ବୃକ୍ଷରୋପଣ ପାଇଁ ମୋଦିଙ୍କ ଆହ୍ବାନ, ଦେଖନ୍ତୁ ଭିଡିଓ

ବିଶ୍ବ ପରିବେଶ ଦିବସ ଅବସରରେ ଆଜି ସାରା ଦେଶ ବୃକ୍ଷରୋପଣ କରୁଥିବାବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏହି ଦିବସକୁ ନେଇ ଗୋଟିଏ ଭିଡିଓ ମାଧ୍ୟମରେ ସାରା ଦେଶକୁ ପ୍ରୋତ୍ସାହିତ କରିବା ସହ ଦେଇଛନ୍ତି ସୁନ୍ଦର ବାର୍ତ୍ତା।

ନୂଆଦିଲ୍ଲୀ: ବିଶ୍ବ ପରିବେଶ ଦିବସ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶର ଜନତାଙ୍କୁ ଅଧିକରୁ ଅଧିକ ବୃକ୍ଷରୋପଣ କରି ଉତ୍ତମ ଭବିଷ୍ୟ ଗଢି ତୋଳିବାକୁ ଆହ୍ବାନ ଦେଇଛନ୍ତି । ଖାଲି ସେତିକି ନୁହେଁ ବରଂ ପୃଥିବୀ ଗ୍ରହକୁ ଅଧିକ ସ୍ବଚ୍ଛ ଓ ସବୁଜିମା କରିବାର ଉପାୟ ମଧ୍ୟ ଖୋଜିବାକୁ କହିଛନ୍ତି ।

ପ୍ରଧାନମନ୍ତ୍ରୀ ଟ୍ବିଟର ଆକାଉଣ୍ଟରେ ଗୋଟିଏ ଭିଡିଓ ମାଧ୍ୟମରେ କହିଛନ୍ତି, ‘ଆମେ ଏମିତି ଏକ ପରିବେଶରେ ଜନ୍ମ ହୋଇଛେ ଯେଉଁଠି ପ୍ରକୃତିକୁ ଇଶ୍ବର କୁହାଯାଏ । ତେଣୁ ଆମେମାନେ ଏହି ଗ୍ରହକୁ ଅଧିକ ସ୍ବଚ୍ଛ ଓ ସବୁଜ କରିବାର ଉପାୟ ଭାବିବା ଜରୁରୀ । ଆଗକୁ ବର୍ଷା ଋତୁ ଆସୁଥିବାରୁ ଆପଣମାନେ ବହୁତ ପରିମାଣରେ ଗଛ ଲଗାଇ ଏହାର ଦେଖାରଖା କରିବା ବ୍ୟବସ୍ଥା ମଧ୍ୟ କରନ୍ତୁ । ଯଦ୍ବାରା ଆଗାମୀ ବର୍ଷମାନଙ୍କରେ ଏହା ଖୁବ ଭଲରେ ବଢୁ । ଆମେ ସମସ୍ତେ ନିଜକୁ ପରିବେଶ ସହ ଜଡିତ ରଖିବା ଆବଶ୍ୟକ ।’

ତେବେ ସେହି ଭିଡିଓର ଶୀର୍ଷକରେ ସେ ଲେଖିଛନ୍ତି, ଆମ ଗ୍ରହ ଓ ପରିବେଶ ଏମିତି କିଛି ଯାହାକୁ ଆମେ ଖୁବ ଭଲ ପାଉ । ଆଜି ବିଶ୍ବ ପରିବେଶ ଦିବସ ଅବସରରେ ଆମେ ଗୋଟିଏ ସ୍ବଚ୍ଛ ଓ ସବୁଜ ଗ୍ରହ ସୁନିଶ୍ଚିତ କରିବା ପାଇଁ ପୁଣି ସଂକଳ୍ପବଦ୍ଧ ହେବା ।

ପ୍ରକାଶ ଥାଉକି, ଗତକାଲି କେନ୍ଦ୍ର ସରକାର ବୃକ୍ଷରୋପଣକୁ ପ୍ରୋତ୍ସାହିତ କରିବା ପାଇଁ #selfiewithsapling(ବୃକ୍ଷ ସହ ସେଲଫି)ର ଟ୍ରେଣ୍ଡ ଆରମ୍ଭ କରିଛନ୍ତି । କେନ୍ଦ୍ରମନ୍ତ୍ରୀ ପ୍ରକାଶ ଜାଭେଦକର ବୃକ୍ଷରୋପଣ କରିବା ସହ ସେଲଫି ନେଇ #selfiewithsapling ଲେଖି ମାଇକ୍ରୋ ବ୍ଲଗିଂ ସାଇଟରେ ପୋଷ୍ଟ କରିବାକୁ କହିଛନ୍ତି ।