ଅହମ୍ମଦାବାଦ: ଦିଲ୍ଲୀର ବହୁ ଚର୍ଚ୍ଚିତ ନିର୍ଭୟା ଗଣଦୁଷ୍କର୍ମ ମାମଲା ପରେ ଲୋକମାନେ ଜାଗ୍ରତ ହୋଇଛନ୍ତି । ହେଲେ ଏବେ ବି କିଛି ଲୋକ ଏହାକୁ ସମ୍ପୂର୍ଣ୍ଣ ଭାବେ ବୁଝିପାରିନାହାନ୍ତି । ବର୍ତ୍ତମାନ ସମୟରେ ପ୍ରତ୍ୟେକ ଦିନ ଦେଶରେ ଜଣେ ନିର୍ଭୟା ଅତ୍ୟାଚାରର ଶିକାର ହେଉଛନ୍ତି । ଏମିତିରେ ସମାଜକୁ ସଚେତନ ଏବଂ ଜାଗ୍ରତ କରିବା ଉଦ୍ଦେଶ୍ୟରେ ଅହମ୍ମଦାବାଦର ଜଣେ ବାପା-ଝିଅ ଏକ ଗୀତ ପ୍ରସ୍ତୁତ କରିଛନ୍ତି । ଗୀତ ପ୍ରସ୍ତୁତ କରିଥିବା ବାପାଙ୍କ ନାଁ ମୟଙ୍କ ରାୱଲ ଏବଂ ଝିଅର ନାଁ ବିଶ୍ବ ରାୱଲ । ଖୋଦ୍ ବିଶ୍ବ ଏହି ଗୀତରେ ଅଭିନୟ କରିଛନ୍ତି ।
ସୂଚନାନୁଯାୟୀ, ହାଇଦ୍ରାବାଦ ଦିଶା ଗଣଦୁଷ୍କର୍ମ ଓ ହତ୍ୟା ଘଟଣା ପରେ ବିଶ୍ବ ଏ ବିଷୟରେ ନିଜ ବାପା ମୟଙ୍କ ସହ ଆଲୋଚନା କରିଥିଲେ । ଏହା ପରେ ମୟଙ୍କ ସମାଜରେ ସଚେତନତା ଆଣିବାକୁ ଏକ କବିତାକୁ ଗୀତ ରୂପ ଦେଇ ଲେଖିଥିଲେ । ଏହି ଗୀତ ମାଧ୍ୟମରେ ସେ ସମାଜକୁ ବାର୍ତ୍ତା ଦେଇଥିଲେ ଯେ ଯଦି ଗୋଟିଏ ମହିଳା ଏଭଳି ଏକ ଘଡିସନ୍ଧି ମୂହୂର୍ତ୍ତରେ ଅନ୍ୟ ଜଣେ ମହିଳା ସହ ତାଳ ମିଶାଇ ଛିଡା ହେଉନି, ତେବେ ସମାଜକୁ ତା ସହ ହେଉଥିବା ଅତ୍ୟାଚାର ବିରୁଦ୍ଧରେ ଛିଡା ହେବାର ଆବଶ୍ୟକତା ରହିଛି । ଲୋକମାନଙ୍କୁ ଏଭଳି ଦୁଃଖଦାୟୀ ଘଟଣା ଦିଗରେ ସର୍ବଦା ସତର୍କତା ରହିବାର ଆବଶ୍ୟକତା ରହିଛି ।
ମୟଙ୍କ ଏବଂ ତାଙ୍କ ଟିମକୁ ଏହି ଗୀତ ପ୍ରସ୍ତୁତ କରିବାକୁ 15 ଦିନର ସମୟ ଲାଗିଥିଲା । ନିଜସ୍ବ ଅର୍ଥ ଖର୍ଚ୍ଚ କରି ସେ ଏହି ଗୀତ ପ୍ରସ୍ତୁତ କରିବା ସହ ସମାଜକୁ ଏକ ସଚେତନ ବାର୍ତ୍ତା ବାଣ୍ଟିଛନ୍ତି । ତେବେ ଏହି ଗୀତର ମୁଖ୍ୟ ପଂକ୍ତି ହେଉଛି 'ଜାଗ୍ରତ ହୁଅ ସିଂହୀ, ମାଗ ସିଂହୀ, ଏ ଜଗତ ହେଉଛି ତୁମର ଅଧିକାର' । ଅର୍ଥାତ୍ ଦୁଷ୍କର୍ମ ଭଳି ଅତ୍ୟାଚାରକୁ କେବଳ ସହ୍ୟ କରନାହିଁ ବରଂ ଏହାର ବିରୁଦ୍ଧରେ ଲଢିବାକୁ କ୍ଷମତା ରଖ । ପୁରୁଷଙ୍କ ଭଳି ସମାଜରେ ମହିଳାଙ୍କ ମଧ୍ୟ ସମ୍ମାନ ଅଧିକାର ରହିବା ଆବଶ୍ୟକ ଅଛି । ତେବେ ଏହି ଗୀତଟି ୟୁଟ୍ୟୁବରେ ଅପଲୋଡ ହୋଇସାରିଛି ।