ନୂଆଦିଲ୍ଲୀ: ଚଳିତ ଲୋକସଭା ନିର୍ବାଚନ ବଦଳାଇ ଦେଇଛି ପଶ୍ଚିମବଙ୍ଗର ରାଜନୈତିକ ପାଣିପାଗ । ବର୍ତ୍ତମାନ ରାଜ୍ୟରେ କ୍ଷମତାସୀନ ଥିବା ଶାସକ ତୃଣମୂଳ କଂଗ୍ରେସକୁ(ଟିଏମସି) ଲାଗିଛି ଜୋରଦାର ଝଟକା । ପ୍ରଥମତଃ 2019 ନିର୍ବାଚନରେ ଦଳର ଆସନ ସଂଖ୍ୟା 34ରୁ ଆସି 22ରେ ପହଞ୍ଚିଛି । ଆଉ ଏବେ ଦଳୀୟ ବିଧାୟକ ଏବଂ କାଉନସିଲର ବିଜେପିରେ ସାମିଲ ହୋଇଛନ୍ତି।
ଏହାରି ମଧ୍ୟରେ ଟିଏମସିର 2 ଏବଂ ଜଣେ ବାମଦଳ ବିଧାୟକ ନୂଆଦିଲ୍ଲୀ ସ୍ଥିତ ବିଜେପି ମୁଖ୍ୟାଳୟରେ ଉପସ୍ଥିତ ରହି ଦଳରେ ଯୋଗଦାନ କରିଛନ୍ତି । ସେମାନେ ହେଉଛନ୍ତି ଟିଏମସିରୁ ବହିଷ୍କୃତ ତଥା ବିଜେପିର ବରିଷ୍ଠ ନେତା ମୁକୁଲ ରାୟଙ୍କ ପୁଅ ଶୁଭ୍ରାଶୁଂ ରୟ ଏବଂ ତୁଷାରକାନ୍ତି ଭଟ୍ଟାଚାର୍ଯ୍ୟ। ଅନ୍ୟପଟେ ସିପିଏମ ବିଧାୟକ ଦେବେନ୍ଦ୍ର ରୟଙ୍କ ସମେତ 50 ଜଣ ଟିଏମସି କାଉନସିଲର ମଧ୍ୟ ନିଜ ଦଳ ଛାଡି ପଦ୍ମ ଶିବିରରେ ମିଶି ଯାଇଛନ୍ତି।