40 ଫୁଟ ବୋରିଂ ଗାତକୁ ଖସିଲା ଯୁବକ, ଉଦ୍ଧାର କାର୍ଯ୍ୟ ଜାରି

ଉତ୍ତରପ୍ରଦେଶର ସୀତାପୁରରେ ଅଭାବନୀୟ ଘଟଣା । ଏଠାରେ ଜଣେ 35 ବର୍ଷୀୟ ଯୁବକ 40 ଫୁଟ ମାଟି ତଳକୁ ଖସିପଡିଲା । ଉଦ୍ଧାର କାର୍ଯ୍ୟ ଜାରି । ପଢନ୍ତୁ ସମ୍ପୂର୍ଣ୍ଣ ଖବର...

ଲକ୍ଷ୍ନୌ: ପୁଣି 40 ଫୁଟ ମାଟି ତଳକୁ ଖସିଲା ଯୁବକ । ଏଭଳି ଅଭାବନୀୟ ଘଟଣା ଘଟିଛି ଉତ୍ତରପ୍ରଦେଶର ସୀତାପୁରରେ । ସୋମବାର ଏହି ଅଞ୍ଚଳରେ ବୋରିଂ ଖୋଳାଯାଉଥିଲା । ଆଉ ଏହି ଗର୍ତ୍ତରେ ଖସିପଡିଲା ଜଣେ ଯୁବକ । ଯୁବକ ଜଣକ କାଲି ସନ୍ଧ୍ୟାରୁ ଖସିଛନ୍ତି । ତାଙ୍କୁ ବାହାରକୁ କାଢିବା ପାଇଁ ଦୁଇଟି ଜେସିବି ମେସିନ ମାଟି ଖୋଳିବା ଆରମ୍ଭ କରିଛି । ଏହାସହ ଏନଡିଆରଏଫ ଟିମକୁ ମଧ୍ୟ ସୂଚନା ଦିଆଯାଇଛି । ସେପଟେ ପୋଲିସ, ପ୍ରଶାସନ ଅଧିକାରୀମାନେ ଘଟଣାସ୍ଥଳରେ ପହଞ୍ଚିଯାଇଛନ୍ତି ।

କୁହାଯାଉଛି ଯେ ଏହି ଅଞ୍ଚଳରେ ରହୁଥିବା 35 ବର୍ଷୀୟ ଯୁବକ ଅନୁଜ ସୋମବାର ସନ୍ଧ୍ୟାରେ ଜମିରେ ଲାଗିଥିବା ପମ୍ପକୁ ସଜାଡିବା ପାଇଁ ଯାଇଥିଲା । ସେତିକି ବେଳେ ଅଚାନକ ନିକଟରେ ଖୋଳାଇଥିବା ବୋରିଂର ଚତୁଃପାର୍ଶ୍ବରୁ ବାଲି ଖସିଗଲା ଏବଂ ଅନୁଜ ସେହି ଖାଲ ଭିତରକୁ ଗଳି ପଡିଲେ । ପାଖରେ ଥିବା ଲୋକେ ଘଟଣା ସମ୍ପର୍କରେ ପୋଲିସକୁ ଖବର ଦେଲେ । ଖବର ପାଇଁ ପ୍ରଶାସନ ପକ୍ଷରୁ ଯୁବକଙ୍କୁ ଉଦ୍ଧାର କରିବା ପାଇଁ ସମସ୍ତ ପ୍ରକାର ଚେଷ୍ଟା ଜାରି ରହିଛି ।

ବ୍ୟୁରୋ ରିପୋର୍ଟ, ଇଟିଭି ଭାରତ