ନୂଆଦିଲ୍ଲୀ: ନାଗରିକତା ସଂଶୋଧନ ଆଇନ୍(ସିଏଏ)କୁ ନେଇ ଆଗତ 140 ଯାଚିକା ଉପରେ ସୁପ୍ରିମକୋର୍ଟରେ ଶୁଣାଣି ହୋଇଛି । ଏଥିମଧ୍ୟରୁ ଅଧିକାଂଶ ଯାଚିକା ସିଏଏ ବିରୋଧରେ ଦାଖଲ କରାଯାଇଛି । ସିଏଏର ସମ୍ବିଧାନିକ ବୈଧତାକୁ ନେଇ ମୁଖ୍ୟ ବିଚାରପତି ଜଷ୍ଟିସ ଏସଏ ବୋବଡେଙ୍କ ଅଧ୍ୟକ୍ଷତାରେ ଗଠିତ 3 ଜଣିଆ ଖଣ୍ଡପୀଠ ମାମଲାର ଶୁଣାଣି କରିଛନ୍ତି । ଶୀର୍ଷ ଅଦାଲତ ସମସ୍ତ ଯାଚିକାରେ କେନ୍ଦ୍ର ସରକାରଙ୍କୁ ୪ ସପ୍ତାହ ମଧ୍ୟରେ ଜବାବ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି ।
ଗତ ଶୁଣାଣିରେ ସୁପ୍ରିମକୋର୍ଟ ଏହିସବୁ ଯାଚିକାକୁ ନେଇ କେନ୍ଦ୍ର ସରକାରଙ୍କୁ ଜବାବ ମାଗିଥିଲେ । ଏହାର ଜବାବ ଦାଖଲ ପାଇଁ ସରକାରୀ ଓକିଲ କେ.କେ ବେଣୁଗୋପାଳ ଆଜି କୋର୍ଟଙ୍କୁ 2 ସପ୍ତାହ ସମୟ ମାଗିଥିଲେ। କୋର୍ଟ କେନ୍ଦ୍ର ସରକାରଙ୍କୁ ଜବାବ ଦାଖଲ ପାଇଁ 4 ସପ୍ତାହ ସମୟ ଦେଇଛନ୍ତି ।