ହାଇଦ୍ରାବାଦ: ସାରା ବିଶ୍ବରେ ଆତଙ୍କ ଖେଳାଇଛି ମହାମାରୀର ରୂପ ନେଇଥିବା କୋରୋନା ଭାଇରସ । ଏହି ଭାଇରସ ଏବେ ଆସି ଭାରତରେ ପହଞ୍ଚିସାରିଛି । ଦେଶରେ ବର୍ତ୍ତମାନ ପର୍ଯ୍ୟନ୍ତ 28 ଜଣ କୋରୋନା ଦ୍ବାରା ଆକ୍ରାନ୍ତ ହୋଇଥିବା ସ୍ପଷ୍ଟ ହୋଇସାରିଛି । ସରକାରଙ୍କ ଚିନ୍ତା ବି ବଢାଇଛି କୋରୋନା । ସମସ୍ତଙ୍କୁ ଆଲର୍ଟ ରହିବାକୁ ପରାମର୍ଶ ଦିଆଯାଉଛି । ହେଲେ ଏପରି ସ୍ଥିତିରେ କୋରୋନାକୁ ନେଇ ସରକାର ଓ ଗଣମାଧ୍ୟମକୁ ଟାର୍ଗେଟ କରିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ଦିଲ୍ଲୀ ହିଂସାରୁ ଧ୍ୟାନ ହାଟାଇବା ପାଇଁ କିଛି ଲୋକ ଓ ଗଣମାଧ୍ୟମ ଦେଶରେ କୋରୋନା ଭାଇରସକୁ ନେଇ ଅଯଥା ଭୟର ବାତାବରଣ ସୃଷ୍ଟି କରିବାକୁ ଚେଷ୍ଟା କରୁଥିବା କହିଛନ୍ତି ମମତା ।
କୋରୋନା ଭାଇରସର ପ୍ରକୋପକୁ ଦୃଷ୍ଟିରେ ରଖି ଦେଶରେ ବିଭିନ୍ନ ରାଜ୍ୟର ସରକାରଙ୍କ ଠୁ ନେଇ କେନ୍ଦ୍ର ସରକାର ସମସ୍ତେ ସତର୍କ ହୋଇଛନ୍ତି । ସାମ୍ବାଦିକ ସମ୍ମିଳନୀ କରି ସମସ୍ତଙ୍କୁ ସତର୍କ ରହିବାକୁ ପରାମର୍ଶ ଦେଉଛନ୍ତି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ । ହେଲେ ଏସବୁ ଦିଲ୍ଲୀ ହିଂସାରୁ ଧ୍ୟାନ ହଟାଇବା ପରି ମନେ କରୁଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ।