ସୁରକ୍ଷାକର୍ମୀଙ୍କୁ ବଡ ସଫଳତା, ଦକ୍ଷିଣ କାଶ୍ମୀରରୁ 2 ଆତଙ୍କବାଦୀ ଗିରଫ

ଜମ୍ମୁ-କାଶ୍ମୀର ଅନନ୍ତନାଗର ବନପୋହ ଅଞ୍ଚଳରୁ 2 ଜଣ ଆତଙ୍କବାଦୀଙ୍କୁ ଗିରଫ କରାଯାଇଛି। ସେମାନଙ୍କ ମଧ୍ୟରୁ ଜଣେ ହିଜବୁଲର ଟପ୍‌ ଆତଙ୍କବାଦୀଙ୍କ ମଧ୍ୟରେ ଗଣା ହେଉଥିବା ନବୀଦ ବାବୁ ବୋଲି ଜଣାପଡିଛି।

ଶ୍ରୀନଗର: ଦକ୍ଷିଣ କାଶ୍ମୀରର ବନପୋହ ଅଞ୍ଚଳରେ ଶନିବାର ସୁରକ୍ଷାକର୍ମୀଙ୍କୁ ମିଳିଛି ବଡ ସଫଳତା। ଜମ୍ମୁ-କାଶ୍ମୀର ଅନନ୍ତନାଗର ବନପୋହ ଅଞ୍ଚଳରୁ 2 ଜଣ ଆତଙ୍କବାଦୀଙ୍କୁ ଗିରଫ କରାଯାଇଛି । ଏହି ଅଞ୍ଚଳରେ କିଛି ଆତଙ୍କବାଦୀ ଲୁଚି ରହିଥିବା ସୁରକ୍ଷାକର୍ମୀଙ୍କୁ ଖବର ମିଳିଥିଲା।

ଏହି ସୂଚନା ଆଧାରରେ ପୋଲିସ ଏବଂ ସୁରକ୍ଷାକର୍ମୀ ମିଳିତ ଭାବରେ ଅପରେଶନ ଆରମ୍ଭ କରିଥିଲେ। ଏହି ସମୟରେ ଶ୍ରୀନଗର-ଜମ୍ମୁଜ ଜାତୀୟ ରାଜପଥରୁ ଏହି 2 ଆତଙ୍କବାଦୀଙ୍କୁ ଗିରଫ କରାଯାଇଥିଲା। ସେମାନଙ୍କ ମଧ୍ୟରୁ ଜଣେ ହିଜବୁଲର ଟପ୍‌ ଆତଙ୍କବାଦୀଙ୍କ ମଧ୍ୟରେ ଗଣା ହେଉଥିବା ନବୀଦ ବାବୁ ବୋଲି ଜଣାପଡିଛି। ନବୀଦ ସୋପିଆନରେ ଟ୍ରକ ଚାଳକଙ୍କ ଉପରେ ହୋଇଥିବା ଆକ୍ରମଣରେ ସାମିଲ ଥିଲା।

ଆତଙ୍କବାଦୀ ନବୀଦର ଘର ସୋପିଆନରେ । 2017 ମସିହାରେ ସେ ଆତଙ୍କବାଦୀ ସଙ୍ଗଠନରେ ସାମିଲ ହେବା ପରେ ସକ୍ରିୟ ରହୁଥିଲା। ସେ ଲଗାତାର ଘାଟିରେ ବଡ ଧରଣର ଆକ୍ରମଣ ଷଡଯନ୍ତ୍ର ରଚୁଥିଲା। ଗତବର୍ଷ ତାର ଏକ ଭିଡିଓ ଭାଇରାଲ ହୋଇଥିଲା, ଯେଉଁଥିରେ ସେ ଆଇଇଡି ପ୍ରସ୍ତୁତ କରୁଥିବାର ନଜର ଆସିଥିଲା।