ଭୋପାଲ: ମଧ୍ୟପ୍ରଦେଶର ଆଉ ଜଣେ ମନ୍ତ୍ରୀ କୋରୋନାରେ ଆକ୍ରାନ୍ତ ହୋଇଛନ୍ତି । ଶିକ୍ଷାମନ୍ତ୍ରୀ ବିଶ୍ବାସ ସାରଙ୍ଗ ରବିବାର କୋରୋନା ଭାଇରସ ପାଇଁ ପଜିଟିଭ ପରିକ୍ଷଣ କରିଛନ୍ତି । ଏନେଇ ସେ ନିଜେ ଟ୍ବିଟ କରି ସୂଚନା ଦେଇଛନ୍ତି । ତାଙ୍କର ପ୍ରଥମ କୋରୋନା ରିପୋର୍ଟ ନେଗେଟିଭ ଆସିବା ପରେ ସେ ସଂଗରୋଧରେ ଥିଲେ । ହେଲେ ଶିକ୍ଷାମନ୍ତ୍ରୀଙ୍କର ଦ୍ବିତୀୟ ରିପୋର୍ଟ ପଜିଟିଭ ଆସିଛି । ତେବେ ତାଙ୍କ ସଂସ୍ପର୍ସରେ ଆସିଥିବା ସମସ୍ତ ବ୍ୟକ୍ତିଙ୍କୁ କୋରୋନା ପରୀକ୍ଷଣ କରିବାକୁ ପରାମର୍ଶ ଦେଇଛନ୍ତି ବିଶ୍ବାସ ସାରଙ୍ଗ ।
ତେବେ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନଙ୍କ ସମେତ ରାଜ୍ୟର କେତେକ ମନ୍ତ୍ରୀ ଏବଂ ବିଜେପି ବିଧାୟକଙ୍କ ସମେତ ଅନ୍ୟ ନେତାମାନେ କୋରୋନାରେ ଆକ୍ରାନ୍ତ ହୋଇଛନ୍ତି । ସେମାନଙ୍କ ମଧ୍ୟରୁ କେତେକ ସୁସ୍ଥ ହୋଇ ଘରକୁ ଫେରିଥିବା ବେଳେ ଅନ୍ୟ କେତେକ ଚିକିତ୍ସିତ ହେଉଛନ୍ତି। ସେପଟେ ମୁଖ୍ୟମନ୍ତ୍ରୀ ଚୌହାନ କୋରୋନାରୁ ସୁସ୍ଥ ହୋଇଛନ୍ତି । ଚିକିତ୍ସାର 11 ଦିନ ପରେ ଶିବରାଜଙ୍କୁ ଡାକ୍ତରଖାନାରୁ ଡିସଚାର୍ଜ କରାଯାଇଥିଲା। ତେବେ ବର୍ତ୍ତମାନ ସେ 7 ଦିନ ପାଇଁ ଘରେ ସଂଗରୋଧ ଭାବରେ ଅଛନ୍ତି।