ପାଟନା: ସାରା ଦେଶରେ କୋରୋନା ମହାମାରୀ ବିରୋଧରେ ଲଢେଇ ଜାରି ରହିଛି । ଏପରିସ୍ଥଳେ ବିହାରରେ କିନ୍ତୁ ରାଜନୀତି ସରଗରମ ରହିଛି । ରାଷ୍ଟ୍ରୀୟ ଜନତା ଦଳ (ଆରଜେଡି) ନେତା ତଥା ପୂର୍ବତନ ସ୍ବାସ୍ଥ୍ୟମନ୍ତ୍ରୀ ତେଜ ପ୍ରତାପ ଯାଦବ ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ପାଇଁ 'ସଦବୁଦ୍ଧି ଯଜ୍ଞ' କରିଛନ୍ତି । ତେଜ ପ୍ରତାପ ତାଙ୍କ ବାସଭବନରେ ଆୟୋଜିତ ଏହି ଯଜ୍ଞ କାର୍ଯ୍ୟକ୍ରମର ଭିଡିଓ ସୋସିଆଲ ମିଡିଆରେ ସେୟାର କରିଛନ୍ତି।
ଟ୍ବିଟରରେ 'ସଦବୁଦ୍ଧି ଯଜ୍ଞ 'ର ଭିଡିଓ ସେୟାର କରି ତେଜ ପ୍ରତାପ ଟ୍ବଟ କରି କହିଛନ୍ତି ଯେ ଭଗବାନଙ୍କୁ ପ୍ରାର୍ଥନା କର ଯେ ସ୍ବାର୍ଥପର ତଥା ମନରୋଗରେ ପୀଡିତ ନୀତିଶ କୁମାର ଖୁବ ଶୀଘ୍ର ସଦବୁଦ୍ଧି ଲାଭ କରନ୍ତୁ । ଏହାସହ ସେ ସ୍ବାର୍ଥପର ଚିନ୍ତାଧାରାକୁ ପଛରେ ପକାଇ ବିହାରର ଭବିଷ୍ୟତ ତଥା ତାଙ୍କ ରାଜ୍ୟର ଗରିବ ଶ୍ରମିକମାନଙ୍କୁ ରାଜ୍ୟକୁ ଫେରାଇ ଆଣିବାକୁ ଚେଷ୍ଟା କରନ୍ତୁ ।