ଚେନ୍ନାଇ: ଆଉ ଏକ ଇତିହାସ ରଚିବା ପାଇଁ ପ୍ରସ୍ତୁତ ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ) । ଆସନ୍ତାକାଲି(ବୁଧବାର) ଅର୍ଥାତ 27 ତାରିଖରେ 14ଟି ଉପଗ୍ରହକୁ ମହାକାଶକୁ ଛାଡ଼ିବା ପାଇଁ ପ୍ରସ୍ତୁତି ଆରମ୍ଭ କରିଦେଇଛି ଇସ୍ରୋ । ପୋଲାର ସାଟେଲାଇଟ ଲଞ୍ଚ ଭେହିକିଲରୁ 14ଟି ଛୋଟ ଉପଗ୍ରହର ହେବ ଉତକ୍ଷେପଣ । ଏନେଇ 24 ଘଣ୍ଟା ପୂର୍ବରୁ କାଉଣ୍ଟ ଡାଉନ ଆରମ୍ଭ ହୋଇଛି । ମଙ୍ଗଳବାର ସକାଳ 7.28 ମିନିଟରୁ ଏହି କାଉଣ୍ଟ ଡାଉନ ଆରମ୍ଭ ହୋଇଛି ।
ଏହି ଲଞ୍ଚ ଭେହିକିଲ୍ ଶ୍ରୀହରିକୋଟସ୍ଥିତ ସତୀଶ ଧାଓ୍ବନ ସ୍ପେଶ ସେଣ୍ଟରରୁ ଲଞ୍ଚ ହେବ । ମିଳିଥିବା ସୂଚନା ମୁତାବକ ପିଏସଏଲଭି ସି-47 ଏକ୍ସଏଲ କନଫିଗରେସନ ବିଶିଷ୍ଟ ଏହି ଲଞ୍ଚିଂ ଭେହିକିଲ ମହାକାଶ ଗସ୍ତ କରିବ । ଏହା ସହିତ ପିଏସଏଲଭିର ଏହା 21ତମ ପ୍ରକ୍ଷେପଣ ହେବ ବୋଲି ଇସ୍ରୋ ପକ୍ଷରୁ ସୂଚନା ଦିଆଯାଇଛି ।