ମୁମ୍ବାଇ: ଭାରତରେ କୋରୋନା କେନ୍ଦ୍ର ଭାବେ ପରିଚିତ ମହାରାଷ୍ଟ୍ର ବର୍ତ୍ତମାନ ଆଉ ଏକ ବିପର୍ଯ୍ୟୟର ସମ୍ମୁଖୀନ ହୋଇଛି। ମହାରାଷ୍ଟ୍ର ଓ ଗୁଜୁରାଟର ଅନେକ ଉପକୂଳବର୍ତ୍ତୀ ଅଞ୍ଚଳରେ ଘୂର୍ଣ୍ଣିବଳୟ ‘ନିସର୍ଗ’ ଆସିବାକୁ ଯାଉଛି। ଏହି ଅଞ୍ଚଳରେ ପ୍ରବଳ ବର୍ଷା ଆରମ୍ଭ ହୋଇଛି। ତେବେ ପ୍ରକୃତି ଝଡର ମୁକାବିଲା ପାଇଁ ମହାରାଷ୍ଟ୍ରରେ ପ୍ରଶାସନ ଅନେକ ପ୍ରସ୍ତୁତି ଚଳାଇଛି। ଏହି ବିପର୍ଯ୍ୟୟର ମୁକାବିଲା ପାଇଁ 40 ଟି NDRF ଦଳ ଏଠାରେ ନିୟୋଜିତ ହୋଇଛନ୍ତି । ମୁମ୍ବାଇରେ 3ଟି, ରାୟଗଡରେ 3 ଟି, ପାଲଘର, ଥାନେ ଓ ରତ୍ନାଗିରିରେ ଏନଡିଆରଏଫର 3ଟି ଦଳ ଲେଖାଏଁ ନିୟୋଜିତ ହୋଇଛନ୍ତି।
ଏଥି ସହିତ ଗୁଜୁରାଟର ଦମନରେ ଏହି ଝଡ ଯୋଗୁଁ ବର୍ଷା ଓ ପ୍ରବଳ ପବନ ଆରମ୍ଭ ହୋଇଛି। ସ୍ଥାନୀୟ ଲୋକଙ୍କୁ ଏଠାରୁ ଏକ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଉଛି । ପାଣିପାଗ ବିଭାଗ ଅନୁଯାୟୀ, ‘ନିସର୍ଗ’ ଝଡ ପ୍ରଥମେ ମହାରାଷ୍ଟ୍ରର ଆଲିବାଗ ସୀମାକୁ ଆସିବ। କୁହାଯାଉଛି ଯେ ଘୂର୍ଣ୍ଣିବଳୟ ଘଣ୍ଟା ପ୍ରତି 110 କିଲୋମିଟର ବେଗରେ ମହାରାଷ୍ଟ୍ର ଆଡକୁ ଗତି କରୁଛି। ଏହା ବର୍ତ୍ତମାନ ଆଲିବାଗ ଠାରୁ ପ୍ରାୟ 100 କିଲୋମିଟର ଦୂରରେ । ନାଶିକ, ମୁମ୍ବାଇ, ପାଲଘର, ସିନ୍ଧୁଦର୍ଗ, ରତ୍ନାଗିରି, ରାୟଗଡ, ମୁମ୍ବାଇ ଓ ଥାନେ ଭଳି ଉପକୂଳବର୍ତ୍ତୀ ଅଞ୍ଚଳରେ ଏହି ଝଡ ସୃଷ୍ଟି ହେବ। ଏହାକୁ ଦୃଷ୍ଟିରେ ରଖି ସ୍ଥାନୀୟ ଲୋକଙ୍କୁ ଏହି ଅଞ୍ଚଳରୁ ସୁରକ୍ଷିତ ସ୍ଥାନକୁ ପଠାଯାଉଛି। ଏହି ଘୂର୍ଣ୍ଣିବଳୟକୁ ଦୃଷ୍ଟିରେ ରଖି ଲୋକମାନେ କୂଳକୁ ନ ଯିବା ପାଇଁ ମୁମ୍ବାଇ ପୋଲିସ ସହରରେ ଧାରା 144 ଲାଗୁ କରିଛି।