ପଶୁ ଡାକ୍ତରାଣୀ ହତ୍ୟାକାଣ୍ଡର ପର୍ଦ୍ଦାଫାଶ, ସାହାଯ୍ୟ ଆଳରେ ଦୁଷ୍କର୍ମ କରିଥିଲେ 4

ରାତିରେ ଶୂନଶାନ ରାସ୍ତାରେ ଖରାପ ହେଉଛି ମହିଳା ଡାକ୍ତରଙ୍କ ସ୍କୁଟି। ସକାଳୁ ମିଳୁଛି ତାଙ୍କର ଅର୍ଦ୍ଧଦଗ୍ଧ ମୃତଦେହ। ଆଉ ଏ ଘଟଣାରେ ସମ୍ପୃକ୍ତ 4 ଅଭିଯୁକ୍ତଙ୍କୁ ଗିରଫ କରିଛି ପୋଲିସ। ଆଗକୁ ପଢନ୍ତୁ...

ହାଇଦ୍ରାବାଦ: ହାଇଦ୍ରାବାଦର ବାହ୍ୟ ଅଞ୍ଚଳ ଶାଦନଗରର ଅଣ୍ଡରପାସ ନିକଟରୁ ମିଳିଥିବା ପଶୁ ଡାକ୍ତରାଣୀ ହତ୍ୟାକାଣ୍ଡ ଘଟଣାର ପର୍ଦ୍ଦାଫାଶ । ଆଉ ଏ ଘଟଣାରେ ସମ୍ପୃକ୍ତ 4 ଅଭିଯୁକ୍ତକୁ ଗିରଫ କରିଛି ପୋଲିସ ।

ବୁଧବାର ସକାଳୁ କୋଲ୍ଲୁର ସ୍ଥିତ ପଶୁ ଚିକିତ୍ସାଳୟ ଯାଇଥିଲେ ମୃତ ପଶୁ ଡାକ୍ତରାଣୀ । ଏହାପରେ ସ୍କୁଟିକୁ ଟୋଲ ପ୍ଲାଜା ନିକଟରେ ପାର୍କ କରିଥିଲେ । ହେଲେ ଫେରିବା ବେଳକୁ ତାଙ୍କ ସ୍କୁଟି ପଂଚର ହୋଇଯାଇଥିଲା । ସେ ନିଜ ଭଉଣୀଙ୍କୁ ଏନେଇ ଜଣାଇଥିଲେ । ସ୍କୁଟି ସେଠାରେ ଛାଡି ଘରକୁ ଫେରିଆସିବା ପାଇଁ ତାଙ୍କ ଉଭଣୀ ପରାମର୍ଶ ଦେଇଥିଲେ । ହେଲେ କିଛି ଲୋକ ତାଙ୍କୁ ସାହାଯ୍ୟର ହାତ ବଢେଇଛନ୍ତି କହି ଫୋନ କାଟି ଦେଇଥିଲେ ସେ ।

ଏହା ପରଠାରୁ ମହିଳା ଡାକ୍ତରଙ୍କ ଫୋନ ବନ୍ଦ ହୋଇଯାଇଥିଲା । ଏହାପରେ ପରିବାର ଲୋକେ ଖୋଜାଖୋଜି ଆରମ୍ଭ କରିଥିଲେ। କିନ୍ତୁ ସେ ମିଳିନଥିଲେ। ସକାଳୁ ଶାଦନଗର ନିକଟରେ ତାଙ୍କର ମୃତଦେହ ମିଳିଥିଲା। ଦୁର୍ବୃତ୍ତ ଦୁଷ୍କର୍ମ ପରେ ତାଙ୍କୁ ଜଳାଇ ଦେଇଥିବା ସନ୍ଦେହ କରୁଛି ପୋଲିସ । ବର୍ତ୍ତମାନ ଏହି ଘଟଣାର ଅଧିକ ତଦନ୍ତ କରୁଛି ପୋଲିସ ।

ଏପଟେ ଏଭଳି ଛାତିଥରା ଘଟଣା ସହରର ମହିଳାଙ୍କ ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଘଟଣାଟି ସାମ୍ନାକୁ ଆସିବା ପରେ ତାଙ୍କୁ ନ୍ୟାୟ ଦେବା ପାଇଁ ସୋସିଆଲ ମିଡିଆରେ ଅନୁରୋଧ କରୁଛନ୍ତି ୟୁଜର୍ସ।