ହାଇଦ୍ରାବାଦ: ସାରା ବିଶ୍ବରେ ପ୍ରଥମ କରି ଯୁକ୍ତରାଷ୍ଟ୍ର ଆମେରିକା ଡେବିଟ ଓ କ୍ରେଡିଟ କାର୍ଡ ମାଧ୍ୟମରେ ଟଙ୍କା ପଇଠ କରିବା ପ୍ରଣାଳୀକୁ ସାର୍ବଜନୀନ କରିଥିଲା । ଏହା ପରେ ପରେ ଆରମ୍ଭ ହେଲା ଇ-ପେମେଣ୍ଟ । ଇ-କମର୍ସ ସାଇଟରେ ଜିନିଷ କିଣିବା ହେଉ କିମ୍ବା ଅନଲାଇନ କିମ୍ବା ଜନଗହଳିପୂର୍ଣ୍ଣ ସ୍ଥାନରେ ଖାଇବା ହେଉ ଚୀନର ଲୋକମାନେ ସମସ୍ତ ସ୍ଥାନରେ ଡିଜିଟାଲ ୱଲେଟ ଓ କ୍ୟୁଆର କୋଡ (QR codes) ସାହାଯ୍ୟରେ ପେମେଣ୍ଟ କରିବା ଆରମ୍ଭ କରିଦେଇଛନ୍ତି । ପ୍ରାୟ 83 ମିଲିୟନ ଲୋକ ନିଜ ନିଜ ସ୍ମାର୍ଟ ଫୋନ ଓ ସୋସିଆଲ ମିଡ଼ିଆ ଆପ ଗୁଡ଼ିକ ବ୍ୟବହାର କରି ଡିଜିଟାଲ ପେମେଣ୍ଟ କରୁଛନ୍ତି । ଆପଣ ଶୁଣି ଆଶ୍ଚର୍ଯ୍ୟ ହେବେ ଯେ ଚୀନରେ ଭିକ୍ଷାବୃତ୍ତି କରୁଥିବା ବ୍ୟକ୍ତିମାନେ ଲୋକଙ୍କ ଠାରୁ ଭିକ ନେବା ପାଇଁ ମଧ୍ୟ କ୍ୟୁଆର କୋଡର ବ୍ୟବହାର କରନ୍ତି । ଏଥିରୁ ସ୍ପଷ୍ଟ ଜଣା ପଡୁଛି ଯେ ଚୀନରେ କିଭଳି ଭାବରେ ଡିଜିଟାଲ ପେମେଣ୍ଟର ଅଭିବୃଦ୍ଧି ହୋଇଛି ।
ଅଲିବାବା (ଚିନର ଆମାଜନ) ଓ ଟେନସେଣ୍ଟ (Tencent- ଚୀନର ଫେସବୁକ) ପରି ବଡ଼ ବଡ଼ ମାଧ୍ୟମ ସବୁ ପେମେଣ୍ଟ ପାଇଁ ବ୍ୟାଙ୍କ ଭଳି କାର୍ଯ୍ୟକରି ବ୍ୟାଙ୍କର ସ୍ଥାନ ନେଇ ସାରିଲେଣି । କାରଣ କ୍ରେଡିଟ କାର୍ଡରେ ପେମେଣ୍ଟ କଲେ ଚାଇନିଜ ବ୍ୟାଙ୍କ ଗୁଡ଼ିକ ଯେଉଁଠି 0.5%ରୁ 0.6% ପ୍ରୋସେସିଙ୍ଗ ଫି ନିଅନ୍ତି ସେଇଠି ମୋବାଇଲ ୱଲେଟ ଦ୍ବାରା ପେମେଣ୍ଟ କଲେ ମାତ୍ର 0.1% ପ୍ରୋସେସିଙ୍ଗ ଫି ଦେବାକୁ ପଡିଥାଏ । ତେଣୁକରି ଗତବର୍ଷ ଚୀନରେ ପ୍ରାୟ 12.8 ଥ୍ରିଲିୟନ ଡଲାରର ଡିଜିଟାଲ ପେମେଣ୍ଟ ହୋଇଥିବା ସୂଚନା ମିଳିଛି । ସାରାବିଶ୍ବରେ ହେଉଥିବା ଡିଜିଟାଲ ପେମେଣ୍ଟର ଅଧା ଭାଗ କେବଳ ଚୀନରେ ହୋଇଥାଏ ।
ଆଫ୍ରିକା ପାଇଁ ଏକ ବରଦାନ
ଚୀନ ଦ୍ବାରା ଆରମ୍ଭ ହୋଇଥିବା କ୍ୟାସଲେସ ଅନଲାଇନ ପେମେଣ୍ଟର କ୍ରାନ୍ତି ଆଫ୍ରିକା ପର୍ଯ୍ୟନ୍ତ ବ୍ୟାପ୍ତ ହୋଇଛି, ଯେଉଁଠି ବ୍ୟାଙ୍କିଂ ସୁବିଧା ଦୁର୍ଲଭ ଅଟେ । ଚୀନ ଦ୍ବାରା ଆରମ୍ଭ ହୋଇଥିବା ନିବେଶ ଓ ଟେକ୍ନୋଲୋଜି କାରଣରୁ ଆଜି ଆଫ୍ରିକାରେ, 4G ନେଟୱର୍କ, ସ୍ମାର୍ଟ ଫୋନ, ମୋବାଇଲ ପେମେଣ୍ଟ ଦୃତଗତିରେ ବୃଦ୍ଧି ପାଇଛି ।
ଚଳିତ ବର୍ଷ ଅକ୍ଟୋବରରେ ଭାରତରେ ପ୍ରଥମ ଥର ପାଇଁ ୟୁନିଫାଇଡ ପେମେଣ୍ଟ ଇଣ୍ଟରଫେସ ତୁଳନାରେ କାର୍ଡ ପେମେଣ୍ଟର ଦେଣନେଣ କାରବାର କମ ହୋଇଛି । ଗୁଗଲ ପେ, ଫୋନ ପେ ଓ ଭିମ ୟୁପିଆଇର ବ୍ୟବହାର କରି ଡିଜିଟାଲ ପେମେଣ୍ଟ କରିବାର ବେଙ୍ଗାଲୁରୁ (38.10%) ସାରା ଦେଶରେ ପ୍ରଥମ ସ୍ଥାନରେ ରହିଛି । ବେଙ୍ଗାଲୁରୁ ପଛକୁ ହାଇଦ୍ରାବାଦ (12.50%), ତା ପଛକୁ ଦିଲ୍ଲୀ(10.22%) ରହିଛି । ବେଙ୍ଗାଲୁରୁରେ ଥିବା ପେମେଣ୍ଟ ମାଧ୍ୟ ‘ରେଜରପେ (RazorPay) ଦ୍ବାରା ଏହି ତଥ୍ୟ ଦିଆଯାଇଛି ।
ଯଦିଓ ଅଲିବାବା ଓ ୱିଚାଟ ପେମେଣ୍ଟ ଆପ ଗୁଡ଼ିକ ବ୍ୟାଙ୍କ ଗୁଡ଼ିକର ସ୍ଥାନ ନେଇସାରିଲେଣି ତଥାପି ଏହି ଦୁଇ ମୋବାଇଲ ୱଲେଟ ୟୁଜର ବ୍ୟାଙ୍କ ଆକାଉଣ୍ଟ ସହ ଜୋଡ଼ି ହୋଇ ରହିଛନ୍ତି ।
ତେବେ ଆମେରିକା ସ୍ଥିତ କମ୍ପାନି ଫେସବୁକ ଅନେକ ପାଦ ଆଗକୁ ଚିନ୍ତା କରି ଯୋଜନା ପ୍ରସ୍ତୁତ କରି 2020 ସୁଦ୍ଧା ନିଜର ଡିଜିଟାଲ- କ୍ରିପ୍ଟୋ-କରେନ୍ସି ‘ଲିବ୍ରା’ ଲଞ୍ଚ କରିବାକୁ ଯାଉଛି । ଯାହା କୌଣସି ମୂଳ ବ୍ୟାଙ୍କ କିମ୍ବା ଅନ୍ୟ କୌଣସି ଆଞ୍ଚଳିକ ବ୍ୟାଙ୍କ ନେଇ ଚିନ୍ତା କରିବ ନାହିଁ । ଚୀନ ମଧ୍ୟ ଏହାକୁ ଅନୁସରଣ କରି ନିଜର ସେଣ୍ଟ୍ରାଲ ବ୍ୟାଙ୍କ ମାଧ୍ୟମରେ ଏକ ଡିଜିଟାଲ କରେନ୍ସି ଲଞ୍ଚ କରିବାକୁ ଯାଉଛି, ଯାହା ‘ଲିବ୍ରା’ର ସମକକ୍ଷ ହେବ । 2020 ମଧ୍ୟ ଭାଗରେ ‘ଲିବ୍ରା’ ଲଞ୍ଚ ହେବାର ସୂଚନା ରହିଛି ।
ତେବେ ଚଳିତ ବର୍ଷ ପ୍ରାରମ୍ଭରେ ବଜାର ନିବେଶରେ ବିଶ୍ବର ସର୍ବ ଶ୍ରେଷ୍ଠ ବ୍ୟାଙ୍କ ଜେପି ମର୍ଗାନ ଚେସ ଆଣ୍ଡ କୋ (JP Morgan Chase & Co) ମଧ୍ୟ ଏହି ଦୌଡ଼ରେ ସାମିଲ ହୋଇ ନିଜର କ୍ରିପ୍ଟୋ କରେନ୍ସି ‘କଏନ’କୁ ଲଞ୍ଜ କରିଛି । ଏହି କରେନ୍ସି ବ୍ଲକ ଚେନ ଟେକ୍ନୋଲୋଜି ଉପରେ ପର୍ଯ୍ୟବେଶିତ ଯାହାକି ବିଜୁଳି ବେଗରେ ବ୍ୟାଙ୍କ ଆକାଉଣ୍ଟରୁ ଟଙ୍କା ପଠାଇ ପାରିବ ।
‘ଲିବ୍ରା’ କିପରି କାମ କରେ
ଫେସବୁକ ‘ଲିବ୍ରା’ କୁ ଏକ ଅନ୍ତର୍ଜାତୀୟ ଡିଜିଟାଲ କରେନ୍ସି କରିବା ଲକ୍ଷ୍ୟ ରଖିଛି । କିନ୍ତୁ ଯଦି ଚୀନ ଡିଜିଟାଲ ପେମେଣ୍ଟ ଦୁନିଆଁରେ ନିଜର କାୟା ବିସ୍ତାର କରିବ ତେବେ ‘ଲିବ୍ରା’କୁ ବ୍ୟାଙ୍କିଂ କ୍ଷେତ୍ର ତଥା ଆମେରିକା ଓ ୟୁରୋପରେ ଥିବା ସଂସ୍ଥା ଗୁଡ଼ିକରେ ପ୍ରତିରୋଧର ସାମ୍ନା କରିବାକୁ ପଡ଼ିପାରେ । ‘ଲିବ୍ରା’ ଏକ କ୍ରିପ୍ଟୋ କରେନ୍ସି । ସମସ୍ତ କ୍ରିପ୍ଟୋ କରେନ୍ସି ଡିଜିଟାଲ ହୋଇଥାନ୍ତି, କିନ୍ତୁ ସମସ୍ତ ଡିଜିଟାଲ କରେନ୍ସି କ୍ରିପ୍ଟୋ ନୁହନ୍ତି । ‘ଲିବ୍ରା’ ଦ୍ବାରା ବିଶ୍ବର ଯେ କୌଣସି ସ୍ଥାନକୁ ବିନା କୌଣସି ବ୍ୟୟରେ ଟଙ୍କା ପଠାଯାଇ ପାରିବ । କ୍ରିପ୍ଟୋ କରେନ୍ସି ହୋଇ ଥିବାରୁ ‘ଲିବ୍ରା’ରେ ସେତେଟା ଉତ୍ଥାନ ପତନ ହୋଇ ନଥାଏ । ମୁଲ୍ୟହ୍ରାସ ଡଲାର, ୟୁରୋ ଓ ୟେନ ଉପରେ ନିର୍ଭର କରେ । ଯେତେବେଳେ ଜମେ ‘ଲିବ୍ରା’ କିଣିବ ତାହା ବ୍ୟାଙ୍କ ଆକାଉଣ୍ଟରେ ଡଲାର, ୟୁରୋ ଓ ୟେନରେ ଟଙ୍କା ଜମା କରିବା ସହ ସମାନ ହେବ । ଏହାର ସୁଦ୍ଧ ମଧ୍ୟ ମିଳିବ । ଲିବ୍ରାକୁ ଡଲାର କିମ୍ବା ୟେନରେ ପରିବର୍ତ୍ତିତ କରିବା ପାଇଁ ଫେସବୁକ ଆପ ‘କାଲିବ୍ରା(Calibra)’ ଅଦଳ ବଦଳ କରିବା ଖର୍ଚ୍ଚ ବହନ କରିବ ।
‘ଲିବ୍ରା’ ସ୍ବିଜରଲାଣ୍ଡର ଏକ ବିନାଲାଭରେ ଚାଲିଥିବା ଏକ ସଂଗଠନର ମାର୍ଗଦର୍ଶନରେ ପରିଚାଳିତ ହେଇଥାଏ । ଲିବ୍ରା ଯେତେବେଳେ କାର୍ଯ୍ୟକ୍ଷମ ହେବ ଯେକୌଣସି କମ୍ପାନୀ ଏଥିରେ ଡିଜିଟାଲ କଏନ ଦ୍ବାରା ୱଲେଟ କରି ପାରିବେ । ଫେସବୁକ ମ୍ୟାସେଞ୍ଜର ସେବା ଓ ହ୍ବାଟ୍ସଆପର ସରା ବିଶ୍ବରେ ପ୍ରାୟ 270 ମିଲିୟନ ଉପଭୋକ୍ତା ଅଛନ୍ତି । ସେମାନେ ସମସ୍ତେ ଟଙ୍କା ପଠାଇବା, ନିବେଶ କରିବା ଓ ଡିଜିଟାଲ ଭାବେ ଋଣ ଦେବା ପାଇଁ ଲିବ୍ରାକୁ ଏକ ଡିଜିଟାଲ କରେନ୍ସି ଭାବେ ପରିବର୍ତ୍ତିତ କରିବାକୁ ଚାହାଁନ୍ତି । ଫେସବୁକ ପେ ପ୍ରଥମେ ଏକ ଡିଜିଟାଲ ପେ ମାଧ୍ୟମ ଭାବରେ ବ୍ୟବହୃତ ହେଉଥିଲା । ତେବେ ଫେସବୁକ, ହ୍ବାଟ୍ସଆପ, ଇନଷ୍ଟାଗ୍ରାମ ଓ ମ୍ୟାସେଞ୍ଜର ମାଧ୍ୟମରେ ମଧ୍ୟ ପେମେଣ୍ଟ କରାଯାଇ ପାରିବ ।
ନିକଟ ଅତୀତରେ ହ୍ବାଟ୍ସଆପ ଭାରତରେ ଡିଜିଟାଲ ପେମେଣ୍ଟ ନେଇ ଏକ ପରୀକ୍ଷଣ କରିଥିଲା । ଏଥିପାଇଁ 100ଟି ବ୍ୟାଙ୍କ ଓ ବିତ୍ତ ସଂସ୍ଥାକୁ ଲିବ୍ରାର ସଦସ୍ୟ କରାଯାଇଥିଲା । ଜେପି ମର୍ଗାନ ଚେସ, ଯାହା ବିଶ୍ବର ପଶ୍ଚିମ ଭାଗରେ ଥିବା ସବୁଠାରୁ ବଡ଼ ବ୍ୟାଙ୍କ ସେ ମଧ୍ୟ ଏଥିରେ ସାମିଲ ହେବାର ଥିଲା । କିନ୍ତୁ ଏହି କମ୍ପାନି ନିଜର ଡିଡିଟାଲ କରେନ୍ସି ‘ଜେପିଏମ କଏନ’କୁ ଲଞ୍ଚ କରି ସାରିଛି ।
ଲିବ୍ରା ଯୋଜନା ମାଷ୍ଟରକାର୍ଡ, ଭିସାକାର୍ଡ, ପେପଲ ଓ ଇବେ ପାଇଁ ଏକ ଶକ୍ତ ଝଟକା । ବର୍ତ୍ତମାନ ଉବର ଓ ସ୍ପଟିଫାଏ କେବଳ ଲିବ୍ରା ପେମେଣ୍ଟ ଗ୍ରହଣ କରୁଛନ୍ତି । ସେପଟେ ଲିବ୍ରା ଦ୍ବାରା ଅପରାଧିକ କାର୍ଯ୍ୟକଳାପ, ନିଶା କାରବାର ଓ କଳାଧାନ କାରବାରର ମଧ୍ୟ ବ୍ୟବହାର କରାଯିବାର ସନ୍ଦେହ କରାଯାଉଥିଲା । ଉପଭୋକ୍ତା ଅଧିକାର ଓ ବିତ୍ତିୟ ସ୍ଥିରକାକୁ ନେଇ ମଧ୍ୟ ଚିନ୍ତା ପ୍ରକଟ କରାଯାଉଛି । ଏହାସହ ଜର୍ମାନୀ ଓ ଫ୍ରାନ୍ସ ଲିବ୍ରାକୁ ୟୁରୋପରେ ପ୍ରବେଶ କରାଇ ଦେଉନଥିବାର ମଧ୍ୟ ଆଶଙ୍କା ରହିଛି । ଘରୋଇ ଡିଜିଟାଲ କରେନ୍ସି ବଦଳରେ, ସରକାରଙ୍କ ମାଧ୍ୟମରେ ଲିବ୍ରା କ୍ରିପ୍ଟୋ କରେନ୍ସିକୁ ପରିଚାଳନା କରିବାର ଲକ୍ଷ୍ୟ ରଖିଛି । ତେବେ ଏଭଳି ପରିସ୍ଥିତିରେ ଲିବ୍ରା 2020 ମସିହାରେ ଲଞ୍ଚ ହେବାକୁ ଯାଉଛି ।
ଡଲାରର ପ୍ରଭୁତ୍ବ ଉପରେ ବିପଦ
ଇତି ମଧ୍ୟରେ ଚୀନ ନିଜର ଏକ କ୍ରିପ୍ଟୋ କରେନ୍ସି ଲଞ୍ଚ କରିବାକୁ ଯୋଜନା କରୁଛି, ଯାହା କେନ୍ଦ୍ର ବ୍ୟାଙ୍କ ଡିଜିଟାଲ କରେନ୍ସି ହେବ । ତେବେ ଏକ ଅନ୍ତର୍ଜାତୀୟ ରିଜର୍ଭ ଭାବେ ଡଲାରର ପ୍ରଭୁତ୍ବ ସଙ୍କଟରେ ପଡିବ ଯଦି ତାହା ଏତେ ମାତ୍ରାରେ ଶକ୍ତ ରହିବ । ଖାସକରି ଏସିଆ, ଆଫ୍ରିକା ଓ ଲାଟିନ ଆମେରିକା ପରି ଉଦୀୟମାନ ଦେଶ ଗୁଡ଼ିକରେ ଡଲାର ପରିବର୍ତ୍ତେ ଆନ୍ତର୍ଜାତୀୟ ଚାଇନିଜ କରେନ୍ସିର ବ୍ୟବହାର ହୋଇପାରେ । କାରଣ ବାଣିଜ୍ୟିକ କାରବାର, 5G ସେବାର ଆରମ୍ଭ, ହାଇ-ଟେକ ସେବା ଆଦି କ୍ଷେତ୍ରରେ ଚାଇନା ଓ ଆମେରିକା ଉଚ୍ଚ ପ୍ରତିଦ୍ବନ୍ଦିତା କରୁଛନ୍ତି । ଏହି ପ୍ରତିଦ୍ବନ୍ଦିତା ଏବେ ଡିଜିଟାଲ କରେନ୍ସି ଆଡ଼କୁ ମୁହାଁଇଛି । ଇଂଲଣ୍ଡ ବ୍ୟାଙ୍କ ମଧ୍ୟ ଚେତାବନୀ ଦେଇଛି ଯେ ଚୀନର ଡିଜିଟାଲ କରେନ୍ସି ଖୁବଶୀଘ୍ର ଏକ ଅନ୍ତର୍ଜାତୀୟ କରେନ୍ସିରେ ପରିଣତ ହେବ ଏହାସହ ସମସ୍ତ ଅନ୍ୟ ଅନ୍ତର୍ଜାତୀୟ କରେନ୍ସିର ସ୍ଥାନ ମଧ୍ୟ ନେଇଯିବ । ଯାହାକି ବର୍ତ୍ତମାନ ପର୍ଯ୍ୟନ୍ତ ଡଲାର କରି ଆସିଛି । ଯଦି ଜର୍ମାନୀ ଓ ୟୁରୋପ ଲିବ୍ରାକୁ ନିଜ ଦେଶରେ ଲଞ୍ଜ କରିବାକୁ ସହମତି ନଦିଅନ୍ତି ତେବେ ଫେସବୁକ ନିଜର ଡିଜିଟାଲ କରେନ୍ସିକୁ ଆଫ୍ରିକା, ଲାଟିନ ଆମେରିକା ଓ ଏସିଆରେ ଲଞ୍ଚ କରିବ ।
ଭାରତରେ ବର୍ତ୍ତମାନ ମଧ୍ୟ 72% ନେଣ ଦେଣ କ୍ୟାସ ଆକାରରେ ହୋଇଥାଏ ଯାହା ଚୀନରେ ହେଉଥିବା କ୍ୟାସ ନେଣ ଦେଣର ଦୁଇଗୁଣ ମଧ୍ୟ ଅଧିକ । ସେପଟେ ଗାଁ ଗୁଡ଼ିକରେ ସଠିକ ପରିମାଣର ଇଣ୍ଟରନେଟ ବ୍ୟବସ୍ଥା ନଥିବା କାରଣରୁ ଖୁଚୁରା ବ୍ୟବସାୟୀ ମଧ୍ୟ କ୍ୟାସଲେସ ନେଣ ଦେଣ ବା ଡି଼ଜିଟାଲ ପେମେଣ୍ଟକୁ ଗ୍ରହଣ କରିବାକୁ ଇଚ୍ଛା ପ୍ରକାଶ କରୁ ନାହାନ୍ତି । ତେଣୁ କରି ବର୍ତ୍ତମାନ ମଧ୍ୟ ଭାରତ ଡିଜିଟାଲ ନେଣ ଦେଣ କ୍ଷେତ୍ରରେ ପଛରେ ରହିଯାଇଛି । 2017 ମସିହାରେ ଚୀନରେ ବ୍ୟକ୍ତି ପିଛା କ୍ୟାସଲେସ ନେଣଦେଣର ପରିମାଣ 96.7 ଥିବା ବେଳେ ଭାରତରେ 2015 ମସିହା ବେଳକୁ ତାହା କେବେଳ 22.4 ପ୍ରତିଶତ ଥିଲା ।
ଯଦିଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସରକାର କ୍ୟାସ ମୁକ୍ତ ଅର୍ଥନୀତି ପାଇଁ 2016 ମସିହାରେ ବିମୁଦ୍ରୀକରଣ କରିଥିଲେ ତଥାପି 2 ବର୍ଷ ମଧ୍ୟରେ କ୍ୟାସ କାରବାର କମ ହୋଇ ନାହିଁ । ବର୍ତ୍ତମାନ 10 ମିଲିୟନ ଲୋକ ଡିଜିଟାଲ ପେମେଣ୍ଟ ପାଇଁ ୟୁପିଆଇ(UPI)ର ବ୍ୟବହାର କରୁଛନ୍ତି । ତେବେ ଏହାର ମୁଖ୍ୟ ପରିଚାଳନା ଅଧିକାରୀ ଦିଲ୍ଲିପ ଆସବେ କହିଛନ୍ତି ଯେ, ଆଗାମୀ 5 ବର୍ଷ ମଧ୍ୟରେ ଡିଜିଟାଲ ପେମେଣ୍ଟରେ 50 ମିଲିୟନ ଉପଭୋକ୍ତା କରିବାକୁ ଲକ୍ଷ୍ୟ ରଖା ଯାଇଛି । ପେଟିଏମ ଅଲିବାବା ଗ୍ରୁପସହ ବାଗାଦାରୀ କରିସାରିଛି, ଏବଂ ଏହା ଭାରତରେ ବହୁଳ ଭାବରେ ବ୍ୟବହାର ମଧ୍ୟ କରାଯାଉଛି । ହ୍ବାଟ୍ସଆପ ମାଧ୍ୟମରେ ମଧ୍ୟ ପେମେଣ୍ଟ କରାଯିବା ନେଇ ନିଷ୍ପତ୍ତି ନେଇଛି ଫେସବୁକ । ଏପରିକି ରତନ ଟାଟା ବ୍ୟକ୍ତିଗତ ଭାବେ ପେଟିଏମରେ ନିବେଶ କରିଛନ୍ତି । ତେବେ ଚୀନ ନିଜର ବିତ୍ତିୟ ବ୍ୟାପାର, ଫେସବୁକ ଓ ଅନ୍ୟ ଘରୋଇ କମ୍ପାନୀ ସବୁ ଭାରତ ନିଜସ୍ବ ଆପ ‘BHIM’ ସହ ପ୍ରତିଯୋଗିତା କରିବାକୁ ଚେଷ୍ଟା କରୁଛନ୍ତି । ଭାରତର130 କୋଟି ଜନତାଙ୍କୁ କ୍ୟାସଲେସ ନେଣଦେଣରେ ସାମିଲ କରିବା ପାଇଁ ଭାରତକୁ ଏକ କଡ଼ା ପ୍ରତିଯୋଗିତା ପାଇଁ ପ୍ରସ୍ତୁତ ହବା ସହ ନିଜକୁ ବିଜୟୀ କରିବାକୁ ହେବ ।
ଦୃତ ଗତିରେ ଆଗେଇ ଆସୁଥିବା ଡିଜିଟାଲ ଅର୍ଥନୈତକ ଯୁଗରେ ଭାରତ କୌଣସି ପ୍ରକାର ପଛରେ ନ ପଡିବା ପାଇଁ ଆପ୍ରାଣ ଉଦ୍ୟମ କରିବା ଉଚିତ । ଭାରତ ଏହାକୁ ହୃନ୍ଦୟଙ୍ଗମ କରି ନେଇଛି ତେଣୁକରି ତ ଅନ୍ତର୍ଜାତୀୟ ଦେଣ ନେଣ ପାଇଁ BHIM ୟୁପିଆଇ ବହୁଳ ବ୍ୟବହାର ପାଇଁ କମର କସିଛି । ତେବେ ଏହାର ପରୀକ୍ଷଣ ପାଇଁ ନିକଟ ଅତୀତରେ ସିଙ୍ଗାପୁର ଫିନଟେକ ଫେଷ୍ଟିଭାଲରେ BHIM ୟୁପିଆଇ ଯୋଗେ ପେମେଣ୍ଟ କରାଯାଇଥିଲା ।
ଦୃତ ଗତିରେ କ୍ୟାସଲେସ ପେମେଣ୍ଟ ଦିଗରେ ଆଗଉଛି ଭାରତ
ଏକ କ୍ୟାସଲେସ ଡିଜିଟାଲ ଅର୍ଥନୀତିରେ ପରିଣତ ହେବା ଦିଗରେ ଦୃତଗତିରେ ଆଗେଇ ଚାଲିଛି ଭାରତ । ଅଲିପେ (Alipay) ଓ ୱିଚାଟପେ(WeChatPay) ଚୀନ ବଜାର ଉପରେ ପ୍ରଭୁତ୍ବ ବିସ୍ତାର କରୁଥିବା ବେଳେ ଭାରତ ପାଖରେ ଗୁଗଲ ପେ, ଫୋନ ପେ, ଆମାଜନ ପେ, ପେଟିମ ପରି 87ଟି ଆପ ଅଛି । ତେଣୁ ଚୀନ ପରି ଭାରତରେ ମଧ୍ୟ ଆଗାମୀ ଓ ଷ୍ଟାର୍ଟଅପ ବିତ୍ତସେବା ପ୍ରଦାନକାରୀଙ୍କ ପାଇଁ ଅନେକ ସୁଯୋଗ ରହିଛି । 2015 ପରେ ଭାରତରେ ଡିଜିଟାଲ ପେମେଣ୍ଟ କ୍ଷେତ୍ରରେ 5 ଗୁଣା ବୃଦ୍ଧି ହୋଇଛି ।
ନ୍ୟାସନାଲ ପେମେଣ୍ଟ ଏଜେନ୍ସି ଅଫ ଇଣ୍ଡିଆ ( National Payments Agency of India ) ଅଧିନରେ କାର୍ଯ୍ୟ କରି ୟୁପିଆଇ ତତକ୍ଷଣ ମୋବାଇଲ ପେମେଣ୍ଟ ବ୍ୟବସ୍ଥାକୁ କାର୍ଯ୍ୟକାରୀ କରିଛି । ବିଭିନ୍ନ ବ୍ୟାଙ୍କକୁ ପେମେଣ୍ଟ ଆପ ଗୁଡ଼ିକ ସହ ସଂଯୁକ୍ତ କରି ୟୁପିଆଇ ଡିଜିଟାଲ ପେମେଣ୍ଟ ଲଞ୍ଚ କରିଛି । ତେବେ ବର୍ତ୍ତମାନ ମଧ୍ୟ ଡିଜିଟାଲ କ୍ୟାସଲେସ ପେମେଣ୍ଟ କ୍ଷେତ୍ରରେ ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିବା ପାଇଁ ଭାରତକୁ ଅନେକ ଆଗକୁ ଯିବା ବାକି ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
