ସରକାରଙ୍କ ବଡ ନିଷ୍ପତ୍ତି, ତିନି ସେନାକୁ ଅସ୍ତ୍ର ଠୁଳ କରିବାକୁ ଅନୁମତି

ଚୀନ୍‌ର ମୁକାବିଲା ପାଇଁ ଏକ ବଡ ପଦକ୍ଷେପ ନେଇଛନ୍ତି କେନ୍ଦ୍ର ସରକାର । 15 ଦିନିଆ ଭୀଷଣ ଯୁଦ୍ଧ ପାଇଁ ଅସ୍ତ୍ରଶସ୍ତ୍ର ଏବଂ ଗୁଳିଗୋଳା ଗଚ୍ଛିତ କରି ରଖିବାକୁ ତିନି ସେନାକୁ ଦାୟିତ୍ବ ଦେଇଛନ୍ତି ସରକାର । ଅଧିକ ପଢନ୍ତୁ...

ନୂଆଦିଲ୍ଲୀ: ଚୀନ୍‌ର ମୁକାବିଲା ପାଇଁ ଏକ ବଡ ପଦକ୍ଷେପ ନେଇଛନ୍ତି କେନ୍ଦ୍ର ସରକାର । ଭାରତୀୟ ସେନାବାହିନୀ ପାଖରେ ୧୦ ଦିନ ଅତିଶୟ ଯୁଦ୍ଧ ପାଇଁ ଅସ୍ତ୍ରଶସ୍ତ୍ର ଗଚ୍ଛିତ ରହିଥିବା ବେଳେ ସମ୍ଭାବ୍ୟ ୧୫ ଦିନିଆ ଦ୍ବିପାକ୍ଷିକ ଭୀଷଣ ଯୁଦ୍ଧ ପାଇଁ ଆବଶ୍ୟକ ଗୁଳିଗୋଳା ଓ ଯୁଦ୍ଧାସ୍ତ୍ର ଠୁଳ କରିବା ପାଇଁ କୁହାଯାଇଛି ବୋଲି ଜଣେ ବରିଷ୍ଠ ସେନାଧିକାରୀ ସୂଚନା ଦେଇଛନ୍ତି । ତେବେ ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇ ଶତ୍ରୁପକ୍ଷର ଦମ୍ଭ ଭାଙ୍ଗିବା ପାଇଁ ସରକାର ତିନି ସୈନ୍ୟବାହିନୀକୁ ବଡ଼ ଦାୟିତ୍ବ ଦେଇଛନ୍ତି ।

ନୂତନ ନିଷ୍ପତ୍ତି ଅନୁଯାୟୀ, ଏହି ତିନି ସେନାଙ୍କୁ 15 ଦିନିଆ ଯୁଦ୍ଧ ପାଇଁ ଅସ୍ତ୍ରଶସ୍ତ୍ର ଏବଂ ଗୁଳିଗୋଳା ଗଚ୍ଛିତ କରି ରଖିବାକୁ କୁହାଯାଇଛି । ଏହାପୂର୍ବରୁ ସୈନ୍ୟବାହିନୀଙ୍କୁ ମାତ୍ର 10 ଦିନ ଯୁଦ୍ଧ ପାଇଁ ଆବଶ୍ୟକ ସରଞ୍ଜାମ ମହଜୁଦ କରି ରଖିବାକୁ ନିର୍ଦ୍ଦେଶ କରାଯାଇଥିଲା । ଏହାଛଡ଼ା ଦେଶ ବ୍ୟତୀତ ବିଦେଶରୁ 50 ହଜାର କୋଟି ଟଙ୍କା ମୂଲ୍ୟର ଅସ୍ତ୍ରଶସ୍ତ୍ର କିଣିବା ପାଇଁ ଏକ ବଡ ଯୋଜନା ରହିଛି ।

ସୂଚନା ଥାଉ କି, ମୁଖ୍ୟତଃ ଉତ୍ତର ପଟୁ ଚୀନ୍‌ ପକ୍ଷରୁ ଜାରି ରହିଥିବା ଅସ୍ଥିରତା ଚରମ ରୂପ ନେବାର ଆଶଙ୍କା ଥିବା ପରିପ୍ରେକ୍ଷୀରେ ସେନାବାହିନୀକୁ ଏପରି ନିର୍ଦ୍ଦେଶ କରାଯାଇଥିବା ଚର୍ଚ୍ଚା ହେଉଛି।