କୋଲକାତା: ପଶ୍ଚିମବଙ୍ଗ ରାଜ୍ୟପାଳ ଜଗଦୀପ ଧନକରଙ୍କୁ ବରଖାସ୍ତ ଦାବି । ଏ ନେଇ ରାଷ୍ଟ୍ରପତିଙ୍କୁ ଚିଠି ଲେଖିଲା ତୃଣମୂଳ ସଂସଦୀୟ ଦଳ । ରାଜ୍ୟପାଳ ସାମ୍ବିଧାନର ସୁରକ୍ଷା ଓ ସୁପ୍ରିମକୋର୍ଟର ଆଇନ ବ୍ୟବସ୍ଥାକୁ ପାଳନ କରିବାରେ ବିଫଳ ହୋଇଥିବା ଉଲ୍ଲେଖ କରିଛନ୍ତି ।
ରାଜ୍ୟପାଳ ଜଗଦୀପ ଧନକରଙ୍କୁ ବରଖାସ୍ତ କରିବା ପାଇଁ ତୃଣମୂଳ କଂଗ୍ରେସ ସଂସଦୀୟ ଦଳ ଆଜି ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଚିଠି ଲେଖିଛନ୍ତି । ଟିଏମସି ଏମପି ସୁଖେନ୍ଦୁ ଶେଖର ରୟ, ଏମପି ସୁଦୀପ ବନ୍ଦୋପାଧୟ,ଏମପି ଡେରିକ ଓ ବ୍ରାୟନ,ଏମପି କଲ୍ୟାଣ ବାନାର୍ଜୀ ଓ ଏମପି କାକୋଲି ଘୋଷ ପ୍ରମୁଖ ରାଷ୍ଟ୍ରପତିଙ୍କୁ ଏକ ଦାବି ପତ୍ର ପ୍ରଦାନ କରିଛନ୍ତି । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଓ ରାଜ୍ୟପାଳ ଜଗଦୀପ ଧନକର ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଛି । ରାଜ୍ୟର ଶାସନ ବ୍ୟବସ୍ଥାକୁ ନେଇ ପରସ୍ପର ମଧ୍ୟରେ ଆରୋପ ପ୍ରତ୍ୟାରୋପ ଲାଗି ରହିଛି । ପଶ୍ଚିମବଙ୍ଗ ବିଧାନସଭାରେ ପାରିତ ହୋଇଥିବା ବିଲ ଗୁଡିକୁ ରାଜ୍ୟପାଳ ପାସ କରୁନଥିବା ଅଭିଯୋଗ କରିଛନ୍ତି । ରାଜ୍ୟରେ କେନ୍ଦ୍ର ସରକାରଙ୍କ ଇସାରାରେ ରାଜ୍ୟପାଳ କାର୍ଯ୍ୟ କରୁଥିବା ଅଭିଯୋଗ କରିଛନ୍ତି । ରାଜ୍ୟପାଳ ସାମ୍ବିଧାନର ସୁରକ୍ଷା ଓ ସୁପ୍ରିମକୋର୍ଟର ଆଇନ ବ୍ୟବସ୍ଥାକୁ ପାଳନ କରିବାରେ ବିଫଳ ହୋଇଛନ୍ତି ବୋଲି ଟିଏମସି ସଂସଦୀୟ ଦଳ କହିଛି ।