ଇଣ୍ଟରନେଟ ବ୍ୟବହାରରେ ସହରାଞ୍ଚଳକୁ ପଛରେ ପକାଇଲା ଗ୍ରାମୀଣ ଭାରତ

ଚଳିତ ବର୍ଷ ଜାନୁଆରୀରେ ଭାରତର ସ୍ମାର୍ଟଫୋନ ବଜାର ପ୍ରଥମ ଥର ପାଇଁ ଆମେରିକାର ବଜାରକୁ ଅତିକ୍ରମ କରିଛି ଏବଂ ଏହା ଚୀନ୍ ପରେ ଦ୍ୱିତୀୟ ବୃହତ୍ତମ ସ୍ମାର୍ଟଫୋନ ବଜାରରେ ପରିଣତ ହୋଇଛି । ଅଧିକ ପଢନ୍ତୁ...

ନୂଆଦିଲ୍ଲୀ: ଇଣ୍ଟରନେଟ ବ୍ୟବହାର ଦୃଷ୍ଟିରୁ ଗ୍ରାମାଞ୍ଚଳ ସହରାଞ୍ଚଳକୁ ବହୁ ପଛରେ ପକାଇ ଦେଇଛି । ସ୍ମାର୍ଟଫୋନ ଏବଂ ଶସ୍ତା ଇଣ୍ଟରନେଟ ସଂଯୋଗ ସାହାଯ୍ୟରେ ଏହି ପରିବର୍ତ୍ତନ ସମ୍ଭବ ହୋଇଛି । ଇଣ୍ଟରନେଟ ଏବଂ ମୋବାଇଲ ଆସୋସିଏସନ ଅଫ ଇଣ୍ଡିଆର ପରିସଂଖ୍ୟାନ ଦର୍ଶାଏ ଯେ ସହର ଅପେକ୍ଷା ଗ୍ରାମରେ 10 ପ୍ରତିଶତ ଅଧିକ ଇଣ୍ଟରନେଟ ବ୍ୟବହାର କରାଯାଏ । ଅର୍ଥାତ୍ ଇଣ୍ଟରନେଟ ବ୍ୟବହାରକାରୀଙ୍କ କ୍ଷେତ୍ରରେ ଭାରତର ଗ୍ରାମଗୁଡ଼ିକ ସହରଠାରୁ ଆଗରେ ଅଛନ୍ତି । ପରିସଂଖ୍ୟାନ ଅନୁଯାୟୀ, ସହରାଞ୍ଚଳର 20 କୋଟି 50 ଲକ୍ଷ ଜନସଂଖ୍ୟା ଯେଉଁଠାରେ ଇଣ୍ଟରନେଟ୍ ବ୍ୟବହାର କରନ୍ତି, ସେଠାରେ ଗ୍ରାମାଞ୍ଚଳର 22 କୋଟି 70 ଲକ୍ଷ ଜନସଂଖ୍ୟା ଇଣ୍ଟରନେଟ୍ ବ୍ୟବହାର କରୁଛନ୍ତି । ସଂଗଠନ ଦ୍ୱାରା କରାଯାଇଥିବା ସର୍ଭେରେ ଏହି ସୂଚନା ପ୍ରକାଶ ପାଇଛି ।

ଏହି ପରିବର୍ତ୍ତନ ପଛରେ ସ୍ମାର୍ଟଫୋନ ଏବଂ ହାଇସ୍ପିଡ ଇଣ୍ଟରନେଟ ଏକ ବଡ଼ କାରଣ ବୋଲି ବିଶ୍ୱାସ କରାଯାଏ । ଚଳିତ ବର୍ଷ ଜାନୁଆରୀରେ ଭାରତର ସ୍ମାର୍ଟଫୋନ ବଜାର ପ୍ରଥମ ଥର ପାଇଁ ଆମେରିକାର ବଜାରକୁ ଅତିକ୍ରମ କରିଛି ଏବଂ ଏହା ଚୀନ୍ ପରେ ଦ୍ୱିତୀୟ ବୃହତ୍ତମ ସ୍ମାର୍ଟଫୋନ ବଜାରରେ ପରିଣତ ହୋଇଛି । ଭାରତରେ ବର୍ତ୍ତମାନ 50 କୋଟି 40 ଲକ୍ଷ ଇଣ୍ଟରନେଟ ବ୍ୟବହାରକାରୀ ଅଛନ୍ତି, ଯାହା ଚୀନ୍ ପରେ ବିଶ୍ୱର ଦ୍ୱିତୀୟ ସର୍ବାଧିକ ଉପଭୋକ୍ତା ଅଟେ । ଚାଇନାରେ ବିଶ୍ବରେ ସର୍ବାଧିକ ଇଣ୍ଟରନେଟ୍ ବ୍ୟବହାରକାରୀ ଅଛନ୍ତି, ସେମାନଙ୍କ ସଂଖ୍ୟା ପ୍ରାୟ 85 କୋଟି ଅଟେ ।

ଏହି ସୂଚନା ବାଣ୍ଟି ବିଜେପି ଟ୍ୱିଟର ହ୍ୟାଣ୍ଡେଲରୁ ଟ୍ୱିଟ୍ କରି କହିଛି ଯେ, ସହରାଞ୍ଚଳ ଏବଂ ଗ୍ରାମାଞ୍ଚଳ ଭାରତ ମଧ୍ୟରେ ପାର୍ଥକ୍ୟ ଲିଭିଯାଉଥିବା ଜଣାପଡିଛି । ଭାରତରେ ପ୍ରଥମ ଥର ପାଇଁ ସହରାଞ୍ଚଳ ଅପେକ୍ଷା ଗ୍ରାମାଞ୍ଚଳରେ ଅଧିକ ଇଣ୍ଟରନେଟ୍ ବ୍ୟବହାରକାରୀ ଅଛନ୍ତି । ନଭେମ୍ବର 2019 ସୁଦ୍ଧା ଭାରତର ଗ୍ରାମାଞ୍ଚଳରେ 22 କୋଟି 70 ଲକ୍ଷ ଇଣ୍ଟରନେଟ ବ୍ୟବହାରକାରୀ ଥିବାବେଳେ ସହରାଞ୍ଚଳରେ 20 କୋଟି 50 ଲକ୍ଷ ଇଣ୍ଟରନେଟ ବ୍ୟବହାରକାରୀ ଅଛନ୍ତି ।