କଂଗ୍ରେସକୁ ଝଟକା: ଟିଆରଏସରେ ମିଶିବା ପାଇଁ ତୟାର 12 ବିଧାୟକ !

ତନ୍ଦୁର ବିଧାୟକ ରୋହିତ ରେଡ୍ଡୀଙ୍କ ସମେତ 12ଜଣ ତେଲେଙ୍ଗାନା ବିଧାୟକ କଂଗ୍ରେସରୁ ଇସ୍ତଫା ଦେବାକୁ ଇଚ୍ଛା ପ୍ରକାଶ କରିଛନ୍ତି ।

ହାଇଦ୍ରାବାଦ: ତେଲାଙ୍ଗାନା କଂଗ୍ରେସରୁ ଏବେ ନେତାମାନେ ମୁହଁ ଫେରାଇବାକୁ ଲାଗିଛନ୍ତି । ତନ୍ଦୁର ବିଧାୟକ ରୋହିତ ରେଡ୍ଡୀ କଂଗ୍ରେସରୁ ଇସ୍ତଫା ଦେବାକୁ ଇଚ୍ଛା ପ୍ରକାଶ କରିଛନ୍ତି । ସେହିପରି ଆଜି ମଧ୍ୟାହ୍ନରେ 12ଜଣ କଂଗ୍ରେସ ବିଧାୟକ ତେଲାଙ୍ଗାନା ବିଧାନସଭା ବାଚସ୍ପତି ପୋଞ୍ଚରାମ ଶ୍ରୀନିବାସ ରେଡ୍ଡୀଙ୍କୁ ଭେଟିଛନ୍ତି । ସେମାନେ କଂଗ୍ରେସ ବିଧାୟକ ଦଳକୁ ଟିଆର୍‌ଏସ୍‌ ସହ ମିଶାଇବାକୁ ସ୍ମାରକପତ୍ର ପ୍ରଦାନ କରିଛନ୍ତି ।

ରୋହିତ ରେଡ୍ଡୀ ଖୁବଶୀଘ୍ର ଦଳ ଛାଡୁଥିବା ନେଇ ତେଲାଙ୍ଗାନା ପ୍ରଦେଶ କଂଗ୍ରେସ କମିଟି ପକ୍ଷରୁ କୁହାଯାଇଛି । ଦଳ ଛାଡିବା ପରେ ସେ ଖୁବଶୀଘ୍ର ତେଲାଙ୍ଗାନା ମୁଖ୍ୟମନ୍ତ୍ରୀଙ୍କୁ ଦେଖା କରିବେ ବୋଲି ଦଳ କହିଛି ।

ରୋହିତଙ୍କୁ ଗତବର୍ଷ ଟିଆରଏସ୍‌ରୁ ବହିଷ୍କୃତ କରାଯାଇଥିଲା । ଏହା ପରେ ସେ କଂଗ୍ରେସରେ ଯୋଗ ଦେଇଥିଲେ ଓ ତନ୍ଦୁରରୁ ବିଧାୟକ ଭାବରେ ନିର୍ବାଚିତ ହୋଇଥିଲେ ।