ପାଟନା: ରାଷ୍ଟ୍ରୀୟ ଜନତା ଦଳ ବିହାର ବିଧାନସଭା ନିର୍ବାଚନ ପାଇଁ ଇସ୍ତାହାର(ଘୋଷଣାପତ୍ର) ପ୍ରକାଶ କରିଛି। ଇସ୍ତାହାରରେ ଆରଜେଡି ବିହାରର ବେକାର ଯୁବକଙ୍କୁ 10 ଲକ୍ଷ ଚାକିରିର ପ୍ରତିଶୃତି ଦେଇଛି। ପାଟନାରେ ତେଜସ୍ବୀ ଯାଦବଙ୍କ ସମେତ ଦଳର ଅନେକ ବରିଷ୍ଠ ନେତା ଏହାକୁ ଉନ୍ମୋଚନ କରିଛନ୍ତି ।
ଇସ୍ତାହାରରେ ଦଳ ବେକାର ଯୁବକଙ୍କୁ ଅନେକ ପ୍ରତିଶୃତି ଦେଇଛି। ଏଥିରେ ଆରଜେଡି 10 ଲକ୍ଷ ଚାକିରି ଦେବାର ପୁରୁଣା ବିବୃତ୍ତିକୁ ଦୋହରାଇଛି। ଏହା ବ୍ୟତୀତ ଦଳ ବେକାର ଯୁବକଙ୍କୁ 1500 ଟଙ୍କା ବେକାରୀ ଭତ୍ତା ପ୍ରତିଶୃତି ଦେଇଛି। ଅନ୍ୟପକ୍ଷେ ସରକାରୀ ଚାକିରି ଫର୍ମ ପୂରଣ ପାଇଁ ବିହାରର ଯୁବକମାନଙ୍କୁ ଆବେଦନ ଶୁଳ୍କ ଦେବାକୁ ପଡିବ ନାହିଁ।
ସରକାରୀ ଚାକିରିରେ ବିହାରର ଯୁବକମାନଙ୍କୁ ଅଗ୍ରାଧିକାର ଦେବା ପାଇଁ ରାଜ୍ୟ ସରକାର ଘରୋଇ ନୀତି ଆଣିବେ ଏବଂ ସରକାରୀ ଚାକିରିର 85 ପ୍ରତିଶତ ବିହାର ଯୁବକଙ୍କ ପାଇଁ ସଂରକ୍ଷିତ ରଖାଯିବ । ଏହା ବ୍ୟତୀତ ଆରଜେଡି ଚାଷୀଙ୍କ ଋଣ ଛାଡ ଘୋଷଣା କରିଛି। ନୂତନ ଶିଳ୍ପ ପାଇଁ ଏକ ନୂତନ ନୀତି ଅଣାଯିବ । ନୂତନ ଶିଳ୍ପ ପ୍ରତିଷ୍ଠା ପାଇଁ ଟିକସ ଲାଗିବ ନାହିଁ ବୋଲି ଆରଜେଡି ପ୍ରତିଶୃତି ଦେଇଛି।
ଚୁକ୍ତିଭିତ୍ତିକ ଶିକ୍ଷକ ଏବଂ ଉର୍ଦ୍ଦୁ ଶିକ୍ଷକମାନଙ୍କୁ ସ୍ଥାୟୀ ଭାବେ ନିଯୁକ୍ତି ଦିଆଯିବ । କୃଷକ ଆୟୋଗ, ବୃତ୍ତିଗତ ଆୟୋଗ, ଯୁବ ଆୟୋଗ ଏବଂ କ୍ରୀଡା ଆୟୋଗ ଗଠନ କରାଯିବ। ରାଜ୍ୟର ଜିଡିପିର 22 ପ୍ରତିଶତ ଶିକ୍ଷା ପାଇଁ ଖର୍ଚ୍ଚ ହେବ। ବୃଦ୍ଧ ଓ ଗରିବଙ୍କ ପେନସନ୍ 400 ରୁ 1000 ଟଙ୍କାକୁ ବୃଦ୍ଧି କରାଯିବ । କିଡନୀ ରୋଗୀଙ୍କ ପାଇଁ ମାଗଣା ଡାଏଲିସିସ୍ ବ୍ୟବସ୍ଥା ହେବ । ପ୍ରତ୍ୟେକ ଜିଲ୍ଲାରେ ମେଡିକାଲ କଲେଜ ଏବଂ ଡାକ୍ତରଖାନା ପ୍ରତିଷ୍ଠା କରାଯିବ।
