ନୂଆଦିଲ୍ଲୀ: ବିଷାକ୍ତ ବାୟୁ ବଳୟରେ ରାଷ୍ଟ୍ରୀୟ ରାଜଧାନୀ ଦିଲ୍ଲୀ ଅଦୃଶ୍ୟମାନ ଭଳି ପ୍ରତୀୟମାନ ହେଉଛି । ଚାରିଆଡ ଧୂଆଁଳିଆ ଓ ବିଷାକ୍ତ ବାୟୁରେ ଆଚ୍ଛାଦିତ । ବାୟୁ ପ୍ରଦୂଷଣ ବହୁଗୁଣିତ ହେବାରେ ଲାଗୁଛି । ରାଜଧାନୀର ଏହି ସଙ୍କଟ ପାଇଁ ପଡୋଶୀ ରାଜ୍ୟରେ ଅମଳ ପରେ କ୍ଷେତରେ ରହିଯାଇଥିବା ଶସ୍ୟ ମୂଳ, ପାଳ, ନଡା ଜାଳିବାକୁ ଦାୟୀ କରାଯାଉଛି । ଏହି ମାମଲା ସର୍ବାଧିକ ପଞ୍ଜାବରେ ଦେଖାଦେଇଛି । ଏନେଇ ଏକ ସାଟେଲାଇଟ ଦ୍ବାରା ଜାରି କରାଯାଇଥିବା ଚିତ୍ର ରାଜ୍ୟର ଶସ୍ୟ ଜଳା ଅଞ୍ଚଳକୁ ସ୍ପଷ୍ଟ ଭାବରେ ଦେଖାଇଛି । ଯାହା ଅତ୍ୟନ୍ତ ଚିନ୍ତାଜନକ ବୋଲି ଜଣାଯାଇଛି।
ରବିବାର ପଞ୍ଜାବରେ ଦୀପାବଳି ପରେ ଏବେ ପର୍ଯ୍ୟନ୍ତ ସବୁଠାରୁ ଅଧିକ ଶସ୍ୟର ମୂଳ ଜଳାଯିବାର ପ୍ରମାଣ ମିଳିଛି । ପିଜିଆଇର କମ୍ୟୁନିଟି ମେଡିସିନ ଆଣ୍ଡ୍ ସ୍କୁଲ ଅଫ୍ ପବ୍ଲିକ ହେଲଥ୍ର ପରିବେଶ ବିଶେଷଜ୍ଞ ଡା. ରବିନ୍ଦ୍ର ଖୈୱାଲ ଏକ ସାଟେଲାଇଟ ଚିତ୍ର ଆଧାରରେ ଚିନ୍ତାଜନକ ତଥ୍ୟ ଉପସ୍ଥାପନା କରିଛନ୍ତି । ଏଥିରେ ଦୀପାବଳୀ ଠାରୁ 3 ନଭେମ୍ବର, ରବିବାର 12ଟା ସୁଧା ପଞ୍ଜାବରେ 2820ଟି ସ୍ଥାନରେ ଶସ୍ୟ ଜଳା ଯାଇଛି।