ଟ୍ରମ୍ପଙ୍କ ପାଇଁ ବିଶାଳ ରୋଡ ଶୋ’, ସାମିଲ ହେବେ ଲକ୍ଷେ ଲୋକ

ଟ୍ରମ୍ପଙ୍କ ସ୍ବାଗତ ପାଇଁ ବିଶାଳ ରୋଡ ଶୋ’ର ଆୟୋଜନ କରାଯାଇଛି । ଯେଉଁଥିରେ ଲକ୍ଷେରୁ ଊର୍ଦ୍ଧ୍ବ ଲୋକେ ସାମିଲ ହେବେ । ସେହିପରି ଏହି ମେଗା ଶୋ’ରେ ବିଭିନ୍ନ ରାଜ୍ୟର ସଂସ୍କୃତିକ ଝଲକ୍ ଦେଖିବାକୁ ମିଳିବ ।

ଗାନ୍ଧୀନଗର: ଭାରତ ଗସ୍ତରେ ଆସୁଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଦୁଇ ଦିନିଆ ଭାରତ ଗସ୍ତରେ ଟ୍ରମ୍ପ ଯୋଗ ଦେବେ ସବୁଠୁ ବଡ ମେଗା ରୋଡ ଶୋ’ରେ । ଟ୍ରମ୍ପଙ୍କ ସ୍ବାଗତ ପାଇଁ ଗୁଜୁରାଟରେ ଆୟୋଜିତ ହେଉଛି 2ଟି ବିଶାଳ ରୋଡ ଶୋ’ । ଦୀର୍ଘ 22 କିଲୋମିଟର ବିଶିଷ୍ଟ ଏହି ରୋଡ ଶୋ’ 2 ଭାଗରେ ବିଭକ୍ତ କରିଛି ପ୍ରଶାସନ ।

ଏୟାରପୋର୍ଟ ଠାରୁ ଗାନ୍ଧୀଆଶ୍ରମ ଯାଏଁ ଶୋଭାଯାତ୍ରାର ନାଁ ‘ଇଣ୍ଡିଆ ଶୋ’ ରଖାଯାଇଥିବା ବେଳେ ଗାନ୍ଧୀଆଶ୍ରମ ଠୁ ଇନ୍ଦିରା ବ୍ରିଜ ପର୍ଯ୍ୟନ୍ତ ହେବାକୁ ଥିବା ରାଲି ନାଁ ‘ବିବିଧତା ମଧ୍ୟରେ ଏକତା’ ରଖାଯାଇଛି । ସେହିପରି ଇଣ୍ଡିଆ ଶୋ’ରେ 28ଟି ରାଜ୍ୟର ସଂସ୍କୃତିକ ଝଲକ ପ୍ରଦର୍ଶନ କରାଯିବାକୁ ଥିବାବେଳେ ବିବିଧତା ମଧ୍ୟରେ ଏକତା ରୋଡ ଶୋ‘ରେ ବିଭିନ୍ନ ଧର୍ମ ଓ ସଂପ୍ରଦାୟ ସହିତ ଜଡିତ ଥିବା ଲୋକେ ଅଶଂଗ୍ରହଣ କରିବେ । ଏହାକୁ ଦୃଷ୍ଟିରେ ରଖି ବିଭିନ୍ନ କାର୍ଯ୍ୟକ୍ରମ ହାତକୁ ନେଇଛି ପ୍ରଶାସନ । ଆଉ ଏହି ରୋଡ ଶୋ’ରେ ଲକ୍ଷେରୁ ଊର୍ଦ୍ଧ୍ବ ଲୋକେ ସାମିଲ ହେବାର ବ୍ୟବସ୍ଥା କରାଯାଇଛି ।