ଡୁଙ୍ଗରପୁର: ହାତରେ ଧନୁତୀର, ଆଉ ଆଖି ଲକ୍ଷ୍ୟ ଉପରେ... ଆଦିବାସୀ ବହୁଳ ଡୁଙ୍ଗରପୁର ଜିଲ୍ଲାର ବିଲଡି ଗାଁ...ଧନୁର୍ଦ୍ଧାରୀଙ୍କ ପାଇଁ ପରିଚିତ । ଗାଁରେ ଜଣେ ଅନ୍ତର୍ଜାତୀୟ, 30 ଜଣ ଜାତୀୟ ଏବଂ 20ରୁ ଅଧିକ ରାଜ୍ୟସ୍ତରୀୟ ଧନୁର୍ଦ୍ଧାରୀ ଅଛନ୍ତି । କେବଳ ପୁଅ ନୁହଁନ୍ତି, ଗାଁର ଝିଅମାନେ ବି ଧନୁବିଦ୍ୟାରେ ପାରଙ୍ଗମ । କିଛି ପରିବାରରେ ତ ଭାଇଭଉଣୀ ସମସ୍ତେ ଧୁରନ୍ଧର ଧନୁର୍ଦ୍ଧାରୀ । ମନୀଷା ନନୋମାଙ୍କ ସହ ତାଙ୍କର 2 ଭାଇ ବିନୋଦ ଏବଂ ପଙ୍କଜ ମଧ୍ୟ ଜାତୀୟସ୍ତରୀୟ ଧନୁର୍ଦ୍ଧାରୀ । 1997ରେ ଗାଁର କାନ୍ତା କଟାରା ରାଷ୍ଟ୍ରୀୟ ସ୍ତରରେ ସ୍ବର୍ଣ୍ଣପଦକ ଜିତିଥିଲେ, ଆଉ ଅଭିଷେକ ନନୋମା ଜିତିଥିଲେ 4ଟି ସ୍ୱର୍ଣ୍ଣ । ମନୀଷା ନନୋମା ରାଷ୍ଟ୍ରୀୟ ସ୍ତରରେ 4ଟି ଓ ରାଜ୍ୟ ସ୍ତରରେ 4ଟି ସ୍ୱର୍ଣ୍ଣ ଜିତିଛନ୍ତି । ଏହାଛଡା ଅନେକ ଖେଳାଳି ଜାତୀୟ ତଥା ରାଜ୍ୟ ସ୍ତରୀୟ ପ୍ରତିଯୋଗୀତାରେ ବି ପଦକ ଜିତିଛନ୍ତି ।
ଏହି ଖେଳାଳିମାନେ ନିଜ ଗାଁରୁ 5 କିମି ଦୂରରେ ଅବସ୍ଥିତ ସ୍ପୋର୍ଟ୍ସ କମ୍ପ୍ଲେକ୍ସରେ କିମ୍ବା ଗାଁ ବିଲରେ ତୀରନ୍ଦାଜୀ ପ୍ରାକ୍ଟିସ କରନ୍ତି । ଏମାନଙ୍କୁ ଅନ୍ତର୍ଜାତୀୟ ଧନୁର୍ଦ୍ଧର ତଥା 3 ଥର ଭାରତୀୟ ତୀରନ୍ଦାଜ ଟିମରେ କୋଚ୍ ଥିବା ଜୟନ୍ତୀଲାଲ ନନୋମା ପ୍ରଶିକ୍ଷଣ ଦେଇଥିଲେ । ଚଳିତ ବର୍ଷ ଏକ ସଡକ ଦୁର୍ଘଟଣାରେ ତାଙ୍କର ମୃତ୍ୟୁ ଘଟିଛି । 1995ରେ ତୀରନ୍ଦାଜୀ ଆରମ୍ଭ କରିଥିଲେ ଜୟନ୍ତୀ ଲାଲ । 2006ରେ ସେ ଦେଶ ପାଇଁ ଜିତିଥିଲେ ପ୍ରଥମ ପଦକ । ଏହା ପରେ ମଧ୍ୟ ସେ ଜାତୀୟ ତଥା ଅନ୍ତର୍ଜାତୀୟ ପ୍ରତିଯୋଗିତାରେ ବିଜୟ ହାସଲ କରି ଦେଶକୁ ଗର୍ବିତ କରିଥିଲେ । ଜଣେ କ୍ରୀଡ଼ା ଅଧିକାରୀ ଭାବେ ତୀରନ୍ଦାଜରେ ତାଙ୍କ ଅବଦାନ ଅତୁଳନୀୟ ।