ଅଭିଶପ୍ତ ପ୍ରେମୀ ଯୁଗଳ, ପ୍ରକୃତିର ନିୟମ ଆଗରେ ଅଟକିଲା ବିବାହ

ପ୍ରଥମେ ନିପା, ପରେ ବନ୍ୟା ଓ ଏବେ କୋରୋନା । ପ୍ରତି ଥର ବିବାହର ନିର୍ଦ୍ଧାରିତ ତାରିଖ ବେଳେ ପ୍ରକୃତି ସାଧୁଛି ଦାଉ । ପଢନ୍ତୁ ସମ୍ପୂର୍ଣ୍ଣ ଖବର..

ଥିରୁଅନନ୍ତପୁରମ: ପ୍ରକୃତିର ନିୟମ ପାଇଁ ତିନି ତିନି ଥର ବନ୍ଧା ପଡିଛି ଦାମ୍ପତ୍ତ୍ୟ ଖୁସି । ପ୍ରଥମେ ନିପା, ପରେ ବନ୍ୟା ଓ ଏବେ କୋରୋନା । ପ୍ରତି ଥର ବିବାହର ନିର୍ଦ୍ଧାରିତ ତାରିଖ ବେଳେ ପ୍ରକୃତି ସାଧୁଛି ଦାଉ । ଆଉ ସ୍ଥଗିତ ରହିଯାଉଛି ଛୁଆ ବେଳ ବନ୍ଧୁଙ୍କ ବିବାହ । ଏ ହେଉଛନ୍ତି କେରଳର ଏରାନିପଲାମର ଏକ ପ୍ରେମୀ ଦମ୍ପତ୍ତିଙ୍କ କଥା । ଛୁଆ ବେଳର ବନ୍ଧୁ ଏବେ ବିବାହ ବନ୍ଧନରେ ଆବଦ୍ଧ ହେବା ପାଇଁ ପ୍ରସ୍ତୁତ । ସମସ୍ତ ପ୍ରସ୍ତୁତି ବି ଶେଷ । ହେଲେ ଠିକ୍‌ ବିବାହ ବେଳକୁ ମାଡି ଆସୁଛି ପ୍ରକୃତିର କରାଳ ରୂପ ।

ପ୍ରଥମେ 20 ମାର୍ଚ୍ଚ 2018ରେ ଉଭୟଙ୍କ ବିବାହ ତାରିଖ ନିର୍ଦ୍ଧାରିତ ହୋଇଥିଲା । ହେଲେ ଠିକ୍‌ ଏହି ସମୟରେ କେରଳରେ ନିପା ଭୂତାଣୁ ସଂକ୍ରମଣରେ 17 ଜଣଙ୍କ ମୃତ୍ୟୁ ପରେ ଅଟକିଗଲା ବିବାହ । ଏହାପରେ ନିପା ଭୂତାଣୁ ପ୍ରକୋପ କମିବା ପରେ ପୁନର୍ବାର ବିବାହ ତାରିଖ ନିର୍ଦ୍ଧାରଣ କରିବାର ପରିବାର ଲୋକେ ସ୍ଥିର କରିଥିଲେ ହେଁ ବର ପକ୍ଷରୁ ଜଣେ ବନ୍ଧୁଙ୍କ ବିୟୋଗ ପରେ ପୁଣି ବର୍ଷେ ଯାଏଁ ଘୁଞ୍ଚିଥିଲା ବିବାହ ।

ପରେ 2019 ମସିହାରେ ଓନମ ସମୟରେ ବିବାହ ତାରିଖ ପୁନଃନିର୍ଦ୍ଧାରଣ ହୋଇଥିବା ବେଳେ ଆସିଥିଲା ପ୍ରଳୟଙ୍କରୀ ବନ୍ୟା । ପୁଣି ଥରେ ଅଟକିଗଲା ବିବାହ । ଆଉ ଚଳିତବର୍ଷ ମାର୍ଚ୍ଚ 20କୁ ପୁଣି ହେଲା ତାରିଖ ନିର୍ଦ୍ଧାରଣ । ହେଲେ ବିଧିର ବିଧାନ ଏତେ କ୍ରୁର ଯେ ଏଥର ପୁଣି ମାଡି ଆସିଲା କୋରୋନା ଭୂତାଣୁର ସଂକ୍ରମଣ । ବର୍ତ୍ତମାନ ଦେଶରେ ସମସ୍ତ ଜନ ସମାଗମକୁ ବ୍ୟାନ୍‌ କରାଯାଇଥିବା ବେଳେ 3ୟ ଥର ପାଇଁ ଅଟକିଛି ପ୍ରେମୀ ଯୁଗଳଙ୍କ ବିବାହ ।