ ଭରିଥିଲା । ବିଭାଗୀୟ ତଦନ୍ତ ନିର୍ଦ୍ଦେଶ ମିଳିବା ପରେ ଡିଜିସିଏର ଜଣେ ବରିଷ୍ଠ ଅଧିକାରୀ ଏହି ମାମଲାର ତଦନ୍ତ କରୁଛନ୍ତି ।