ସାଧ୍ବୀଙ୍କ ସାଧୁ ନିଷ୍ପତ୍ତି: ଦେଶ ପାଇଁ ଦାନ କରିବେ ଦରମା

ବିବାଦୀୟ ମନ୍ତବ୍ୟ ଲାଗି ଚର୍ଚ୍ଚାରେ ରୁହନ୍ତି ଭୋପାଳ ସାଂସଦ ସାଧ୍ବୀ । ହେଲେ ବର୍ତ୍ତମାନ ତାଙ୍କୁ ନିଜ ନିଷ୍ପତ୍ତି ଲାଗି ସମସ୍ତେ ପ୍ରଶଂସା କରୁଛନ୍ତି ।

ନୂଆଦିଲ୍ଲୀ: ସବୁବେଳେ ନିଜର ବିବାଦୀୟ ମନ୍ତବ୍ୟ ପାଇଁ ଚର୍ଚ୍ଚାରେ ରହିଥାଆନ୍ତି ବିଜେପି ସାଂସଦ ସାଧ୍ବୀ ପ୍ରଜ୍ଞା ଠାକୁର । ହେଲେ ବର୍ତ୍ତମାନ ସେ ଏପରି କିଛି ନିଷ୍ପତ୍ତି ନେଇଛନ୍ତି ଯେଉଁଥିପାଇଁ ତାଙ୍କୁ ସମସ୍ତେ ପ୍ରଶଂସା କରୁଛନ୍ତି । ନିକଟରେ ନିଜ ଦରମାକୁ ଦେଶର ଆବଶ୍ୟକୀୟ କାର୍ଯ୍ୟ ପାଇଁ ଖର୍ଚ୍ଚ କରିବେ ବୋଲି ସାଧ୍ବୀ କହିଛନ୍ତି ।

ସୂଚନାଯୋଗ୍ୟ ଯେ ଚଳିତ ନିର୍ବାଚନରେ ମଧ୍ୟପ୍ରଦେଶର ଭୋପାଳରେ କଂଗ୍ରେସ ନେତା ଦିଗବିଜୟ ସିଂହଙ୍କୁ ପରାସ୍ତ କରିଛନ୍ତି ପ୍ରଜ୍ଞା । ତେବେ ସାଂସଦ ଭାବେ ସେ ପାଇବାକୁ ଥିବା ଦରମାକୁ ନିଜ ପାଇଁ ଖର୍ଚ୍ଚ କରିବେ ନାହିଁ ବୋଲି କହିଛନ୍ତି । ଏହାକୁ ଦେଶ ଲାଗି ସେ ଖର୍ଚ୍ଚ କରିବେ । ସେ ଏପର୍ଯ୍ୟନ୍ତ ଯେମିତି ଜୀବନ ଜୀଇଁଛନ୍ତି ଠିକ୍‌ ସେହିଭଳି ହିଁ ଆଗକୁ ମଧ୍ୟ ବଞ୍ଚିବା ଜାରି ରଖିବେ ବୋଲି କହିଛନ୍ତି ।

ସାଧ୍ବୀ ମଙ୍ଗଳବାର ଗାଜିଆବାଦର ଏକ କାର୍ଯ୍ୟକ୍ରମରେ ଯୋଗଦେଇ ଏହି କଥା କହିଛନ୍ତି । ସେ କହିଛନ୍ତି ଯେ ଭିକ୍ଷାରେ ମିଳୁଥିବା ଭୋଜନ ଏବଂ ବସ୍ତ୍ରରେ ସେ ନିଜର ଜୀବନଯାପନ କରିବେ । ତେବେ ଶେଷରେ ସେ ପୁଣି ଏକ ବୟାନ ଦେଇଥିଲେ ଯାହା ଆଗାମୀ ଦିନରେ ତାଙ୍କ ଲାଗି ସମସ୍ୟା ସୃଷ୍ଟି କରିପାରେ । ଜେଲରେ ବିତାଇଥିବା ଦିନ ଉପରେ ମନ୍ତବ୍ୟ ଦେଇ ସେ କହିଥିଲେ ଯେ ତାଙ୍କୁ ମିଳିଥିବା କଷ୍ଟ ଦେଶ ପାଇଁ ନିଜ ଜୀବନକୁ ଉତ୍ସର୍ଗୀକୃତ କରିଥିବା ବୀର ଯବାନଙ୍କ ଆଗରେ କିଛି ବି ନୁହେଁ ।