ଇସଲାମାବାଦ: ଅସମ୍ଭାଳ ହେବାରେ ଲାଗିଛି କୋରୋନା ପରିସ୍ଥିତି । ପାକିସ୍ତାନ ମଧ୍ୟ ଏହାର ପ୍ରକୋପରୁ ବାଦ ପଡିନି । ଗତ 24 ଘଣ୍ଟା ମଧ୍ୟରେ ପାକିସ୍ତାନରେ କୋରୋନା ଆକ୍ରାନ୍ତଙ୍କ ସଂଖ୍ୟା ବଢି 2450ରେ ପହଞ୍ଚିବା ବେଳେ ମୃତ୍ୟୁ ସଂଖ୍ୟା 35 ରହିଛି । ସେପଟେ ଏଯାବତ 126 ଲୋକେ ସୁସ୍ଥ ହୋଇ ଘରକୁ ଫେରିଛନ୍ତି ।
ଗୋଟିଏ ପଟେ କୋରୋନା ନିଜର କାୟା ବିସ୍ତାର କରିଚାଲିଥିବା ବେଳେ ଅନ୍ୟପଟେ ବନ୍ଦ ହେଉନାହିଁ ସାମୁହିକ ପ୍ରାର୍ଥନା । ଏହା ଉପରେ କଡା ଆଭିମୁଖ୍ୟ ସ୍ବରୂପ ଇମରାନ ସରକାର ସମସ୍ତ ସାମୂହିକ ପ୍ରାର୍ଥନାରେ ଅଙ୍କୁଶ ଲଗାଇବା ସହ ସର୍ବାଧିକ 5 ଜଣଙ୍କୁ ଏକାଠି ପ୍ରାର୍ଥନା କରିବାକୁ ଅନୁମତି ଦେଇଛନ୍ତି । ଯେଉଁଠାରେ ଏହି ନିୟମକୁ ଅଣଦେଖା କରାଯିବ ସେଠାରେ କଡା ପଦକ୍ଷେପ ନିଆଯିବା ନେଇ ଚେତାବନୀ ମଧ୍ୟ ଦିଆଯାଇଛି ।
ବର୍ତ୍ତମାନ ସୁଦ୍ଧା ପାକିସ୍ତାନରେ ଚିହ୍ନଟ ହୋଇଥିବା ପଜିଟଭ ରୋଗୀଙ୍କ ମଧ୍ୟରୁ ପଞ୍ଜାବ ପ୍ରାନ୍ତରେ 920, ସିନ୍ଧରେ 783, ଖୈବର-ପଖତୁଙ୍ଖୱାରେ 311, ବାଲୋଚିସ୍ତାନରେ 169, ଗିଲଗିଟ-ବାଲତିସ୍ତାନ(ଜିବି)ରେ 190, ଇସଲାମାବାଦରେ 68 ଓ ପାକିସ୍ତାନ ଅଧିକୃତ କଶ୍ମୀରରେ 9 ଜଣ ରହିଛନ୍ତି ।
ଦେଶରେ କୋରୋନା ଆକ୍ରାନ୍ତଙ୍କ ସଂଖ୍ୟା ଲଗାତାର ବଢିଚାଲିଥିବା ବେଳେ ଆଶିଂକ ଭାବେ ମାତ୍ର ସପ୍ତାହେ ପାଇଁ ଲକଡାଉନ ଘୋଷଣା କରିଥିଲେ ସରକାର । ସେପଟେ ପୂର୍ବରୁ ମସଜିଦମାନଙ୍କରେ ଶୁକ୍ରବାର ପ୍ରାର୍ଥନାରେ ମାତ୍ର 5 ଜଣଙ୍କ ରହିବା ପାଇଁ ମଧ୍ୟ ନିର୍ଦ୍ଦେଶ ଜାରି କରିଥିଲେ ସରକାର । ତଥାପି ବନ୍ଦ ହେଉ ନାହିଁ ସାମୁହିକ ପ୍ରାର୍ଥନା । ଲୋକେ ଏହି ମହାମାରୀରର ଗମ୍ଭୀରତା ବୁଝିବାକୁ ମଧ୍ୟ ନାରାଜ । ଯାହା ପାକିସ୍ତାନ ସରକାରଙ୍କ ପାଇଁ ଏବେ ଚିନ୍ତାର କାରଣ ପାଲଟିଛି ।
