କୋଲକାତା: ‘ଗଙ୍ଗା’ କେବଳ ନଦୀ ନୁହେଁ, ହିନ୍ଦୁ ଧର୍ମାବଲମ୍ବୀଙ୍କ ଭାବାବେଗ ସହିତ ଜଡିତ ଏକ ପୂର୍ଣ୍ଣସ୍ଥଳୀ । ଗଙ୍ଗା ପ୍ରତି ହିନ୍ଦୁଙ୍କ ରହିଛି ଏକ ସ୍ବତନ୍ତ୍ର ଆବେଗ । ଦିନକୁ ଦିନ ଏହି ପବିତ୍ର ନଦୀ ପ୍ରଦୂଷିତ ହେବାରେ ଲାଗିଛି । ଯାହା ବେଶ ବ୍ୟଥିତ କରିଛି ପଶ୍ଚିମବଙ୍ଗରେ ରହୁଥିବା ଗୌତମ ବିଶ୍ବାସଙ୍କୁ । ଖାସ୍ ସେଥିପାଇଁ ନିଜ କର୍ମମୟ ଜୀବନରୁ ସମୟ ବାହାର କରି ସେ ଲାଗିପଡିଛନ୍ତି ଗଙ୍ଗା ସଫେଇ ଅଭିଯାନରେ ।
ଗଙ୍ଗା ସଫେଇ ଅଭିଯାନରେ ଏକାକୀ ଆଗେଇ ଚାଲିଛନ୍ତି ଗୌତମ
ଭାଗିରଥୀ ନଦୀର ଲହରୀକୁ ଚିରି ଆଗକୁ ବଢୁଛି ଏକ ଛୋଟିଆ ଡଙ୍ଗା । ଶିତୁଆ ସକାଳର ଘନ କୁହୁଡିକୁ ନାହିଁ ଖାତିର୍ । କୁଳୁକୁଳୁ ବହି ଯାଉଥିବା ଶାନ୍ତ ନଦୀ ସହ ଯେମିତି କଥା ହେବାକୁ ଚେଷ୍ଟା କରୁଛନ୍ତି ଏହି ମଧ୍ୟ ବୟସ୍କ ଯୁବକ । ପଶ୍ଚିମବଙ୍ଗ ମୁର୍ଶିଦାବାଦ ଜିଲ୍ଲାରେ ରୁହନ୍ତି ଗୌତମ ଚନ୍ଦ୍ର ବିଶ୍ବାସ । ସିଏ ଏକୁଟିଆ ଲାଗି ପଡିଛନ୍ତି ଗଙ୍ଗା ସଫେଇ ଅଭିଯାନରେ । ଆଉ ‘ନମାମୀ ଗଙ୍ଗେ’ ମିଶନକୁ କରିଛନ୍ତି ନିଜର ଆଦର୍ଶ ।