ନୂଆଦିଲ୍ଲୀ : ସମଗ୍ର ବିଶ୍ବର ସମସ୍ତ ଲୋକଙ୍କ ନିକଟରେ କୋଭିଡ ଟିକା ପହଞ୍ଚିବାକୁ ଦୀର୍ଘ 4 ବର୍ଷର ସମୟ ଲାଗିଯାଇପାରେ । ଅର୍ଥାତ 2024 ଶେଷ ସୁଦ୍ଧା ସବୁ ଦେଶ ନିକଟରେ ପର୍ଯ୍ୟାପ୍ତ ପରିମାଣର ଟିକା ପହଞ୍ଚି ନ ପାରେ । ଏପରି ଆଶଙ୍କା କରିଛନ୍ତି ସେରମ ଇନଷ୍ଟିଚ୍ୟୁଟ ଅଫ ଇଣ୍ଡିଆର ସିଇଓ ଅଦର ପୁନାୱାଲା ।
ସେ କହିଛନ୍ତି, ଫାର୍ମାସ୍ୟୁଟିକାଲ କମ୍ପାନୀଗୁଡିକ କମ ସମୟରେ କିପରି ଅଧିକରୁ ଅଧିକ ଭ୍ୟାକସିନ ପ୍ରସ୍ତୁତ କରିବେ, ସେ ନେଇ ସେମାନେ ଉତ୍ପାଦନ ସ୍ତରକୁ ଶୀଘ୍ର ବୃଦ୍ଧି କରିନାହାଁନ୍ତି । ତେଣୁ ଟିକା ଆସିବା ପାଇଁ ନିହାତି 4 ବର୍ଷ ଲାଗିପାରେ ।
ପୁନାୱାଲା ଆହୁରି କହିଛନ୍ତି, ଯଦି କୋଭିଡ ଭ୍ୟାକସିନକୁ 2ଟି ଡୋଜରେ ଦିଆଯାଏ, ତେବେ ବିଶ୍ବରେ 15 ଶହ କୋଟି ଡୋଜର ଦରକାର । ଫଳରେ ଏତେ ସଂଖ୍ୟକ ଟିକା ପ୍ରସ୍ତୁତ କରି ସମଗ୍ର ବିଶ୍ବରେ ବଣ୍ଟନ କରିବା ସହଜ କଥା ନୁହେଁ ।
ସେରମ ଇଷ୍ଟିଚ୍ୟୁଟ ଭ୍ୟାକିସନ ପ୍ରସ୍ତୁତରେ 5 ଅନ୍ତରାଷ୍ଟ୍ରୀୟ ଫାର୍ମ ସହ ମିଶି କାମ କରୁଛି । ଅକ୍ସଫୋର୍ଡର ଟିକା ପାଇଁ ଆଷ୍ଟ୍ରାଜେନିକା ଓ ନୋଭାଭାକ୍ସ ସହିତ ମଧ୍ୟ କାମ କରୁଛି । ଏହି ସଂସ୍ଥା 100କୋଟି ଡୋଜ ପ୍ରସ୍ତୁତ କରିବାକୁ ଲକ୍ଷ୍ୟ ରଖିଛି । ସଫଳ ହେଲେ ଏହି ଟିକାରୁ ଅଧା ଭାରତକୁ ମିଳିବ ।
ଆଷ୍ଟ୍ରାଜେନେକା ସହିତ ମିଳିତ ଭାବେ ସିରମ ଇନଷ୍ଟିଚ୍ୟୁଟ ଯେଉଁ ଟିକା ପ୍ରସ୍ତୁତ କରୁଛି ତାହା 68 ଟି ଦେଶରେ ଉପଲବ୍ଧ ହେବ । ନୋଭାଭ୍ୟାକ୍ସ ସହିତ ହୋଇଥିବା ଚୁକ୍ତିନାମା ଅନୁଯାୟୀ 92 ଦେଶ ପାଇଁ ଟିକା ଡୋଜ ଉତ୍ପାଦନ କରିବାକୁ ଲକ୍ଷ୍ୟ ରଖିବ।
