ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ମାସର ଶେଷ ରବିବାରରେ ସମଗ୍ର ଦେଶବାସୀଙ୍କୁ ରେଡିଓ କାର୍ଯ୍ୟକ୍ରମ 'ମନ କି ବାତ୍' ମାଧ୍ୟମରେ ସମ୍ବୋଧିତ କରିବେ । ଏହା ତାଙ୍କ ଦ୍ବିତୀୟ ପାଳିର ଚତୁର୍ଥ 'ମନ କି ବାତ୍' । ଗତ 'ମନ କି ବାତ୍' କାର୍ଯ୍ୟକ୍ରମରେ ମୋଦି ପ୍ଲାଷ୍ଟିକ୍ ବ୍ୟବହାରରେ ରୋକ ଲଗାଇବା ପାଇଁ ସଂକଳ୍ପ ନେବାକୁ କହିଥିଲେ । ସେପ୍ଟେମ୍ବର 13ରେ ଲୋକଙ୍କ ଠାରୁ ସେ ଏଥିପାଇଁ ପରାମର୍ଶ ମଧ୍ୟ ମାଗିଥିଲେ ।
ଆଜିର 'ମନ କି ବାତ୍' କାର୍ଯ୍ୟକ୍ରମରେ ତିନି ବର୍ଷ ପୂର୍ବରୁ ହୋଇଥିବା ସର୍ଜିକାଲ ଷ୍ଟ୍ରାଇକ ଉପରେ ଚର୍ଚ୍ଚା କରିପାରନ୍ତି ପ୍ରଧାନମନ୍ତ୍ରୀ । କାରଣ ସାତ ଦିନିଆ ଆମେରିକା ଗସ୍ତରେ ଯାଇଥିବା ପ୍ରଧାନମନ୍ତ୍ରୀ ମୋଦି ଶନିବାର ରାତିରେ ଭାରତ ଫେରିଥିଲେ । ସ୍ବଦେଶ ଫେରି ମୋଦି 2016 ସର୍ଜିକାଲ ଷ୍ଟ୍ରାଇକ୍କୁ ମନେପକାଇବା ସହ ଠିକ୍ ତିନି ବର୍ଷ ପୂର୍ବେ ସେପ୍ଟେମ୍ବର 28 ଭାରତୀୟ ସେନା ପକ୍ଷରୁ ହୋଇଥିବା ସର୍ଜିକାଲ ଷ୍ଟ୍ରାଇକକୁ ପ୍ରଶଂସା ମଧ୍ୟ କରିଥିଲେ ।