ଇସଲାମାବାଦ: ଦିନକୁ ଦିନ ଭୟଙ୍କର ହେବାରେ ଲାଗିଛି କୋରୋନା ଭାଇରସ୍। ଏହି ଭାଇରସ୍ ଏବେ 193ଟି ଦେଶରେ କାୟା ବିସ୍ତାର କରିସାରିଛି । ଚୀନ ପରେ ଇଟାଲିର ଅବସ୍ଥା ଏତେ ଖରାପ ଯେ 24 ଘଣ୍ଟାରେ 700ରୁ ଉର୍ଦ୍ଧ୍ବ ଲୋକଙ୍କ ମୃତ୍ୟୁ ହେଉଥିବା ବେଳେ ଏହି ସଂଖ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି । କିନ୍ତୁ ଏଇ ଭାଇରସ କବଳରୁ ଲୋକଙ୍କୁ ଉଦ୍ଧାର କରୁଥିବା ଡାକ୍ତର ଯଦି ଆକ୍ରାନ୍ତ ହୁଅନ୍ତି, ତେବେ ଆମେ ନିଜକୁ କେମିତି ରକ୍ଷା କରିବା ? ତେବେ ବିଶ୍ବକୁ ପ୍ରଥମେ କୋରୋନା ଭାଇରସ୍ ବିଷୟରେ ଅବଗତ କରାଇଥିବା ଚୀନ ଡାକ୍ତରଙ୍କ ମୃତ୍ୟୁ ପରେ ଏବେ ପାକିସ୍ତାନରେ ଘଟିଛି ଏଭଳି ଦୁଃଖଦ ଘଟଣା । ପାକିସ୍ତାନର ଗିଲଗିଟ୍-ବାଲ୍ଟିସ୍ତାନ(GB) ରେ କୋରୋନା ଭାଇରସକୁ ଚିହ୍ନଟ କରୁଥିବା ଜଣେ ଯୁବ ଡାକ୍ତରଙ୍କର ମୃତ୍ୟୁ ଘଟିଛି ।
ରବିବାର ରାତିରେ ଡାକ୍ତର ଉସମା ରିୟାଜଙ୍କ ମୃତ୍ୟୁ ହୋଇଥିବା ଜିବି ସରକାରୀ ମୁଖପାତ୍ର ଫଇଜୁଲ୍ଲା ଫରାକ୍ ନିଶ୍ଚିତ କରିଥିଲେ । କିନ୍ତୁ ତାଙ୍କର କୋରୋନାଜନିତ ମୃତ୍ୟୁ ହୋଇଛି କି ନାହିଁ ତାହା ଏଯାବତ୍ ସ୍ପଷ୍ଟ ହୋଇ ନାହିଁ । ରିୟାଜ ରୋଗୀଙ୍କ ସ୍କ୍ରିନିଂ ଟେଷ୍ଟରେ ସକ୍ରିୟ ଥିଲେ । ସେଥିପାଇଁ ତାଙ୍କୁ ଇରାନ୍ ସୀମାରେ ଥିବା ତପ୍ତନ ସହରରୁ ଆସୁଥିବା ରୋଗୀଙ୍କ ସ୍କ୍ରିନିଂ ପରୀକ୍ଷା କରିବାର ଦାୟିତ୍ବ ଦିଆଯାଇଥିଲା । ତାଙ୍କର ଏହି ସାହସିକତା ପାଇଁ ତାଙ୍କୁ ବିଭିନ୍ନ ମହଲାରେ ପ୍ରଶଂସା ମଧ୍ୟ କରାଯାଇଛି ।