କୋଲକାତା: ବଢିବାରେ ଲାଗିଛି ଟିକଟକର ଦୁର୍ବ୍ୟବହାର । ବିଶେଷ କରି ଅଧିକାଂଶ ଛାତ୍ରଛାତ୍ରୀମାନେ ଏହି ଭିଡିଓ କରୁଥିବା ଦେଖିବାକୁ ମିଳୁଛି । ହେଲେ ନିକଟରେ ସମସ୍ତ ସୀମା ପାର କରିଛନ୍ତି ପଶ୍ଚିମବଙ୍ଗ, ମାଲଦା ଜିଲ୍ଲା ରାଜନଗର ବିଦ୍ୟାଳୟର ଜଣେ ଛାତ୍ରୀ । ଛାତ୍ରୀ ଜଣଙ୍କ ପରୀକ୍ଷା ଆରମ୍ଭ ହେବାର କିଛି ସମୟରେ ଇଂରାଜୀ ପ୍ରଶ୍ନପତ୍ରର ଫଟୋ କ୍ଲିକ କରି ଏକ ଟିକଟକ ଭିଡିଓ ପ୍ରସ୍ତୁତ କରିଥିଲେ ଏବଂ ଏହାକୁ ସୋସିଆଲ ମିଡିଆରେ ସେୟାର ମଧ୍ୟ କରିଥିଲେ । ଯାହା ଏବେ ଭାଇରାଲ ହେବାରେ ଲାଗିଛି ।
ଛାତ୍ରୀଙ୍କୁ ମହଙ୍ଗା ପଡିଲା ପରୀକ୍ଷା ହଲରେ ଟିକଟକ ଭିଡିଓ
ସୂଚନା ମୁତାବକ ପରୀକ୍ଷା ସମୟରେ ସମସ୍ତ ସ୍କୁଲ ଓ କଲେଜରେ ପରୀକ୍ଷା ହଲ ଭିତରକୁ ମୋବାଇଲ ଫୋନ ବ୍ୟାନ ହୋଇଥିବା ବେଳେ ପଶ୍ଚିମବଙ୍ଗର ଏହି ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି । କେଉଁ ପରିସ୍ଥିତିରେ ଛାତ୍ରୀ ଜଣଙ୍କ ହଲ ଭିତରକୁ ଫୋନ ନେଇଥିଲେ ଓ ଏହାର ବ୍ୟବହାର କରିଥିଲେ ତାହା ଜଣା ପଡିପାରିନାହିଁ । ତେବେ ଘଟଣାଟି ପ୍ରଘଟ ହେବା ପରେ ଛାତ୍ରୀ ଜଣଙ୍କୁ ଗୁରୁବାର ଜିଲ୍ଲା ଜୁଭେନାଇଲ କୋର୍ଟରେ ହାଜର କରାଯାଇଛି ।