ଲକ୍ଷ୍ନୌ: ଉତ୍ତର ପ୍ରଦେଶରେ କ୍ଷମତାସୀନ ଥିବା ବିଜେପି ନେତୃତ୍ବାଧିନ ମେଣ୍ଟ ସରକାରକୁ ଲାଗିବାକୁ ଯାଉଛି ଜୋରଦାର ଝଟକା । ଯୁପି ସରକାରଙ୍କ ଅଧିନରେ ମନ୍ତ୍ରୀ ଥିବା ସୁହଲଦେବ ଭାରତୀୟ ସମାଜ ପାର୍ଟି (ଏସବିଏସପି) ର ସୁପ୍ରିମୋ ଓମ୍ ପ୍ରକାଶ ରାଜଭର । ଆସନ୍ତା 13 ତାରିଖରେ ଇସ୍ତଫା ଦେବା ନେଇ ଘୋଷଣା କରିଛନ୍ତି ସେ ।
ଚଳିତ ଲୋକସଭା ନିର୍ବାଚନରେ ଆସନ ଭାଗବଣ୍ଟାକୁ ନେଇ ଦେଖା ଦେଇଥିବା ଅସୁବିଧା ଯୋଗୁଁ ସେ ଏପରି ନିଷ୍ପତ୍ତି ନେଇଥିବା କୁହାଯାଇଛି । ଏନେଇ ପ୍ରତିକ୍ରିୟା ରଖି ଏସବିଏସପିର ସୁପ୍ରିମୋ ଓମ୍ ପ୍ରକାଶ ରାଜଭର କହିଛନ୍ତି, " ମୋ ଦଳର ଦଳୀୟ ସଙ୍କେତରେ ନିର୍ବାଚନ ଲଢିବା ପାଇଁ ମୁଁ ଚାହୁଁଥିଲି । ମାତ୍ର ସେମାନେ ମୋ ପ୍ରସ୍ତାବରେ ରାଜି ହୋଇନଥିଲେ । ମୋତେ ବିଜେପିର ଦଳୀୟ ସଙ୍କେତରେ ନିର୍ବାଚନ ଲଢିବା ପାଇଁ କୁହାଯାଇଥିଲା। "
ଗତ 2017ରେ ହୋଇଥିବା ଉତ୍ତର ପ୍ରଦେଶ ବିଧାନସଭା ନିର୍ବାଚନରେ ମେଣ୍ଟ ହୋଇ ନିର୍ବାଚନ ଲଢିଥିଲେ ଉଭୟ ବିଜେପି ଏବଂ ଏସବିଏସପି । ୟୁପିର ଶାସନ ଗାଦି ସମ୍ଭାଳୁଥିବା ଯୋଗୀ ଆଦିତ୍ୟନାଥ ସରକାରରେ ଏବେ ପଛୁଆ ବର୍ଗ କଲ୍ୟାଣ ବିକାଶ ମନ୍ତ୍ରୀ ଅଛନ୍ତି ଓମ ପ୍ରକାଶ ରାଜଭର ।
ବିଜେପିକୁ କଟାକ୍ଷ କରି ସେ କହିଛନ୍ତି, " ଚଳିତ ଲୋକସଭା ନିର୍ବାଚନ ପ୍ରଚାର ବେଳେ ବିଜେପି ମୋର ନାଁ କୁ ବ୍ୟବହାର କରିଥିଲା । ଏପରିକି ରୋଡ ଶୋ ବେଳେ ସେମାନେ ମୋର ଫଟୋ କୁ ବ୍ୟବହାର କରିଥିଲେ । ଏନେଇ ମୁଁ ନିର୍ବାଚନ କମିଶନଙ୍କ (ଇସି) ଦୃଷ୍ଟି ଆକର୍ଷଣ କରିଥିଲି । ମାତ୍ର ଇସି କାର୍ଯ୍ୟାନୁଷ୍ଠାନ ନେବା ବଦଳରେ ସେମାନଙ୍କ ପାଇଁ କାମ କରୁଛନ୍ତି । "
2019 ଲୋକସଭା ନିର୍ବାଚନରେ ବିଜେପି ସହ ମେଣ୍ଟ କରିବାକୁ ମୁଁ ଆଗ୍ରହୀ ଥିଲି । ଏଥିପାଇଁ ଦୀର୍ଘ ଦିନ ଧରି ଅପେକ୍ଷା କରି ରହିଥିଲି । ବିଜେପିର ଦଳୀୟ ସଙ୍କେତରେ ନିର୍ବାଚନ ଲଢିବାକୁ ମୋତେ କୁହାଯାଇଥିଲା । ହେଲେ ମୁଁ ନିର୍ବାଚନ ଲଢିବାକୁ ମନା କରି ଦେଇଥିଲି ।
