ଦିଲ୍ଲୀ ହିଂସାର ମୁଖ୍ୟ ଆରୋପୀ ଉମର ଖାଲିଦ ନାଁରେ ଉପା ଅଧିନରେ ମାମଲା ରୁଜୁ

ଜବାହରଲାଲ ନେହେରୁ ବିଶ୍ବବିଦ୍ୟାଳୟର ପୂର୍ବତନ ଛାତ୍ର ଉମର ଖାଲିଦ ଏବଂ ଜାମିଆର ଦୁଇ ଛାତ୍ରଙ୍କ ବିରୋଧରେ ବେଆଇନ କାର୍ଯ୍ୟକଳାପ ଅଧିନିୟମ (UAPA) ଅଧୀନରେ ମାମଲା ରୁଜୁ କରାଯାଇଛି । ଅଧିକ ପଢ଼ନ୍ତୁ...

ନୂଆଦିଲ୍ଲୀ: ଚଳିତ ବର୍ଷ ଫେବୃଆରୀରେ ରାଜଧାନୀ ଦିଲ୍ଲୀର ଉତ୍ତର-ପୂର୍ବ ଅଞ୍ଚଳରେ ହିଂସାକାଣ୍ଡ ଘଟିଥିଲା । ଏହି ଘଟଣାରେ ପୋଲିସ ଜବାହରଲାଲ ନେହେରୁ ବିଶ୍ବବିଦ୍ୟାଳୟର ପୂର୍ବତନ ଛାତ୍ର ଉମର ଖାଲିଦ ଏବଂ ଜାମିଆର ଦୁଇ ଛାତ୍ରଙ୍କ ବିରୋଧରେ ବେଆଇନ କାର୍ଯ୍ୟକଳାପ ଅଧିନିୟମ (UAPA) ଅଧୀନରେ ମାମଲା ରୁଜୁ କରାଯାଇଥିବା ସୂଚନା ମିଳିଛି ।

ଫେବୃଆରୀରେ ନାଗରିକତା ସଂଶୋଧନ ଅଧିନିୟମକୁ ସମର୍ଥନ କରୁଥିବା ଏବଂ ଏହାକୁ ବିରୋଧ କରୁଥିବା ଲୋକଙ୍କ ମଧ୍ୟରେ ବ୍ୟାପକ ହିଂସା ନିୟନ୍ତ୍ରଣ ବାହାରକୁ ଚାଲିଯାଇଥିଲା । ଏଥିରେ 53 ଜଣଙ୍କର ମୃତ୍ୟୁ ଘଟିଥିବା ବେଳେ ବହୁ ଲୋକ ଆହତ ହୋଇଥିଲେ । ଦୁଇ ଜଣ ଜାମିଆ ଛାତ୍ର - ଜାମିଆ ସମନ୍ବୟ ସମିତିର ମିଡିଆ ସଂଯୋଜକ ସଫୋରା ଜାରଗର୍ ଏବଂ ସଦସ୍ୟ ମେରାନ୍ ହାଇଦରଙ୍କୁ ଏହି ମାମଲାରେ ପୋଲିସ ଚଳିତ ମାସ ଆରମ୍ଭରେ ଗିରଫ କରିଥିଲା । ଉମର ଖାଲିଦଙ୍କୁ ଏପର୍ଯ୍ୟନ୍ତ ଗିରଫ କରାଯାଇ ପାରିନାହିଁ ।

ମେରାନଙ୍କ ଓକିଲ ଆକ୍ରାମ ଖାନ କହିଛନ୍ତି ଯେ, ‘ଏହି ମାମଲା ଅତି କମରେ ନଅ ଜଣଙ୍କ ନାଁ ରେ ରୁଜୁ କରାଯାଇଛି । ଯେଉଁଥିରେ ହତ୍ୟା ଅଭିଯୋଗ ବ୍ୟତୀତ ଦେଶଦ୍ରୋହ, UAPAକୁ ମଧ୍ୟ ଯୋଡାଯାଇଛି । ଉମର ଖାଲିଦ ଏହି ମାମଲାରେ ମଧ୍ୟ ସାମିଲ ଅଛନ୍ତି’ । ସେ ଆହୁରି ମଧ୍ୟ କହିଛନ୍ତି ଯେ, ପୂର୍ବରୁ ଏହି ମାମଲା କ୍ରାଇମ ବ୍ରାଞ୍ଚରେ ଥିଲା, କିନ୍ତୁ ପରେ ଏହା ସ୍ପେଶାଲ ସେଲକୁ ସ୍ଥାନାନ୍ତରିତ ହୋଇଥିଲା ।