ଭାରତ ମାନଚିତ୍ରରୁ କାଶ୍ମୀରକୁ ବାଦ ଦେଇ ବିଧାୟିକା ହଟହଟା

74ତମ ସ୍ବାଧୀନତା ଦିବସରେ ଶୁଭେଚ୍ଛା ଜଣାଇ ଫେସବୁକରେ କାଶ୍ମୀର ବିହୀନ ଭାରତ ମାନଚିତ୍ର ପୋଷ୍ଟ କରି ହଟହଟା ହୋଇଛନ୍ତି କେରଳର ଜଣେ ବିଧାୟିକା । ସେ ହେଉଛନ୍ତି ଅରୁର ବିଧାୟିକା ଶାନିମୋଲ ଓସମାନ । ଅଧିକ ପଢନ୍ତୁ...

ଥିରୁଅନନ୍ତପୁରମ: ଦେଶ ସ୍ବାଧୀନତା ଅବସରରେ ଗତ ଅଗଷ୍ଟ 15ରେ ସୋସିଆଲ ମିଡିଆରେ ଉଛୁଳିଥିଲା ଶୁଭେଚ୍ଛା ବାର୍ତ୍ତା । ଚଳିତବର୍ଷ କୋରୋନା ମହାମାରୀ ସତ୍ତ୍ବେ ସ୍ବାଧୀନତା ଦିବସର ଉଲ୍ଲାସ କାଶ୍ମୀରଠାରୁ ଆରମ୍ଭ କରି କନ୍ୟାକୁମାରୀ ପର୍ଯ୍ୟନ୍ତ ଦେଖିବାକୁ ମିଳିଥିଲା । ହେଲେ 74ତମ ସ୍ବାଧୀନତା ଦିବସରେ ଶୁଭେଚ୍ଛା ଜଣାଇ ଫେସବୁକରେ କାଶ୍ମୀର ବିହୀନ ଭାରତ ମାନଚିତ୍ର ପୋଷ୍ଟ କରି ହଟହଟା ହୋଇଛନ୍ତି କେରଳର ଜଣେ ବିଧାୟିକା । ସେ ହେଉଛନ୍ତି ଅରୁର ବିଧାୟିକା ଶାନିମୋଲ ଓସମାନ ।

ବିଧାୟିକାଙ୍କ ଏହି ତ୍ରୁଟିପୂର୍ଣ୍ଣ ମାନଚିତ୍ର ପୋଷ୍ଟ କରି ସ୍ବାଧୀନତା ଦିବସ ଶୁଭେଚ୍ଛା ଜଣାଇବାକୁ ନେଇ ଅରୁର ନିର୍ବାଚନ ମଣ୍ଡଳୀର ସିପିଆଇ(ଏମ) ଦଳ ଏକ ମାମଲା ରୁଜୁ କରିଛି । ଏନେଇ ଜିଲ୍ଲା ପୋଲିସ ମୁଖ୍ୟ ପି ଏସ ସାବୁ ସୂଚନା ଦେଇଛନ୍ତି । ସେ କହିଛନ୍ତି କି ବିଧାୟିକା ବିରୋଧରେ ରୁଜୁ ହୋଇଥିବା ମାମଲାର ତଦନ୍ତ ଆରମ୍ଭ ହୋଇଛି । ସେପଟେ ଅଭିଯୋଗକାରୀ ସିପିଆଇ(ଏମ) ଦଳ କହିଛି କି ବିଧାୟିକା ଏହି ପୋଷ୍ଟ ଦ୍ବାରା ସାମ୍ବିଧାନିକ ଶପଥର ଅବମାନନା କରିଛନ୍ତି ।

ଏନେଇ ଅବଗତ ହେବା ପରେ ବିଧାୟିକାଙ୍କ ଫେସବୁକ ପେଜ ପରିଚାଳକ ଏହି ପୋଷ୍ଟକୁ ନେଇ କ୍ଷମା ପ୍ରାର୍ଥନା କରିଥିବା ଦେଖାଯାଇଛି । ଏହି ପୋଷ୍ଟଟି ଭୁଲ ବଶତଃ କରାଯାଇଥିବା କହି ସେ କ୍ଷମା ପ୍ରାର୍ଥନା କରିଛନ୍ତି । ତେବେ ପୋଷ୍ଟ ହୋଇଥିବା ଭାରତ ମାନଚିତ୍ର ଫଟୋଟି ୱିକିପିଡିଆରୁ ଡାଉନଲୋଡ କରାଯାଇଥିବା ବେଳେ ଏହାର ତଥ୍ୟ କପି କରିବା ସମୟରେ ଭୁଲ ବଶତଃ କିଛି ଅଂଶ ଛାଡି ଯାଇଥିଲା । ଫଳରେ ମାନଚିତ୍ରରେ କିଛି ଅଂଶ ତ୍ରୁଟିବଶତଃ ରହିଯାଇଥିଲା ।

ତେବେ ଏସମ୍ପର୍କରେ ଖବର ପାଇବା ପରେ ଫଟୋଟିକୁ ତୁରନ୍ତ ଫେସବୁକ ପେଜରୁ ହଟାଯାଇଥିବା ବିଧାୟିକାଙ୍କ ସୋସିଆଲ ମିଡିଆ ପରିଚାଳକ ସ୍ପଷ୍ଟ କରିଛନ୍ତି ।

ବ୍ୟୁରୋ ରିପୋର୍ଟ, ଇଟିଭି ଭାରତ