କୋଭିଡ୍ ଲକ୍ଷଣ ଥିବା ଗର୍ଭବତୀଙ୍କୁ ହସ୍ପିଟାଲରେ କଲେନି ଭର୍ତ୍ତି, ଆମ୍ବୁଲାନ୍ସରେ ହେଲା ମୃତ୍ୟୁ

ଆମ୍ବୁଲାନ୍ସରେ ଜଣେ 30 ବର୍ଷ ବୟସ୍କା ମହିଳାଙ୍କ ମୃତ୍ୟୁ ଘଟିଛି, ଯିଏ 8ମାସ ଗର୍ଭବତୀ ଥିଲେ । ମହିଳାଙ୍କ ପାଖରେ କୋରୋନା ଲକ୍ଷଣ ଥିବାରୁ ପ୍ରତ୍ୟେକ ଡାକ୍ତରଖାନା ଶଯ୍ୟା ଅଭାବ କହି ତାଙ୍କ ଆଡମିଶନକୁ ଅସ୍ୱୀକାର କରଦେଇଥିଲେ । ଫଳରେ ଦୀର୍ଘ 13 ଘଣ୍ଟାର ଯାତ୍ରା ପରେ ଆମ୍ବୁଲାନ୍ସରେ ଶେଷ ନିଶ୍ବାସ ତ୍ୟାଗ କରିଥିଲେ ମହିଳା । ଅଧିକ ପଢନ୍ତୁ...

ନୂଆଦିଲ୍ଲୀ: ମହାମାରୀ କୋରୋନା ଏବେ ସମଗ୍ର ବିଶ୍ବରେ ଦାଉ ସାଜୁଥିବା ବେଳେ ପୁଣି ଏକ ଦୁଃଖଦ ଘଟଣା ସମ୍ନାକୁ ଆସିଛି । ଶୁକ୍ରବାର ରାତିରେ ଆମ୍ବୁଲାନ୍ସରେ ଜଣେ 30 ବର୍ଷ ବୟସ୍କା ମହିଳାଙ୍କ ମୃତ୍ୟୁ ଘଟିଛି, ଯିଏ 8ମାସ ଗର୍ଭବତୀ ଥିଲେ । ମୃତକଙ୍କ ଗାଜିଆବାଦର ଖୋଡା ଗାଁର ବାସିନ୍ଦା ବୋଲି ଜଣାପଡିଛି।

ଖବର ଅନୁଯାୟୀ, ମହିଳାଙ୍କ ପରିବାର ସଦସ୍ୟ ଗର୍ଭଧାରଣର ଅଷ୍ଟମ ମାସରେ ଆଡମିଶନ ପାଇଁ ଡାକ୍ତରଖାନା ପରିଦର୍ଶନ କରିଥିଲେ। ମାତ୍ର ମହିଳାଙ୍କ ପାଖରେ କୋରୋନା ଲକ୍ଷଣ ଥିବାରୁ ପ୍ରତ୍ୟେକ ଡାକ୍ତରଖାନା ଶଯ୍ୟା ଅଭାବ କହି ତାଙ୍କ ଆଡମିଶନକୁ ଅସ୍ୱୀକାର କରିଦେଇଥିଲେ । ଫଳରେ ଦୀର୍ଘ 13 ଘଣ୍ଟା ଧରି ମହିଳା ଏବଂ ତାଙ୍କ ପରିବାର ଲୋକେ ବୁଲାବୁଲି କରିବା ପରେ ମଝିରାସ୍ତାରେ ହିଁ ମହିଳା ଜଣକ ତାଙ୍କ ଶେଷ ନିଶ୍ବାସ ତ୍ୟାଗ କରିଥିଲେ । ସମ୍ପର୍କୀୟମାନେ କହିଛନ୍ତି ଯେ, ଗର୍ଭବତୀ ମହିଳା ଶୁକ୍ରବାର ସକାଳେ ନିଶ୍ୱାସ ପ୍ରଶ୍ୱାସ ନେବାରେ କଷ୍ଟ ଅନୁଭବ କରିବାରୁ ଆମେ ତାଙ୍କୁ ନୋଏଡାର ଏକ ଡାକ୍ତରଖାନାକୁ ସକାଳ ପ୍ରାୟ 6 ଟାରେ ନେଇଥିଲୁ ଯେଉଁଠାରେ ତାଙ୍କୁ ଆଡମିଶନ କରାଯାଇ ନଥିଲା ଏବଂ ଗାଜିଆବାଦ ଯିବାକୁ କୁହାଯାଇଥିଲା।

ଶନିବାର ଦିନ ଏହି ଘଟଣା ଜିଲ୍ଲା ପ୍ରଶାସନ ନିକଟରେ ପହଞ୍ଚିବା ପରେ ଜିଲ୍ଲା ମାଜିଷ୍ଟ୍ରେଟ୍ ସୁହାସ୍ ଏଲ୍ ୱାଇ ତୁରନ୍ତ ଏ ଦିଗରେ ତଦନ୍ତ କରିବାକୁ ଏଡିଏମ୍ ମୁନିନ୍ଦ୍ର ନାଥ ଉପାଧ୍ୟାୟଙ୍କୁ ନିର୍ଦ୍ଦେଶ ଦେଇଥିଲେ । ତେବେ ଏହି ଘଟଣା ଉପରେ ତଦନ୍ତ ଚାଲିଛି ଏବଂ ଘଟଣା ପାଇଁ ଦାୟୀ ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏଭଳି ଘଟଣା ପୁନରାବୃତ୍ତି ନହେବାକୁ ଗୌତମ ବୁଦ୍ଧ ନଗର ସିଏମଓ ନିଶ୍ଚିତ କରିଛନ୍ତି ।