ପୁଣେ: ପୁଲଓ୍ବାମାରେ ହୋଇଥିବା ଲୋମହର୍ଷଣକାରୀ ଆତ୍ମଘାତୀ ବିସ୍ଫୋରଣରେ 40 ଜଣ ଯବାନଙ୍କୁ ହରାଇଥିଲା ଦେଶ । ତେବେ ଏଥିରେ ଶହୀଦ ହୋଇଥିବା ଯବାନଙ୍କୁ ଶ୍ରଦ୍ଧାଞ୍ଜଳି ଦେବା ପାଇଁ ଜଣେ କଳାକାର ନିଆରା ପ୍ରୟାସ ଆରମ୍ଭ କରିଛନ୍ତି । ଶହୀଦଙ୍କ ଘର ଘର ବୁଲି ସେମାନଙ୍କ ପରିବାରକୁ ସାକ୍ଷାତ କରି ତାଙ୍କ ଘରର ମାଟି ଆଣି ଏକ ପାତ୍ରରେ ରଖୁଛନ୍ତି ।
ଉକ୍ତ ବ୍ୟକ୍ତି ଜଣକ ହେଲେ କର୍ଣ୍ଣାଟକ ମଣ୍ଡୟା ଜିଲ୍ଲାର ଉମେଶ ଗୋପୀନାଥ ଯାଦବ। ସେ ପେଷାରେ ଜଣେ ସଙ୍ଗୀତକାର ଅଟନ୍ତି। ଉମେଶଙ୍କ କହିବାନୂଯାୟୀ, ପୁଲଓ୍ବାମା ଆକ୍ରମଣକୁ ବର୍ଷେ ପୂରିଲେ ସଂଗ୍ରହ କରିଥିବା ମାଟିରେ ଭାରତର ମାନଚିତ୍ର ସେଥିରେ ତିଆରି କରିବେ । ତେବେ ଉମେଶ ବ୍ୟବହାର କରୁଥିବା କାରରେ ଲେଖିଛନ୍ତି ଯେ, ଶହୀଦ ମାନଙ୍କ ପରିବାର ସହ ସମସ୍ତେ ଠିଆ ହୁଅ ଆଉ ଦେଶର ଯବାନଙ୍କୁ ସମର୍ଥନ କର । ଆଉ କାର ସାରା ମଧ୍ୟ ସେ ତ୍ରିରଙ୍ଗା ସହ ଦେଶ ଭକ୍ତି ସହ ଜଡିତ ଅନେକ ଫଟୋ ଲଗାଇଛନ୍ତି ।
ଏଠାରେ ସୂଚନାଯୋଗ୍ୟ ଯେ, 2019 ଫେବୃଆରୀ 14ରେ ଜମ୍ମୁ-କଶ୍ମୀରର ପୁଲଓ୍ବାମାରେ ସିଆରପିଏଫ ଯବାନଙ୍କୁ ଆତଙ୍କବାଦୀ ମାନେ ଆତ୍ମଘାତୀ ଆକ୍ରମଣ କରିଥିଲେ । ଯେଉଁଥିରେ 40 ଜଣ ଯବାନ ଶହୀଦ ହୋଇଥିଲେ । ଏହାପରେ ପାଲଟା ଜବାବ ଦେବାକୁ ଯାଇ ଭାରତ 26 ଫେବୃଆରୀରେ ଏୟାରଷ୍ଟ୍ରାଇକ କରିଥିଲା । ଯେଉଁଥିରେ ଜୈସ-ଏ-ମହମ୍ମଦର ସଂଗଠନର ଆତଙ୍କୀ କ୍ୟାମ୍ପ ସମ୍ପୂର୍ଣ୍ଣ ନଷ୍ଟ ହୋଇଯାଇଥିଲା ।