ନୂଆଦିଲ୍ଲୀ: ଚୁରମାର ହେଉଛି ପଟ୍ଟିଦାର ନେତା ହାର୍ଦ୍ଦିକ ପଟେଲଙ୍କ ନିର୍ବାଚନ ଲଢିବାର ସ୍ବପ୍ନ। ନିକଟରେ ହାର୍ଦ୍ଦିକଙ୍କ ନିର୍ବାଚନ ଲଢିବା ଉପରେ ଗୁଜୁରାଟ ହାଇକୋର୍ଟ ରୋକ ଲାଗାଇଛନ୍ତି। ଏହି ମାମଲାରେ ହାର୍ଦ୍ଦିକଙ୍କୁ ଆଉ ଏକ ଶକ୍ତ ଝଟକା ଲାଗିଛି। ସେହି ମାମଲାର ତତ୍କାଳ ଶୁଣାଣି ପାଇଁ ସେ ସୁପ୍ରିମକୋର୍ଟରେ ଆବେଦନ କରିଥିବା ଯାଚିକା ଖାରଜ ହୋଇଛି।
କିଛ ଦିନ ପୂର୍ବେ ହାର୍ଦ୍ଦିକ ପଟେଲ କଂଗ୍ରେସରେ ମିଶିଥିଲେ। ଆଶା ରଖିଥିଲେ ଲୋକସଭା ନିର୍ବାଚନ ଲଢି ସାଂସଦ ହେବେ। କିନ୍ତୁ ତାଙ୍କର ସେହି ସ୍ୱପ୍ନରେ କଳା ବାଦଲ ଢାଙ୍କିଛି 2015ର ଗୁଜୁରାଟରେ ହେଇଥିବା ଏକ ହିଂସାକାଣ୍ଡ। ଲୋକଙ୍କୁ ହିଂସାକାଣ୍ଡରେ ସାମିଲ ହେବା ସହ ଲୋକଙ୍କୁ ଉସୁକାଇବା ଅଭିଯୋଗରେ ଗତବର୍ଷ ଜୁଲାଇରେ ମେହସାନା ଅଧିନସ୍ଥ କୋର୍ଟ ତାଙ୍କୁ 2 ବର୍ଷ ଜେଲଦଣ୍ଡରେ ଦଣ୍ଡିତ କରିଛନ୍ତି।