ହାଇଦ୍ରାବାଦ: କୋଲ୍ଡ ସ୍ପ୍ରିଙ୍ଗ ହାର୍ବର ଲାବୋରେଟୋରୀ (ସିଏସଏଚଏଲ) ର ବୈଜ୍ଞାନିକଙ୍କ ହାତରେ ଲାଗିଛି କୋରୋନା ସଂକ୍ରମଣକୁ ନେଇ ଏକ ନୂଆ ତଥ୍ୟ । ବିଭିନ୍ନ ପରୀକ୍ଷା ପରେ ବୈଜ୍ଞାନିକମାନେ ଜାଣିବାକୁ ପାଇଛନ୍ତି କି ଧୂମ୍ରପାନ ଦ୍ବାରା ଫୁସଫୁସରେ ପ୍ରସ୍ତୁତ ହେଉଥିବା ACE2 (ଆଞ୍ଜିଓଟେନସିନ-କନଭର୍ଟିଂ ଏନଜାଇମ 2) କୋରୋନା ଭୂତାଣୁର ଏକ ମୁଖ୍ୟ ବାହକ ସାଜିପାରେ । ତେଣୁ ଧୂମ୍ରପାନ କରୁଥିବା ଲୋକେ କୋରୋନାରୁ ବଞ୍ଚିବାକୁ ହେଲେ ଧୂମ୍ରପାନ ବଜ୍ରନ କରିବାର ଆବଶ୍ୟକତା ରହିଛି ବୋଲି ସେମାନେ ମତ ଦେଇଛନ୍ତି ।
ଡେଭେଲପମେଣ୍ଟ ସେଲ ନାମକ ଜର୍ଣ୍ଣାଲରେ ଏନେଇ ପ୍ରକାଶିତ ତଥ୍ୟ ମୁତାବକ ଯେଉଁମାନେ ଧୂମ୍ରପାନ କରୁଛନ୍ତି ସେମାନେ କୋରୋନାରେ ସଂକ୍ରମିତ ହେବାର ଅଧିକ ସମ୍ଭାବନା ରହିଛି । ସେପଟେ ଯେଉଁମାନେ ଧୂମ୍ରପାନ କରନ୍ତି ନାହିଁ କିମ୍ବା ବର୍ଜନ କରିଛନ୍ତି ସେମାନଙ୍କ ପାଖରେ ସଂକ୍ରମଣର ସମ୍ଭାବନା ଖୁବ କମ୍ । ବୈଜ୍ଞାନିକ ଓ ଗବେଷକମାନେ ଏନଇ ବିଭିନ୍ନ ଦିଗ ଉପରେ ପରୀକ୍ଷା କରିଥିଲେ । ମଣିଷ ଦେହରେ SARS-CoV-2 ଭୂତାଣୁ କିପରି ପ୍ରଭାବ ପକାଏ, ତାହା ଅନୁଧ୍ୟାନ କରିଥିଲା ଏହି ଟିମ ।
ଅନୁଧ୍ୟାନରୁ ଦେଖାଯାଇଥିଲା କି ସଂକ୍ରମଣର ବିଭିନ୍ନ ସୋପାନ ଓ ପ୍ରକାରଭେଦ ରହିଛି । କେତେ ଜଣ ଆକ୍ରାନ୍ତ ସଂକ୍ରମିତ ହେବା ପରେ ଜ୍ବରରେ ପୀଡିତ ହୋଇଥିବା ବେଳେ କେତେକ ଆକ୍ରାନ୍ତଙ୍କ ପାଖରେ ଏପରି କୌଣସି ଲକ୍ଷଣ ଦେଖା ଦେଇନଥିଲା । ଯେଉଁମାନଙ୍କ ଅବସ୍ଥା ସାଙ୍ଘାତିକ ରହିଥିଲା ସେମାନଙ୍କୁ ଅଧିକ ଚିକିତ୍ସା ଓ ଯତ୍ନର ଆବଶ୍ୟକତା ରହିବା ସହ ସାମାନ୍ୟ ଅସୁସ୍ଥଙ୍କୁ ସାଧାରଣ ଚିକିତ୍ସା ଦରକାର ହେଉଥିବା ଦେଖାଯାଇଥିଲା ।