ପାଟନା:ଜି-20 ଡିନର ପାର୍ଟିରେ ସାମିଲ ହେବା ପରେ ଆଜି ପାଟନା ଫେରୁଛନ୍ତି ବିହାର ମୁଖ୍ୟମନ୍ତ୍ରୀ ନୀତିଶ କୁମାର । ଶନିବାର ଦିଲ୍ଲୀରେ ଜି 20 ଡିନର ପାର୍ଟିର ଆୟୋଜନ କରାଯାଇଥିଲା । ଯେଉଁଥିରେ ବିଶ୍ୱନେତାମାନଙ୍କ ସହ ଦେଶର ସମସ୍ତ ମୁଖ୍ୟମନ୍ତ୍ରୀମାନଙ୍କୁ ବି ଆମନ୍ତ୍ରିତ କରାଯାଇଥିଲା । ଦେଶର ରାଷ୍ଟ୍ରପତିଙ୍କ ପକ୍ଷରୁ ଆୟୋଜିତ ଏହି ରାତ୍ରିଭୋଜନ ପାର୍ଟିରେ ସାମିଲ ହୋଇଥିଲେ ବିହାର ମୁଖ୍ୟମନ୍ତ୍ରୀ ନୀତିଶ କୁମାର । ଏହି ସମୟରେ ସେ ଆମେରିକା ରାଷ୍ଟ୍ରପତି ଜୋ ବାଇଡେନ, ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭେଟିଥିଲେ । ତେବେ ଆଜି ଅପରାହ୍ନ 3ଟା ବେଳେ ଦିଲ୍ଲୀରୁ ପାଟନା ଫେରିବେ ନୀତିଶ କୁମାର । ତାଙ୍କ ସହ ମନ୍ତ୍ରୀ ସଞ୍ଜୟ ଝା ବି ଜି-20 ପାର୍ଟିରେ ଯୋଗ ଦେଇଥିଲେ ।
ପ୍ରଧାନମନ୍ତ୍ରୀ ମୋଦିଙ୍କୁ ଭେଟିଲେ ନୀତିଶ:ବିହାରରେ ମେଣ୍ଟ ସରକାର ଗଠନ ପରେ ପ୍ରଥମ ଥର ପାଇଁ ପ୍ରଧାନମନ୍ତ୍ରୀଙ୍କୁ ଭେଟିଛନ୍ତି ବିହାର ମୁଖ୍ୟମନ୍ତ୍ରୀ ନୀତିଶ କୁମାର । ଶନିବାର ଦିନ ଜି-20 ରାତ୍ରି ଭୋଜନ ପାର୍ଟିରେ ଯୋଗ ଦେବାକୁ ରାଷ୍ଟ୍ରପତିଙ୍କ ପକ୍ଷରୁ ତାଙ୍କ ନିମନ୍ତ୍ରଣ କରାଯାଇଥିଲା । ରାଷ୍ଟ୍ରପତିଙ୍କ ଆମନ୍ତ୍ରଣକୁ ରକ୍ଷା କରି ଭୋଜନ ପାର୍ଟିରେ ସାମିଲ ହୋଇଥିଲେ ନୀତିଶ । ଏହି ସମୟରେ ସେ ମୋଦିଙ୍କୁ ଭେଟିବା ସହ କିଛି ସମୟ କଥାବାର୍ତ୍ତା କରିଥିବା ଦେଖିବାକୁ ମିଳିଥିଲା । ତେବେ ପାଖାପାଖି ଦେଢ଼ ବର୍ଷ ପରେ ପ୍ରଧାନମନ୍ତ୍ରୀଙ୍କୁ ଭେଟିଛନ୍ତି ନୀତିଶ କୁମାର ।
ବିଜେପି ନେତାଙ୍କୁ ଭେଟିଲେ ନୀତିଶ: ଡିନର ସମୟରେ ମୁଖ୍ୟମନ୍ତ୍ରୀ ନୀତିଶ ବିଜେପିର ଅନେକ ନେତାଙ୍କୁ ଭେଟିଥିବା ଦେଖିବାକୁ ମିଳିଥିଲା । କେନ୍ଦ୍ରମନ୍ତ୍ରୀ ଅଶ୍ୱିନୀ ଚୌବେଙ୍କ ସହ ନୀତିଶଙ୍କ ଏକ ଫୋଟୋ ସାମ୍ନାକୁ ଆସିଛି । ଆଉ ମଧ୍ୟ ଡିନର ଟେବୁଲରେ କେନ୍ଦ୍ରମନ୍ତ୍ରୀ ଅନୁପ୍ରିୟା ପଟେଲଙ୍କ ସହ ଅନ୍ୟ ବିଜେପି ନେତାମାନଙ୍କ କଥା ହୋଇଥିଲେ ନୀତିଶ । ଡିନର ଟେବୁଲରେ ସାଙ୍ଗ ହୋଇ ବସିବା ସହ ସମସ୍ତେ ସମସ୍ତଙ୍କ ସହ ଉତ୍ସାହିତ ହୋଇ କଥାବାର୍ତ୍ତା କରୁଥିବା ଦେଖିବାକୁ ମିଳିଥିଲା ।
ନୀତିଶଙ୍କ ବ୍ୟତୀତ ଆଉ କେଉଁ କେଉଁ ମୁଖ୍ୟମନ୍ତ୍ରୀ ହୋଇଥିଲେ ସାମିଲ:ବିହାର ମୁଖ୍ୟମନ୍ତ୍ରୀଙ୍କ ବ୍ୟତୀତ ଇଣ୍ଡିଆ ମେଣ୍ଟରୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ, ଝାଡଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ, ତାମିଲନାଡୁ ମୁଖ୍ୟମନ୍ତ୍ରୀ ଏମ କେ ଷ୍ଟାଲିନଙ୍କ ସମେତ ଅନ୍ୟ ମୁଖ୍ୟମନ୍ତ୍ରୀମାନେ ଜି 20 ଡିନରରେ ସାମିଲ ହୋଇଥିଲେ । ହିମାଚଳ ପ୍ରଦେଶ ମୁଖ୍ୟମନ୍ତ୍ରୀ ସୁଖବିନ୍ଦର ସୁଖୁ, ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା, ହରିୟାଣା ସିଏମ ମନୋହର ଲାଲ ଖଟ୍ଟର, ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗି ଆଦିତ୍ୟନାଥ ପ୍ରମୁଖ ସାମିଲ ହୋଇଥିଲେ ।