ନୂଆଦିଲ୍ଲୀ: କୋରୋନା ମୁକାବିଲା ପାଇଁ ଉପରାଷ୍ଟ୍ରପତି ଭେଙ୍କେୟା ନାଇଡୁ ରାଜ୍ୟସଭା ସଦସ୍ୟମାନଙ୍କୁ ଗୋଟିଏ ମାସର ଦରମା ଦେବାକୁ ଅପିଲ କରିଛନ୍ତି । ଏହା ଦ୍ବାରା କୋରୋନା ମୁକାବିଲା କରିବାରେ ସରକାରଙ୍କୁ ସହଯୋଗ କରିହେବ ବୋଲି ସେ ଟ୍ବିଟରରେ ଉଲ୍ଲେଖ କରିଛନ୍ତି ।
ଉପରାଷ୍ଟ୍ରପତି କହିଛନ୍ତି, ‘କୋରୋନା ପ୍ରସାରକୁ ରୋକିବାରେ ସରକାରଙ୍କ ଉଦ୍ୟମକୁ ଅଧିକ ଦୃଢ କରିବା ପାଇଁ ମୁଁ ରାଜ୍ୟସଭାର ସମସ୍ତ ସଦସ୍ୟଙ୍କୁ ପ୍ରଧାନମନ୍ତ୍ରୀ କେୟାର୍ସ ଫଣ୍ଡରେ ଏକ ମାସର ଦରମା ପ୍ରଦାନ କରିବାକୁ ନିବେଦନ କରୁଛି । ’
କୋରୋନା ମୁକାବିଲା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରଧାନମନ୍ତ୍ରୀ କେୟାର ଫଣ୍ଡ ଘୋଷଣା କରିଛନ୍ତି । ଫଣ୍ଡକୁ ସହାୟତା ପ୍ରଦାନ କରିବା ପାଇଁ ଦେଶର ବିଭିନ୍ନ ବର୍ଗର ଲୋକଙ୍କୁ ନିବେଦନ କରିଛନ୍ତି । ଏପରିକି ଦେଶର ଅନେକ ରାଜନେତା, ଅଭିନେତା, ଶିଳ୍ପପତି ଓ ସାଧାରଣ ଜନତା ଏହି ପାଣ୍ଠିକୁ ସହାୟତା ପ୍ରଦାନ କରୁଥିବା ଦେଖିବାକୁ ମିଳିଛି ।
ରବିବାର ସୁଦ୍ଧା ଭାରତରେ 979 ଜଣ କୋରୋନା ପଜିଟିଭ ରହିଛନ୍ତି । ସେହିପରି କୋରୋନାରେ 25 ଜଣଙ୍କ ମୃତ୍ୟୁ ହୋଇଛି । ଏହା ସହ ଗତ 24 ଘଣ୍ଟା ମଧ୍ୟରେ 106ଟି ନୂଆ ପଜିଟିଭ ଚିହ୍ନଟ କରାଯାଇଥିବା ବେଳେ 6 ଜଣଙ୍କ ମୃତ୍ୟୁ ହୋଇଥିବା ନେଇ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି ।
@ANI
