'ମୁଲାୟମଙ୍କ ବୟସ ହୋଇଗଲାଣି, ତାଙ୍କ ମୁଣ୍ଡ କାମ କରୁନି'

ମୋଦିଙ୍କ ସମର୍ଥନରେ ମୁଲାୟମ । ପ୍ରଧାନମନ୍ତ୍ରୀ ଭାବେ ଆଉଥରେ ନରେନ୍ଦ୍ର ମୋଦିଙ୍କୁ ଦେଖିବାକୁ ଚାହାନ୍ତି ମୁଲାୟମ ସିଂହ ଯାଦବ ।

ବିହାର: ନିଜ ମନ୍ତବ୍ୟ ପାଇଁ ସମାଜବାଦୀ ପାର୍ଟି ନେତା ମୁଲାୟମ ସିଂହ ଯାଦବ ଏବେ ସାରା ଦେଶରେ ଚର୍ଚ୍ଚାର ବିଷୟ ପାଲଟିଛନ୍ତି । ଲୋକସଭାର ଶେଷ ଅଧିବେଶନରେ ମୁଲାୟମ କହିଥିଲେ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସେ ପୁଣିଥରେ ପ୍ରଧାନମନ୍ତ୍ରୀ ପଦରେ ଦେଖିବାକୁ ଚାହୁଁଛନ୍ତି । ଏହାକୁ ନେଇ ସାରା ଦେଶରେ ମୁଲାୟମଙ୍କୁ ସମାଲୋଚନା କରାଯାଇଛି ।

ତେବେ ମୁଲାୟମଙ୍କୁ ଏହି ମନ୍ତବ୍ୟ ପାଇଁ ତାତ୍ସଲ୍ୟ କରିଛନ୍ତି ବିହାରର ପୂର୍ବତନ ମୁଖ୍ୟମନ୍ତ୍ରୀ ତଥା ଲାଲୁ ପ୍ରସାଦ ଯାଦବଙ୍କ ପତ୍ନୀ ରାବ୍ରି ଦେବୀ । ମୁଲାୟମଙ୍କୁ କଟାକ୍ଷ କରି ସେ କହିଛନ୍ତି ଯେ ତାଙ୍କୁ ବାର୍ଦ୍ଧକ୍ୟ ଗ୍ରାସ କରିଲାଣି । ସେଥିପାଇଁ ତାଙ୍କ ମୁଣ୍ଡ କାମ କରୁନି । କେତେବେଳେ କଣ କହୁଛନ୍ତି ସେ ଜାଣିପାରୁନାହାନ୍ତି ।

ରାବ୍ରି ଦେବୀ ଆହୁରି କହିଛନ୍ତି ଯେ ବାର୍ଦ୍ଧକ୍ୟ ହୋଇଯାଇଥିବାରୁ ମୁଲାୟମଙ୍କ ସ୍ମୃତି ଶକ୍ତି କମିଯାଇଛି । ତାଙ୍କର କିଛି କଥା ମନେ ରହୁନି । ସେଥିପାଇଁ ସେ ଏପରି ମନ୍ତବ୍ୟ ଦେଉଛନ୍ତି । ଏହାର କିଛି ଅର୍ଥ ନାହିଁ । ତାଙ୍କ କଥାର କୌଣସି ମୂଲ୍ୟ ନାହିଁ ବୋଲି ରାବ୍ରି କହିଛନ୍ତି ।

ଉଲ୍ଲେଖଯୋଗ୍ୟ ଯେ ଲୋକସଭାର ଶେଷ ଅଧିବେଶନରେ ମୁଲାୟମ କହିଥିଲେ ସେ ଚାହୁଁଛନ୍ତି ସମସ୍ତ ସଦସ୍ୟ ପୁଣିଥରେ ଗୃହକୁ ଫେରନ୍ତୁ । ମୋଦି ଆଉଥରେ ପ୍ରଧାନମନ୍ତ୍ରୀ ହେବେ ବୋଲି ସେ ଆଶାବାଦୀ ଅଛନ୍ତି । ତାଙ୍କ ମନ୍ତବ୍ୟ ପରେ ସଦସ୍ୟମାନେ ଗୃହରେ କରତାଳି ମାରି ଏହାକୁ ସ୍ୱାଗତ କରିଥିଲେ ।