ନୂଆଦିଲ୍ଲୀ: 2020 ଅର୍ଥାତ ନୂତନ ବର୍ଷର ପ୍ରଥମ ସୂର୍ଯ୍ୟୋଦୟ ହୋଇଛି। ନୂତନ ବର୍ଷର ଆଗମନରେ ଦେଶବ୍ୟାପି ଖୁସିର ଲହରି ଖେଳିଯାଇଛି । ସମସ୍ତେ ବର୍ଷର ପ୍ରଥମ ଦିନକୁ ଭିନ୍ନ ଭିନ୍ନ ଢଙ୍ଗରେ ପାଳନ କରୁଛନ୍ତି । ନୂଆବର୍ଷ ଉପଲକ୍ଷେ ଛୋଟରୁ ବଡ ସମସ୍ତ ବର୍ଗର ଲୋକେ ପରସ୍ପରକୁ ଶୁଭେଚ୍ଛା ଜଣାଇବା ସହ ପରସ୍ପରର ମଙ୍ଗଳକାମନା କରୁଛନ୍ତି । ନୂତନବର୍ଷ ଉପଲକ୍ଷେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଦେଶବାସୀଙ୍କୁ ଶୁଭେଚ୍ଛା ଜଣାଇଛନ୍ତି ।
ସେ ଟ୍ବିଟ କରି କହିଛନ୍ତି, 'ବର୍ଷ 2020 ସମସ୍ତଙ୍କ ଜୀବନକୁ ଆନନ୍ଦ ଏବଂ ଉଲ୍ଲାସରେ ଭରିଦେଉ । ସମସ୍ତେ ସୁସ୍ଥ ରୁହନ୍ତୁ ଏବଂ ସମସ୍ତଙ୍କ ଆକାଂକ୍ଷା ପୂର୍ଣ୍ଣ ହେଉ । ଆପଣ ସମସ୍ତଙ୍କୁ ନୂତନ ବର୍ଷ 2020ର ହାର୍ଦ୍ଦିକ ଶୁଭେଚ୍ଛା ।'
ସେହିପରି ରାଷ୍ଟ୍ରପତି ରାମନାଥ କୋବିନ୍ଦ ମଧ୍ୟ ଏହି ଅବସରରେ ଦେଶବାସୀଙ୍କୁ ଶୁଭେଚ୍ଛା ଜଣାଇବା ସହ ରାଷ୍ଟ୍ରର ମଙ୍ଗଳ କାମନା କରିଛନ୍ତି । ସେ ଟ୍ବିଟ କରି କହିଛନ୍ତି, 'ସମସ୍ତଙ୍କୁ ନୂଆ ବର୍ଷର ଶୁଭେଚ୍ଛା । ନୂଆ ଦଶନ୍ଧି ଏବଂ ନୂଆବର୍ଷ ଦୃଢ ଭାରତ ଗଠନ ପ୍ରତି ଆମ ପ୍ରତିବଦ୍ଧତାକୁ ନବୀକରଣ କରିବାର ଏକ ସୁଯୋଗ । 2020 ଦେଶପାଇଁ ଏବଂ ଦେଶବାସୀଙ୍କ ପାଇଁ ଖୁସି, ଶାନ୍ତି ଏବଂ ସମୃଦ୍ଧି ଆଣୁ । 'ଏହା ବ୍ୟତୀତ ଉପ ରାଷ୍ଟ୍ରପତି ଭେଙ୍କେୟା ନାଇଡୁ ମଧ୍ୟ ଦେଶବାସୀଙ୍କୁ ଶୁଭେଚ୍ଛା ଜଣାଇଛନ୍ତି ।
ସେପଟେ କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ମଧ୍ୟ ନୂଆବର୍ଷ ଉପଲକ୍ଷେ ଟ୍ବିଟ କରି ଦେଶବାସୀଙ୍କୁ ଶୁଭେଚ୍ଛା ଜଣାଇଛନ୍ତି । ସେ କହିଛନ୍ତି, 'ଆପଣ ସମସ୍ତଙ୍କୁ ନୂଆ ବର୍ଷର ଶୁଭେଚ୍ଛା । ଏହି ବର୍ଷ ଆପଣଙ୍କମାନଙ୍କ ପାଇଁ ଭଲ ହେଉ । 2020ର ସ୍ବାଗତ । '
