ସିମିଲା: ଉତ୍ତର ହିମାଚଳରେ ଶୀତ ଲହରୀ ଅନୁଭୂତ ଆରମ୍ଭ ହୋଇଯାଇଛି। ଶୀତର ମେରୁସ୍ଥଳ କୁହାଯାଉଥିବା ଲାହୁଲ ସ୍ପିତିରେ ଚଳିତ ବର୍ଷର ପ୍ରଥମ ତୁଷାରପାତ ଦେଖିବାକୁ ମିଳିଛି । ଗତ ରାତିରେ ସେଠାରେ ପାଣିପାଗ ବଦଳିବା ସହ ହଠାତ ତୁଷାରପାତ ଆରମ୍ଭ ହୋଇଥିଲା । ଏମିତିକି ଆଜି (ଶନିବାର) ସକାଳ ପର୍ଯ୍ୟନ୍ତ ତୁଷାରପାତ ଜାରି ରହିଥିଲା । ପୂର୍ବାହ୍ନରେ ତୁଷାରପାତ ବନ୍ଦ ହୋଇଥିବା ଦେଖିବାକୁ ମିଳିଛି ।
ଧଳା ବରଫର ଆସ୍ତରଣରେ ବରଫାବୃତ ପର୍ବତ ଶୃଙ୍ଗ ଗୁଡିକ ଖୁବ ଆକର୍ଷଣୀୟ ଲାଗୁଛି । କିନ୍ତୁ ଏହା ସ୍ଥାନୀୟ ଅଞ୍ଚଳର ତାପମାତ୍ରାକୁ ଅହେତୁକ ଭାବେ ହ୍ରାସ କରିଥିବାରୁ ସେଠାରେ ପ୍ରବଳ ଥଣ୍ଡା ଅନୁଭବ ହେବାରେ ଲାଗିଛି । ପ୍ରଭାବରେ ସମଗ୍ର ଉତ୍ତର ହିମାଚଳରେ ଶୀତର ପ୍ରକୋପ ଆରମ୍ଭ ହୋଇଯାଇଛି । ମିଳିଥିବା ତଥ୍ୟ ଅନୁସାରେ ଜିଲ୍ଲା ମୁଖ୍ୟାଳୟ କେଲାଙ୍ଗରେ ପ୍ରାୟ 2 ଇଞ୍ଚ ତୁଷାରପାତ ହୋଇଥିବା ରେକର୍ଡ କରାଯାଇଛି । ଏହା ଛଡା ସମ୍ପୂର୍ଣ୍ଣ ଚନ୍ଦ୍ରା ଘାଟି ବରଫାବୃତ ହୋଇଛି । ତେଣୁ ଏବେ ପର୍ଯ୍ୟନ୍ତ ଘାଟିରେ ଯାତାୟତ ସ୍ବାଭାବିକ ହୋଇ ପାରିନଥିବା ସୂଚନା ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ