ପାଟନା: ବିରୋଧୀଙ୍କ ‘ଇଣ୍ଡିଆ’ ମେଣ୍ଟ ଉପରେ କ୍ରୋଧିତ କି ଅସନ୍ତୁଷ୍ଟ ନାହାନ୍ତି ମେଣ୍ଟର ଅନ୍ୟତମ ବରିଷ୍ଠ ନେତା ତଥା ବିହାର ମୁଖ୍ୟମନ୍ତ୍ରୀ ନୀତିଶ କୁମାର । ସେ ଅସନ୍ତୁଷ୍ଟ ନୁହନ୍ତି କିମ୍ବା କୌଣସି ପଦପଦବୀ ଆଶାୟୀ ମଧ୍ୟ ନୁହନ୍ତି । ସେ କେବଳ ମେଣ୍ଟର ଏକତା ଚାହାନ୍ତି, ସେ ମେଣ୍ଟର ସଫଳତା ପାଇଁ କାମ କରୁଛନ୍ତି ବୋଲି କହିଛନ୍ତି ନୀତିଶ । ଆଜି ଗଣମାଧ୍ୟମରେ ପ୍ରତିକ୍ରିୟା ରଖି ନୀତିଶ ପୂର୍ବପରି ନିଜ ନେତୃତ୍ବ ଦାଦିବାରି ଚର୍ଚ୍ଚାକୁ ଖଣ୍ଡନ କରିଛନ୍ତି ।
ଆଜି ନୀତିଶ କହିଛନ୍ତି,‘‘ଗଣମାଧ୍ୟମରେ ବାରମ୍ବାର ମୁଁ ନାରାଜ ଥିବା ଓ ମେଣ୍ଟରରେ ପଦପଦବୀ ଚାହୁଁଥିବା ଖବର ପ୍ରସାରିତ ହେଉଛି । ମୁଁ ଏକଥା ପୂର୍ବରୁ ମଧ୍ୟ ସ୍ପଷ୍ଟ କରିସାରିଛି ଯେ, ମୁଁ କୌଣସି ପଦପଦବୀ ଆଶା ରଖିନି । ମୁଁ ମେଣ୍ଟ ପ୍ରତି ଅସନ୍ତୁଷ୍ଟ ହେବାର କାରଣ ମଧ୍ୟ କିଛି ନାହିଁ । ମୋର କେବେ କୌଣସି ଇଚ୍ଛା ନଥିଲା । ମେଣ୍ଟର ସହଯୋଗୀ ଦଳମାନେ ମିଳିମିଶି ନିର୍ବାଚନ ଲଢନ୍ତୁ, ତାହା ମୋର ଏକମାତ୍ର ଇଚ୍ଛା । ସେ ଦିଗରେ ମୁଁ କାର୍ଯ୍ୟ କରୁଛି ।’’ ସେହିପରି ସେ ଗଣମାଧ୍ୟମର ଖବର ପ୍ରସାରଣ ଶୈଳୀ ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି । କହିଛନ୍ତି,‘‘ଗଣମାଧ୍ୟମ ପ୍ରତି ମୋର ସବୁବେଳେ ସମ୍ମାନ ରହିଆସିଛି । ହେଲେ ଏବେ ଆପଣମାନେ ଅନ୍ୟ ଦ୍ବାରା ନିୟନ୍ତ୍ରିତ ହେଉଛନ୍ତି । ଏହାକୁ ମୁଁ ମନା କରିବାକୁ ମଧ୍ୟ ଉଚିତ ମନେ କରୁନାହିଁ । କିନ୍ତୁ ଆପଣଙ୍କ ସ୍ଥିତି ବୁଝିପାରୁଛି ।’’
ନିକଟରେ ଶେଷ ହୋଇଥିବା ଦିଲ୍ଲୀରେ ଇଣ୍ଡିଆ ମେଣ୍ଟର ବୈଠକରେ ତୃଣମୂଳ କଂଗ୍ରେସ ମୁଖ୍ୟ ତଥା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କଂଗ୍ରେସ ମୁଖ୍ୟ ମଲ୍ଲିକାର୍ଜୁନ ଖଡଗେଙ୍କ ନାମ ମେଣ୍ଟର ପ୍ରଧାନମନ୍ତ୍ରୀ ପ୍ରାର୍ଥୀ ଭାବେ ପ୍ରସ୍ତାବ ରଖିଥିଲେ । ଏହାକୁ ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିଓ୍ବାଲ ମଧ୍ୟ ସମର୍ଥନ କରିଥିଲେ । ଏହାକୁ ଅନ୍ୟ କେହି ସହଯୋଗୀ ଦଳ ସିଧା ବିରୋଧ କରିନଥିଲେ ସୁଦ୍ଧା ନିଜେ ଖଡଗେ ଏହି ପ୍ରସ୍ତାବକୁ ଏଡାଇ ଯାଇଥିବା ଚର୍ଚ୍ଚା ହୋଇଥିଲା । ନିର୍ବାଚନଫଳାଫଳ ପରେ ପ୍ରଧାନମନ୍ତ୍ରୀ ଚେହେରା ସମ୍ପର୍କରେ ଚର୍ଚ୍ଚା ହେବା ଉଚିତ ବୋଲି ଖଡଗେ କହିଥିଲେ ।