ଓଡିଶା

odisha

ETV Bharat / bharat

ପୋଖରୀରେ ମୋତି ଚାଷ, ବର୍ଷକୁ ଆୟ 20 ଲକ୍ଷ - ସଢାଇକଳାର ସୁଭାଷ ମହାତୋ

ବଦଳୁଛି ସମୟ । ବଢିଛି ଇଣ୍ଟରନେଟର ବ୍ୟବହାର । ଝାଡ଼ଖଣ୍ଡର ଏଭଳି ଜଣେ ଚାଷୀ ଇଣ୍ଟରନେଟର ବ୍ୟବହାର କରି ଆରମ୍ଭ କରିଛନ୍ତି ମୋତି ଚାଷ । ଯାହାକୁ ନେଇ ବର୍ତ୍ତମାନ ସେ ସମଗ୍ର ରାଜ୍ୟରେ ବେଶ ଚର୍ଚ୍ଚାର ବିଷୟ ପାଲଟିଛନ୍ତି । ସେପଟେ ଚାଷ ସଫଳ ହେଲେ ବର୍ଷକୁ ପ୍ରାୟ 20 ଲକ୍ଷ ଟଙ୍କା ଆୟ ହେବ ବୋଲି ଉକ୍ତ ଚାଷୀ ଆଶାବାଦୀ ରହିଛନ୍ତି ।

ଫଟୋ ସୌଜନ୍ୟ: ଇଟିଭି ଭାରତ ବ୍ୟୁରୋ

By

Published : Sep 17, 2019, 4:46 PM IST

ରାଞ୍ଚି: ବଦଳୁଛି ସମୟ । ବଦଳୁଛି ଚାଷର ପ୍ରକ୍ରିୟା । ବର୍ତ୍ତମାନ ଆଧୁନିକ ପ୍ରକ୍ରିୟାକରଣ ଦ୍ବାରା ଚାଷରେ ଉନ୍ନତି ଅଣାଯାଇ ପାରୁଛି । ଏହାର ଏକ ଜ୍ବଳନ୍ତ ଉଦାହରଣ ଦେଖିବାକୁ ମିଳିଛି ଝାଡ଼ଖଣ୍ଡରେ । ଝାଡ଼ଖଣ୍ଡରେ ପ୍ରଥମ ଥର ପାଇଁ ଦେଖିବାକୁ ମିଳିବ ମୋତି ଚାଷ । ଏହି ଚାଷ କରି ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି ଝାଡ଼ଖଣ୍ଡ ସଢେଇକଳାର ସୁଭାଷ ମହାତୋ । ଇଣ୍ଟରନେଟରୁ ଚାଷ ସମ୍ପର୍କରେ ଜ୍ଞାନ ଆହରଣ କରିବା ପରେ ଏହି ଚାଷ ଆରମ୍ଭ କରିଛନ୍ତି ସୁଭାଷ ।

ରାଜ୍ୟରେ ମାତ୍ର ଦୁଇ ଜଣ କରୁଛନ୍ତି ମୋତି ଚାଷ


ସଢେଇକଳା ଖରସୁଆଁର ଗମହାରିଆ ଅନ୍ତର୍ଗତ ଚମାରୁ ପଞ୍ଚାୟତରେ ରଙ୍ଗମାଟିଆ ଗ୍ରାମର ସୁଭାଷ ମହାତୋ ଏହି ମୋତି ଚାଷ କରିଆସୁଛନ୍ତି । ସେ ଏକ ଛୋଟ ପୋଖରୀରେ ପାଖାପାଖି 8 ହଜାର ମୋତି ଚାଷ କରିଛନ୍ତି । ଏହି ମୋତି ଚାଷ ଆସନ୍ତା ଏପ୍ରିଲ-ମେ ମାସ ବେଳକୁ ତାର ପ୍ରକୃତ ରୂପ ଧାରଣ କରିନେଇଥିବ । ତେବେ ସୁଭାଷଙ୍କ କହିବା ମୁତାବକ ବର୍ତ୍ତମାନ ସମଗ୍ର ରାଜ୍ୟରେ ମାତ୍ର ଦୁଇଜଣ ଏହି ଚାଷ କରୁଛନ୍ତି । ସେମାନଙ୍କ ମଧ୍ୟରୁ ସେ ଜଣେ । ଅନ୍ୟ ଜଣେ ହଜାରିବାଗ ଅଞ୍ଚଳର । ତେବେ ଏହି ମୋତି ଚାଷ ଆରମ୍ଭ କରିବା ପରଠାରୁ ତାଙ୍କର ଏକ ସ୍ବତନ୍ତ୍ର ପରିଚୟ ସୃଷ୍ଟି ହୋଇଛି ।

ଇଣ୍ଟରନେଟରୁ ଶିଖିଲେ ଚାଷ ପ୍ରକ୍ରିୟା


ଆଜିକାଲିର ପିଢି ପାଇଁ ଇଣ୍ଟରନେଟର ଆବଶ୍ୟକତା ଅନେକ ରହିଛି । ମାତ୍ର ଏହାକୁ କିଏ କେଉଁ ଭଳି ବ୍ୟବହାର କରୁଛି, ତାହା ବ୍ୟବହାରକାରୀ ଉପରେ ନିର୍ଭର କରେ । ଠିକ ଏହି ଇଣ୍ଟରନେଟର ବ୍ୟବହାର କରି ଝାଡ଼ଖଣ୍ଡର ସୁଭାଷ ମୋତି ଚାଷ ସମ୍ପର୍କରେ ଜ୍ଞାନ ଆହରଣ କରିଥିଲେ । ସୁଭାଷଙ୍କ କହିବା ମୁତାବକ ତାଙ୍କୁ ଇଣ୍ଟରନେଟରୁ ମୋତି ଉତ୍ପାଦନ ସମ୍ପର୍କରେ ଜ୍ଞାନ ମିଳିଥିଲା । ଏହା ପରେ ସେ ଇଣ୍ଟରନେଟ ମାଧ୍ୟମରେ ମୋତି ଉତ୍ପାଦନ ସମ୍ପର୍କରେ ଜ୍ଞାନ ନେବାକୁ ଇଚ୍ଛା କରିଥିଲେ ସେ ।

ପରେ ସେ ଶିକ୍ଷା ନେବାକୁ କୋଲକାତା ଯାଇଥିଲେ । ସେଠାରେ 15 ଦିନ ଧରି ଏହି ସମ୍ବନ୍ଧରେ ଜ୍ଞାନ ନେବା ପରେ ସେ ନିଜ ଗାଁକୁ ଆସି ପ୍ରାଥମିକ ପର୍ଯ୍ୟାୟରେ ଏହି ଚାଷ ଆରମ୍ଭ କରିଛନ୍ତି । ଯଦି ଏଥିରେ ସେ ସଫଳ ହେଉଛନ୍ତି ତେବେ ଆସନ୍ତା ବର୍ଷଠାରୁ ଏହି ଚାଷ ସମ୍ବନ୍ଧରେ ପ୍ରଶିକ୍ଷଣ ଦେବା ସହିତ ଚାଷ ମଧ୍ୟ କରିବେ ବୋଲି ସୁଭାଷ କହିଛନ୍ତି ।

ଚାଷ ପାଇଁ ଖର୍ଚ୍ଚ କରିଛନ୍ତି ଦେଢ ଲକ୍ଷ


ମୋତି ଉତ୍ପାଦନ ପାଇଁ ସୁଭାଷ ପାଖାପାଖି 1 ଲକ୍ଷ 30 ହଜାର ଟଙ୍କା ଖର୍ଚ୍ଚ କରିଛନ୍ତି । ସେହି ରାଶି ଦ୍ବାରା ସେ ପ୍ରାୟ 8 ହଜାର ମୋତି ଉତ୍ପାଦନ କରିପାରିବେ ବୋଲି କହିଛନ୍ତି । ସେ ଆହୁରି ମଧ୍ୟ କହିଛନ୍ତି କି ମୋତି ପ୍ରସ୍ତୁତି ହେବା ପାଇଁ ପାଖାପାଖି 12 ରୁ 14 ମାସ ପର୍ଯ୍ୟନ୍ତ ସମୟ ଲାଗିବ । ତେବେ ଏହା ମଧ୍ୟରେ 8 ମାସ ସମୟ ଅତିବାହିତ ହୋଇ ସାରିଛି । ଆହୁରି 4 ରୁ 6 ମାସ ବାକି ରହିଛି ।

ଆସନ୍ତା ବର୍ଷ ଏପ୍ରିଲ-ମେ ମାସରେ ଏହି ମୋତି ବାହାରିବ । ସରକାରୀ ସ୍ତରରେ କୌଣସି ପ୍ରକାର ସହାୟତା ମିଳୁନଥିବାରୁ ବେଳେବେଳେ ଆର୍ଥିକ ସମସ୍ୟା ଦେଖାଦେଇଥାଏ ବୋଲି ସେ କହିଛନ୍ତି । ସେ ଆହୁରି ମଧ୍ୟ ଅଭିଯୋଗ କରିଛନ୍ତି ଯେ ରାଜ୍ୟରେ ମୋତି ପାଇଁ ଅନେକ ବସ୍ତୁ ମିଳୁନାହିଁ । ଏ ସବୁକୁ ଆଣିବା ପାଇଁ କୋଲକାତା ଯିବାକୁ ପଡ଼ୁଛି ବୋଲି ସେ ଅଭିଯୋଗ କରିଛନ୍ତି ।

ABOUT THE AUTHOR

...view details