ରାୟପୁର:ଭଉଣୀହାତରୁ ରାକ୍ଷୀ ବାନ୍ଧିବା ପରେ ତା’ର ସୁରକ୍ଷା ପାଇଁ ନିର୍ଭୟ ପ୍ରତିଶ୍ରୁତି ଦେଇଥାଏ ଭାଇ । ସବୁବେଳେ ପାଖେ ପାଖେ ରହି ସୁନା ଭଉଣୀକୁ ସୁଖ ଦୁଃଖରେ ସହାୟତା ପାଇଁ ପଣ କରିଥାଏ ଭାଇ । ଆଉ ଭଉଣୀ ଇଚ୍ଛା ପୂରଣ ପାଇଁ ହସି ହସି ସବୁକିଛି କରିଥାଏ ଭାଇ । ହେଲେ ଆଜି ଭାଇର ଶେଷ ଇଚ୍ଛା ପୂରା କରିଛି ତା’ ସୁନା ଭଉଣୀ । ଶହୀଦ ଭାଇର ଶେଷ ଇଚ୍ଛା ପୂରଣ କଲା ଭଉଣୀ । ଶଗଡ ଗାଡିରେ ସିନା, ବାହା ବେଦୀକୁ ଯାଇପାରିଲାନି ଭାଇ, ହେଲେ ଶଗଡ ଗାଡିରେ ଆସିଲା ଭାଉଣୀର ବର । ଆଉ ପୌରାଣିକ ପରମ୍ପରାରେ ବାହାଘର ବି ହେଲା । ଏଭଳି ଘଟଣା ଦେଖିବାକୁ ମିଳିଛି ଛତିଶଗଡର ରାଜାନନ୍ଦଗାଓଁ ଜିଲ୍ଲାର ଅର୍ଜୁନିରେ । ଆଜିକାଲି ସାଧାରଣତଃ ବାହାଘରରେ ବର କାରରେ ଆସିଥାଏ । ହେଲେ ଶହୀଦ ପୂର୍ଣ୍ଣନନ୍ଦ ସାହୁଙ୍କର ଶେଷ ଇଚ୍ଛା ଥିଲା ସେ ବି ବର ହୋଇଯାଇଥାନ୍ତେ ଶଗଡ ଗାଡିରେ । କିନ୍ତୁ ତାଙ୍କର ଏ ଆଶା ସ୍ବପ୍ନରେ ରହିଗଲା ।
କୋବ୍ରା 204 ବାଟାଲିୟନର ଚାକିରି କରୁଥିବା ପୂର୍ଣ୍ଣନନ୍ଦଙ୍କର ବିବାହ ସ୍ଥିର ହୋଇଥିଲା । ମାର୍ଚ୍ଚ ମାସରେ ତାଙ୍କର ବାହାଘର ବି ହୋଇ ଥାନ୍ତା ହେଲେ । ନକ୍ସଲଙ୍କ ବିରୋଧରେ ଲଢେଇ କରି ଟଳି ପଡିଲେ ବୀର ଯବାନ ପୂର୍ଣ୍ଣନନ୍ଦ । ହେଲେ ତାଙ୍କର ଏହି ସ୍ବପ୍ନକୁ ସାକାର କଲେ ଭଉଣୀ ଓନୀସା ।