ସିଏଏକୁ ବିରୋଧ: କଂଗ୍ରେସ ବିଧାୟକଙ୍କୁ ବାଚସ୍ପତିଙ୍କ ମୁହଁତୋଡ ଜବାବ

ଗୁଜୁରାଟ ବିଧାନସଭା ବାଚସ୍ପତି ରାଜେନ୍ଦ୍ର ତ୍ରିବେଦୀ ଶୁକ୍ରବାର ନାଗରିକତା ସଂଶୋଧନ ଆଇନକୁ ନେଇ ଆଲୋଚନା କରିଛନ୍ତି। ଆଗକୁ ପଢନ୍ତୁ...

ଗାନ୍ଧୀନଗର: ଗୁଜୁରାଟ ବିଧାନସଭା ବାଚସ୍ପତି ରାଜେନ୍ଦ୍ର ତ୍ରିବେଦୀ ଶୁକ୍ରବାର ନାଗରିକତା ସଂଶୋଧନ ଆଇନ ପ୍ରସଙ୍ଗରେ ଆଲୋଚନା କରିଛନ୍ତି। ଏହା ମଧ୍ୟରେ ସେ କଂଗ୍ରେସ ବିଧାୟକ ଇମରାନ ଖେଡୱାଲାଙ୍କୁ ବିଧାନସଭାରେ ଅନୁଶାସନ ରଖିବା ପାଇଁ କହିଥିଲେ ଓ ଆପଣ ପାକିସ୍ତାନରେ ନାହାଁନ୍ତି ବୋଲି କଟାକ୍ଷ କରିଥିଲେ।

ନାଗରିକତା ସଂଶୋଧନ ଆଇନ ଭଳି ଐତିହାସିକ ସଂଶୋଧନ ଆଣିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଗୃହମନ୍ତ୍ରୀ ଅମିତ ଶାହାଙ୍କ ପ୍ରଂଶାସା କରାଯାଇଥିଲା। ଏହି ସମୟରେ କଂଗ୍ରେସ ବିଧାୟକ ଏକ ପୋଷ୍ଟର ଧରି ଏହାକୁ ବିରୋଧ କରିଥିଲେ । ପୋଷ୍ଟରରେ ରକ୍ତରେ ସିଏଏ, ଏନଆରସି, ଏନପିଆରକୁ ବହିସ୍କାର କର ବୋଲି ଲେଖାଯାଇଥିଲା।

ଏହାକୁ ନେଇ ରାଜେନ୍ଦ୍ର ତ୍ରିବେଦୀ ପାକିସ୍ତାନରେ ଆପଣ ନାହାଁନ୍ତି ବୋଲି କଂଗ୍ରେସ ବିଧାୟକଙ୍କ ଉଦ୍ଦେଶ୍ୟରେ କହିଥିଲେ। ବିଧାୟକ ଓ କଂଗ୍ରେସ ଅଧ୍ୟକ୍ଷ ଅମିତ ଚାୱଡା ଏହାକୁ ବିରୋଧ କରି ଏପରି କରିବା ଉଚିତ୍ ନୁହେଁ ବୋଲି କହିଛନ୍ତି। ଅନ୍ୟପକ୍ଷେ ରାଜେନ୍ଦ୍ର ତ୍ରିବେଦୀ ଏଥିପାଇଁ କ୍ଷମା ମାଗିବା ପାଇଁ ମଧ୍ୟ ପ୍ରସ୍ତୁତ ଅଛନ୍ତି ବୋଲି ସେ କହିଥିଲେ।