ଶ୍ରୀନଗର: ଜାମ୍ମୁ କାଶ୍ମୀର ପୋଲିସ ଶୁକ୍ରବାର ଦିନ ଦାବି କରିଛି ଯେ ପୁଲୱାମା ଜିଲ୍ଲାର ଟ୍ରାଲ ଅଞ୍ଚଳରେ ହିଜବୁଲ ମୁଜାହିଦ୍ଦିନ (ଏଚଏମ) ଆତଙ୍କବାଦୀଙ୍କ ଉପସ୍ଥିତି ନାହିଁ। ଏହା 1989 ମସିହାରୁ ପ୍ରଥମ ଥର ଘଟିଛି। ଆଇଜିପି କାଶ୍ମୀର ବିଜୟଙ୍କ ବିବୃତ୍ତି ଶୁକ୍ରବାର ଦିନ ଟ୍ରାଲର ଚେୱା ଉଲାର ଗ୍ରାମରେ ସୁରକ୍ଷା ବାହିନୀ ସହ ପ୍ରାୟ 15 ଘଣ୍ଟା ଧରି ଗୁଳି ବିନିମୟରେ ତିନିଜଣ ଆତଙ୍କବାଦୀ ନିହତ ହେବା ପରେ ଏହା ସ୍ପଷ୍ଟ ହୋଇଛି।
ମାଇକ୍ରୋ ବ୍ଲଗିଂ ସାଇଟ୍ ଟ୍ୱିଟରକୁ ନେଇ କାଶ୍ମୀର ଜୋନ୍ ପୋଲିସ୍ ଟ୍ୱିଟ୍ କରି କହିଛନ୍ତି, "ଆଜିର ସଫଳ ଅପରସେନ ପରେ, ଟ୍ରାଲ୍ ଅଞ୍ଚଳରେ ଆତଙ୍କବାଦୀଙ୍କ ଉପସ୍ଥିତି ନାହିଁ। 1989 ପରଠାରୁ ଏହା ପ୍ରଥମ ଥର ପାଇଁ ଘଟିଛି ।"
ଶୁକ୍ରବାର ଦିନ ସୁରକ୍ଷା ବାହିନୀ ଗୁଳି ବିନିମୟରେ ଅତି କମରେ ତିନି ଜଣ ଆତଙ୍କବାଦୀଙ୍କୁ ହତ୍ୟା କରିଥିଲେ। ଖବର ଅନୁଯାୟୀ ଘଟଣାସ୍ଥଳରୁ ଅସ୍ତ୍ରଶସ୍ତ୍ର ଏବଂ ଗୁଳିଗୋଳା ସହିତ ତିନିଜଣ ଆତଙ୍କବାଦୀଙ୍କ ମୃତଦେହ ଉଦ୍ଧାର କରାଯାଇଥିଲା। ରିପୋର୍ଟରେ ଦର୍ଶାଯାଇଛି ଯେ ଏହି ତିନି ଆତଙ୍କବାଦୀ ଉପତ୍ୟକାର ସ୍ଥାନୀୟ ବାସିନ୍ଦା।
କେବଳ ଜୁନ୍ ମାସରେ ଦକ୍ଷିଣ କାଶ୍ମୀରରେ ଏହା ହେଉଛି ଦ୍ୱାଦଶ ମୁକାବିଲା ଯେଉଁଥିରେ ଉପତ୍ୟକାରେ ଏପର୍ଯ୍ୟନ୍ତ 38 ଆତଙ୍କବାଦୀଙ୍କୁ ହଟାଇ ଦିଆଯାଇଛି। ଚଳିତ ବର୍ଷ କାଶ୍ମୀରରେ ନିହତ ହୋଇଥିବା ଆତଙ୍କବାଦୀଙ୍କ ସଂଖ୍ୟା ବର୍ତ୍ତମାନ 111।
ହିଜବୁଲ ମୁଜାହିଦ୍ଦିନରେ ଅନେକ ଯୁବକ ଥିଲେ ଯେଉଁମାନେ ଆତଙ୍କବାଦ କାର୍ଯ୍ୟକଳାପ ସହିତ ଜଡିତ ହୋଇଥିଲେ। ବୁରହାନ ୱାନି ଏବଂ ଜାକିର ମୁସାଙ୍କ ପରି ଅନେକ ବରିଷ୍ଠ କମାଣ୍ଡରମାନେ ଟ୍ରାଲର ଥିଲେ।
