ଇମ୍ଫାଲ: ମଣିପୁରରେ ବହୁମତ ହାସଲ କରିଥିବା ବିଜେପି ପୁଣିଥରେ ସରକାର କରିବାକୁ ଯାଉଛି । ତେବେ ଚଳିତଥର ମଧ୍ୟ ମୁଖ୍ୟମନ୍ତ୍ରୀ ହେବେ ବୀରେନ ସିଂ । ଏନେଇ ସୂତ୍ରରୁ ସୂଚନା ମିଳିଥିବାବେଳେ ଖୁବଶୀଘ୍ର ଚୂଡାନ୍ତ ନିଷ୍ପତ୍ତି ଘୋଷଣା କରିବ ଦଳ । ବୁଧବାର ମୁଖ୍ୟମନ୍ତ୍ରୀ ପଦ ପାଇଁ ଦଳ ବୀରେନ ସିଂଙ୍କ ନାମ ଘୋଷଣା କରିବାର ସମ୍ଭାବନା ଥିବା ସୂତ୍ରରୁ ସୂଚନା ମିଳିଛି ।
ଉତ୍ତର-ପୂର୍ବ ରାଜ୍ୟ ମଣିପୁରରେ ନିକଟରେ ଶେଷ ହୋଇଥିବା ବିଧାନସଭା ନିର୍ବାଚନରେ ବିଜେପି 60ଟି ଆସନ ମଧ୍ୟରୁ 32ଟି ଜିତି ସରକାର କରିବାକୁ ଯାଉଛି । ସୂଚନାନୁସାରେ, ଦିଲ୍ଲୀରେ ବିଜେପିର ସଂସଦୀୟ ବୋର୍ଡ ବୈଠକରେ ମଣିପୁର ବିଜେପି ପ୍ରଦେଶ ଅଧ୍ୟକ୍ଷା ସାରଦା ଦେବୀ, ବର୍ତ୍ତମାନ କାମଚଳା ମୁଖ୍ୟମନ୍ତ୍ରୀ ଥିବା ବୀରେନ ସିଂ, ବିଧାୟକ ଥୋଙ୍ଗାମ ବିଶ୍ୱଜିତ ସିଂହ ଉପସ୍ଥିତ ରହି କେନ୍ଦ୍ରୀୟ ନେତୃତ୍ୱଙ୍କ ସହିତ ଆଲୋଚନା କରିଥିଲେ।