ନୂଆଦିଲ୍ଲୀ: ଗତ ଅଗଷ୍ଟ ୨୮ ତାରିଖରେ ଚାଷୀଙ୍କ ଉପରେ ହୋଇଥିବା ଲାଠିଚାର୍ଜ ବିରୋଧରେ ଚାଷୀମାନେ ହରିୟାଣାର କରନାଲରେ କୃଷକ ମହାପଞ୍ଚାୟତ ଜାରି ରହିଛି । ଏଠାରେ ସରକାର ଇଣ୍ଟରନେଟ ସେବାକୁ ବନ୍ଦ କରିଛନ୍ତି । ଏନେଇ ହରିୟାଣାର ମୁଖ୍ୟମନ୍ତ୍ରୀ ମନୋହର ଲାଲ ଖଟ୍ଟର ତଥା ବିଜେପି ସରକାରଙ୍କୁ ଘେରିଛି କଂଗ୍ରେସ । ଚାଷୀଙ୍କ ସ୍ବରକୁ ଜନତାଙ୍କ ନିକଟରେ ନ ପହଞ୍ଚାଇବା ପାଇଁ ସରକାର ସେଠାରେ ଇଣ୍ଟରନେଟ ସେବା ବନ୍ଦ କରିଛନ୍ତି । ସରକାର ବୁଝାମଣା ପାଇଁ ଆତଙ୍କବାଦୀ ସଙ୍ଗଠନ ତାଲିବାନ ସହିତ କଥାବାର୍ତ୍ତା କରୁଛନ୍ତି କିନ୍ତୁ ଚାଷୀଙ୍କ ସହ କରୁନାହାନ୍ତି ବୋଲି କଂଗ୍ରେସର ମୁଖ୍ୟ ମୁଖପାତ୍ର ରଣଦୀପ ସୁର୍ଜେୱାଲା କହିଛନ୍ତି ।
ଏପରି କରି କେନ୍ଦ୍ର ସରକାର ନିଜ ଆତ୍ମବିଶ୍ବାସ ଓ ଜନାଦେଶ ହରାଇଛନ୍ତି । ଏଥିଲାଗି ସରକାର ନିଜ କ୍ଷମତା ତ୍ୟାଗ କରନ୍ତୁ ବୋଲି କହିଛନ୍ତି ରଣଦୀପ । ସେପଟେ କୃଷକ ମହାପଞ୍ଚାୟତ ହେଉଥିବା ସ୍ଥାନ କରନାଲରେ ବ୍ୟାପକ ପୋଲିସ ଫୋର୍ସ ମୁତୟନ ହୋଇଛି । ପାଖାପାଖି ୩୦ ବାଟାଲିୟନ ଫୋର୍ସ ସମେତ ସେଣ୍ଟ୍ରାଲ ଫୋର୍ସ ମଧ୍ୟ ବିକ୍ଷୋଭ ସ୍ଥାନରେ ଚାଷୀଙ୍କୁ ଘେରି ରହିଛନ୍ତି । ଆନ୍ଦୋଳନରତ ଚାଷୀ କିପରି କରନାଲ ମଣ୍ଡି ନିକଟକୁ ପହଞ୍ଚିପାରିବେ ନାହିଁ, ସେଥିଲାଗି ଫୋର୍ସକୁ ମୁତୟନ କରାଯାଇଛି । କିନ୍ତୁ ଚାଷୀମାନେ ଯେକୌଣସି ପରିସ୍ଥିତିରେ ମଣ୍ଡି ନିକଟରେ ପହଞ୍ଚିବେ ବୋଲି ଦୃଢୋକ୍ତି ପ୍ରକାଶ କରିଛନ୍ତି ।
ଚାଷୀମାନେ ଆବଶ୍ୟକସ୍ଥଳେ ବ୍ୟାରିକେଡ ଭାଙ୍ଗି ମଣ୍ଡି ନିକଟରେ ପହଞ୍ଚିବେ ବୋଲି କହିଛନ୍ତି । କୌଣସି ସୁରକ୍ଷାକର୍ମୀ ସେମାନଙ୍କୁ ମହାପଞ୍ଚାୟତରେ ସାମିଲ ହେବାକୁ ଅଟକାଇପାରିବ ନାହିଁ ବୋଲି ଭାରତୀୟ କିଷାନ ୟୁନିଅନର ସଦସ୍ୟ ଜଗଦୀପ ସିଂ ଚ଼ଡୁଣୀ କହିଛନ୍ତି । ଏହି ମହାପଞ୍ଚାୟତରେ ଯୋଗ ଦେବା ପାଇଁ ବିଭିନ୍ନ ପ୍ରାନ୍ତରୁ ଚାଷୀମାନେ ଆସି ଯୋଗ ଦେଇଛନ୍ତି । ସେମାନେ ଖୁବଶୀଘ୍ର ମଣ୍ଡିରେ ପହଞ୍ଚିବାକୁ ଚେଷ୍ଟା କରୁଛନ୍ତି । ସମସ୍ତ ଚାଷୀନେତା ପହଞ୍ଚିବା ପରେ ମହାପଞ୍ଚାୟତ ଆରମ୍ଭ ହେବ ବୋଲି ସେ କହିଛନ୍ତି ।